Salyan səhiyyə işçiləri sağlamlığın qorunması naminə qripə qarşı peyvənd olundular
2026–2027-ci illərin payız-qış mövsümü ilə əlaqədar ölkə üzrə qripə qarşı peyvəndləmə kampaniyası davam edir.
Mövsümi respirator virus infeksiyalarının yayılmasının qarşısının alınması məqsədilə həyata keçirilən kampaniya çərçivəsində Salyan Rayon Mərkəzi Xəstəxanasının Ailə Sağlamlıq Mərkəzində müəssisənin rəhbərliyi, şöbə və bölmə müdirləri, eləcə də digər əməkdaşlar qripə qarşı peyvənd olunublar.
Vaksinasiya zamanı Səhiyyə Nazirliyi tərəfindən ölkəyə gətirilən Niderland istehsalı olan «Influvac Tetra» dördlü qrip vaksinindən istifadə edilir.
Qripə qarşı peyvəndləmə səhiyyə işçiləri, hamilə qadınlar, 6 aydan yuxarı uşaqlar, 65 yaşdan yuxarı şəxslər və xroniki xəstəlikləri olan insanlar üçün xüsusilə tövsiyə olunur.
Unutmayaq ki, vaksinasiya qripdən qorunmağın və xəstəliyin ağırlaşma riskini azaltmağın mühüm yollarından biridir.
Qeyd: Qripə qarşı peyvəndləmə könüllülük prinsipi əsasında həyata keçirilir və tamamilə ödənişsizdir.
Sağlamlığınızı qoruyun, profilaktik tədbirlərə laqeyd yanaşmayın!



