Yeni Azərbaycan Partiyası xalqın iradəsinin və milli birliyin təcəssümüdür
Hər bir siyasi təşkilatın gücü yalnız onun qarşıya qoyduğu məqsədlərlə, qəbul etdiyi proqram sənədləri ilə deyil, cəmiyyətdə qazandığı etimad, xalqla qurduğu mənəvi-siyasi bağlılıq və milli maraqların müdafiəsində nümayiş etdirdiyi mövqe ilə ölçülür. Siyasi tarix sübut edir ki, xalqın dəstəyinə arxalanan, cəmiyyətin gözləntilərini düzgün dəyərləndirən və fəaliyyətini ümummilli mənafelərə istiqamətləndirən siyasi qüvvələr uzunömürlü olur, dövlətin inkişafında aparıcı rol oynayırlar. Yeni Azərbaycan Partiyasının çoxillik fəaliyyəti də məhz bu həqiqətin parlaq nümunəsidir. Yarandığı ilk gündən etibarən xalqın arzu və istəklərini, milli dövlətçilik düşüncəsini və müstəqil Azərbaycanın gələcəyinə dair ümidlərini özündə birləşdirən YAP zaman keçdikcə ümumxalq partiyasına çevrilərək ölkənin siyasi həyatında özünəməxsus yer tutmuşdur.
Yeni Azərbaycan Partiyasının xalq arasında geniş nüfuz qazanmasının başlıca səbəbi onun fəaliyyətinin konkret tarixi şəraitdə meydana çıxmış ictimai tələblərə və milli maraqlara söykənməsi idi. 1992-ci il noyabrın 21-də Naxçıvanda keçirilən təsis konfransında ölkənin müxtəlif bölgələrini təmsil edən 550 nəfərin iştirakı ilə yaradılan partiya ilk gündən geniş ictimai dəstəyə malik olduğunu nümayiş etdirdi. Ulu Öndər Heydər Əliyevin rəhbərliyi altında formalaşan bu siyasi təşkilat müxtəlif dünyagörüşünə, peşə və fəaliyyət sahələrinə malik insanları vahid məqsəd ətrafında birləşdirdi. Onları bir araya gətirən əsas amil Azərbaycanın müstəqilliyinin qorunması, dövlətçiliyimizin möhkəmləndirilməsi, ölkədə sabitliyin və əmin-amanlığın bərqərar olması, xalqın rifahının yüksəldilməsi arzusu idi. Beləliklə, YAP-ın siyasi dayaqları inzibati imkanlar və ya formal təşkilatlanma hesabına deyil, insanların könüllü birliyi, inamı və ortaq gələcək düşüncəsi əsasında formalaşdı.
Partiyanın xalqla münasibətlərində həlledici amil Ulu Öndər Heydər Əliyevin şəxsiyyəti, siyasi nüfuzu və xalqın ona olan sonsuz inamı idi. Azərbaycan dövlətçiliyinin qorunması və möhkəmləndirilməsi naminə uzun illər ərzində göstərdiyi xidmətlər, zəngin idarəçilik təcrübəsi və mürəkkəb siyasi proseslərdə düzgün qərarlar qəbul etmək bacarığı Heydər Əliyevi xalqın böyük etimad göstərdiyi ümummilli lider səviyyəsinə yüksəltmişdi. Onun rəhbərliyi ilə Yeni Azərbaycan Partiyası qısa müddətdə cəmiyyətin müxtəlif təbəqələrinin dəstəyini qazandı, ölkənin bütün bölgələrində təşkilatlanaraq geniş siyasi hərəkata çevrildi. Xalqın bu dəstəyi partiyanın gələcək fəaliyyətinin möhkəm təməlini yaratmaqla yanaşı, onun qarşısında dayanan tarixi məsuliyyəti də müəyyənləşdirdi.
1993-cü ildə ölkənin taleyinin həll olunduğu ağır siyasi şəraitdə Heydər Əliyevin xalqın təkidli tələbi ilə hakimiyyətə qayıdışı və dövlət rəhbərliyini üzərinə götürməsi Azərbaycanın müasir tarixində dönüş nöqtəsi oldu. Dövlət müstəqilliyinin qorunması, vətəndaş qarşıdurmasının qarşısının alınması, siyasi sabitliyin təmin edilməsi və idarəçilik sisteminin möhkəmləndirilməsi istiqamətində atılan addımlar ölkəni parçalanmaq təhlükəsindən xilas etdi. Bu prosesdə Yeni Azərbaycan Partiyası xalqın dəstəyini ifadə edən, dövlətçilik maraqlarını müdafiə edən və ümummilli məqsədlərin reallaşmasına səfərbər olunan siyasi qüvvə kimi çıxış etdi. Partiyanın siyasi nüfuzunun artması, müxtəlif seçkilərdə qazandığı uğurlar və cəmiyyətin etimadını davamlı şəkildə qoruması onun ölkənin aparıcı siyasi təşkilatına çevrilməsini şərtləndirdi.
Ulu Öndər Heydər Əliyevin «YAP dünənin, bu günün və gələcəyin partiyasıdır» müdrik kəlamı partiyanın xalqla bağlılığının və tarixi missiyasının zamanla məhdudlaşmadığını ifadə edir. Bu siyasi baxışın mahiyyətində dünənin təcrübəsinə söykənərək bu günün məsuliyyətini daşımaq və gələcəyin çağırışlarına hazır olmaq dayanır. YAP-ın dünəni xalqın etimadı ilə başlanan mübarizə və dövlətçilik tariximizdəki mühüm dönüşlərlə, bu günü müstəqil Azərbaycanın inkişafında oynadığı aparıcı rolla, gələcəyi isə milli maraqlara sadiq yeni nəsillərin formalaşdırılması və ölkənin tərəqqisinə xidmət edən məqsədlərlə səciyyələnir. Məhz bu davamlılıq partiyanın siyasi həyatımızdakı mövqeyini möhkəmləndirən başlıca amillərdəndir.
Prezident İlham Əliyevin Yeni Azərbaycan Partiyasının VIII qurultayındakı çıxışında səsləndirdiyi «Bizim qələbələrimizin başlanğıc tarixi Yeni Azərbaycan Partiyasının təsis qurultayında baş verdi» fikri partiyanın yaranması ilə Azərbaycanın sonrakı tarixi uğurları arasındakı siyasi və mənəvi bağlılığı dolğun şəkildə ifadə edir. Bu qiymətləndirmə yalnız bir siyasi təşkilatın təsis olunmasının əhəmiyyətini deyil, həmin hadisənin ölkənin gələcək taleyinə göstərdiyi təsiri də əks etdirir. Azərbaycanın siyasi sabitliyə qovuşması, iqtisadi yüksəlişə nail olması, beynəlxalq mövqelərinin möhkəmlənməsi və qüdrətli dövlətə çevrilməsi vahid inkişaf strategiyasının ayrı-ayrı mərhələləridir. Həmin strategiyanın əsasını Ulu Öndər Heydər Əliyevin müəyyənləşdirdiyi dövlətçilik prinsipləri təşkil etmiş, Prezident İlham Əliyevin rəhbərliyi ilə bu siyasət yeni məzmun və miqyas qazanmışdır.
Azərbaycanın ən böyük tarixi nailiyyətlərindən biri olan ərazi bütövlüyümüzün və suverenliyimizin tam bərpası da bu ardıcıl inkişaf yolunun mühüm nəticəsidir. 44 günlük Vətən müharibəsində qazanılan tarixi Zəfər xalqımızın birliyini, dövlətimizin qüdrətini, ordumuzun gücünü və Ali Baş Komandan İlham Əliyevin qətiyyətli rəhbərliyini bütün dünyaya nümayiş etdirdi. Bu Qələbənin əldə olunmasında ölkədə uzun illər ərzində formalaşdırılmış güclü dövlətçilik ənənələri, milli həmrəylik, vətənpərvərlik ruhu və ictimai-siyasi sabitlik mühüm rol oynadı. Yeni Azərbaycan Partiyası da öz sıralarında birləşdirdiyi minlərlə insanın fəaliyyəti, ideoloji işi və ictimai təşəbbüsləri ilə bu ümummilli həmrəyliyin möhkəmləndirilməsinə töhfə verdi. Zəfərdən sonra başlanan quruculuq və bərpa prosesi, işğaldan azad edilmiş ərazilərə Böyük Qayıdış və ölkəmizin suveren inkişaf mərhələsinə qədəm qoyması isə qarşıda yeni vəzifələr müəyyənləşdirdi.
Bu gün Yeni Azərbaycan Partiyasının sıralarında müxtəlif nəsillərin nümayəndələrinin, ziyalıların, əmək adamlarının, gənclərin və ictimai fəalların birləşməsi onun ümumxalq xarakterinin bariz göstəricisidir. Xüsusilə gənclərin partiya həyatında fəal iştirakı, onların təşəbbüslərinə dəstək verilməsi və idarəçilik proseslərinə hazırlanması siyasi varisliyin təmin olunması baxımından mühüm istiqamətdir. Müasir dövrün çağırışları qarşısında bilikli, dünyagörüşlü, vətənpərvər və təşəbbüskar gənclərin yetişdirilməsi partiyanın gələcək inkişaf potensialını müəyyən edən əsas amillərdəndir. YAP-ın ictimai dayaqlarının genişlənməsi də məhz bu ənənələrin qorunması, yeni ideyaların dəstəklənməsi və xalqla canlı əlaqələrin davam etdirilməsi ilə bağlıdır.
Yeni Azərbaycan Partiyasının 34 illik tarixi xalqın etimadından doğan siyasi birliyin zamanın sınaqlarından keçərək güclü dövlətçilik ənənəsinə çevrilməsinin nümunəsidir. Ulu Öndər Heydər Əliyevin müəyyən etdiyi ideoloji və siyasi xəttə sadiqlik, Prezident İlham Əliyevin rəhbərliyi ilə qarşıya qoyulan hədəflərə doğru inamlı irəliləyiş və partiya üzvlərinin fədakar fəaliyyəti bu birliyin əsas dayaqlarıdır. YAP-ın xalqın partiyası kimi qazandığı mövqe onun tarixi keçmişinin deyil, bu gün gördüyü işlərin və Azərbaycanın gələcəyinə yönəlmiş siyasi məsuliyyətinin də ifadəsidir.
Xudaverdi Piriyev,
Təqaüddə olan təhsil işçisi, YAP fəalı