Putinin Mehriban Əliyevaya təbrik məktubu: Bakı-Moskva əlaqələrində önəmli mərhələ

“Rusiya kimi böyük dövlətlə düşmənçilik etmək məqsədlərimizə adekvat deyil”

Rusiya Prezidenti Vladimir Putin Azərbaycanın Birinci vitse-prezidenti Mehriban Əliyevaya doğum günü münasibəti ilə təbrik məktubu ünvanlayıb. “Yeni Müsavat” xəbər verir ki, bu təbrik məktubu həm də Rusiya-Azərbaycan arasında əlaqələrin yüksək səviyyədə olduğunun isbatı sayıla bilər. Ümumiyyətlə, Prezident İlham Əliyevlə Putin şəxsi planda çox yaxındırlar və ikitərəfli görüşlərdə bunu görmək mümkündür.

Baxmayaraq ki, Rusiyanın ayrı-ayrı siyasətçilərinin çıxışları, Qarabağda sülhməramlı qüvvələrin zaman-zaman hərəkətləri bizi qane etmir. Lakin birinci şəxs - yəni Putin səviyyəsində indiyə qədər Azərbaycanı narazı salacaq hər hansı açıqlama, yaxud addım olmayıb. Putinin M.Əliyevanı ad günü ilə əlaqədar təbrik etməsi də göstərir ki, Moskva-Bakı arasında heç də deyildiyi qədər gərginlik yoxdur.

Hələ iki il əvvəl də Rusiya elitası M.Əliyevaya Moskva səfərində yüksək səviyyəli münasibət göstərmişdi. O sırada fəxri qarovulun düzülməsi, naməlum əsgərin abidəsinin ziyarət olunması xüsusi qiymətləndirilən dövlətlərə, onların təmsilçilərinə verilən bir protokol hadisəsi idi. Rusiya liderinin onu “Dostluq” ordeni ilə təltif etməsi də beynəlxalq aləmə nümayiş etdirilən ciddi mesaj kimi qiymətləndirilmişdi. Bu dəfə də Putin diqqətini əsirgəmədi və bu, Azərbaycan - Rusiya əlaqələrinin hamar olmasa da, ən yüksək səviyyəli şəxslər statusunda kifayət qədər rəvan olduğunu nümayiş etdirir. Xüsusən də 44 günlük müharibəyə Putinin yanaşması, döyüşlərin Azərbaycan ərazisində getdiyini söyləməsi rəsmi Bakını qane edən mövqe idi. 10 noyabrdan sonra keçirilən görüşlər də təsdiqləyir ki, liderlər arasında münasibətlərdə heç bir anlaşmazlıq yoxdur. Bəs siyasət adamları necə düşünür? Putinin M.Əliyevaya doğum günü məktubu həm də siyasi çalar və əhəmiyyət daşıyırmı?

Fəzail Ağamalı: “Bu təbrik Putinlə cənab Prezident və Mehriban xanım arasında xoş münasibətlərin mövcud olduğunu təsdiqləyir”

Ana Vətən Partiyasının sədri, deputat Fəzail Ağamalı “Yeni Müsavat”a bildirdi ki, Putinlə Prezident İlham Əliyev arasında yüksək səviyyəli dostluq münasibətləri mövcuddur. Onun sözlərinə görə, biri digərinə qarşılıqlı hörmətlə yanaşırlar. F.Ağamalı hesab edir ki, bugünkü Azərbaycan-Rusiya əlaqələrinin bizi təmin edən səviyyəsi müəyyən çatışmazlıqlara baxmayaraq, məhz bu münasibətlərə söykənir: “İki lider arasında əlaqələr həm də dövlətlərarası dostluq münasibətlərinin qorunub saxlanmasında mühüm rol oynayır. Eyni zamanda, Mehriban xanım beynəlxalq səviyyədə tanınan rəğbətlə qarşılanan ictimai-siyasi xadimdir. Cənab İlham Əliyev 2003-cü ildə xalqın etimadını qazandıqdan sonra Mehriban xanım da onunla bərabər olub, Azərbaycan mədəniyyətinin dünya miqyasında tanınmasında xüsusi fəaliyyət göstərib. Həmçinin, dünyada humanist layihələrin həyata keçməsində əməyi olub. Mehriban xanım Avropa və başqa bölgələrdə ciddi layihələr həyata keçirib. Həmçinin, Rusiya siyasi elitasında, Putin səviyyəsində hörmətlə qəbul olunur”.

Deputat qeyd etdi ki, M.Əliyeva Rusiyanın ali mükafatı ilə təltif olunub, doğum günü məktubu isə bir daha səmimi fikirləri göstərirdi: “Bu təbrik Putinlə cənab Prezident və Mehriban xanım arasında xoş münasibətlərin mövcud olduğunu təsdiqləyir. Ona görə də əlbəttə ki, alqışlanmalıdır. Çünki bu, Putinin mövqeyidir. Rusiya prezidentinin Dağlıq Qarabağın Azərbaycanın ərazisi olduğunu deməsi də məsələyə nöqtə qoymuşdu. Lakin Rusiyanın strateji hədəfləri, dövlət maraqları var. Etiraf edək ki, hər şey Putindən asılı deyil. Bir ”dərin dövlət" kimi I Pyotrdan bu günə qədər hakimiyyətdə kimin olmasından asılı olmayaraq, Rusiyanın maraqları var. Təbii ki, Rusiyanın bölgədə də böyük maraqları var, öz strateji mövqelərini müdafiə edir və ən müxtəlif kombinasiyalarla reallaşdırmağa çalışır. Biz çalışırıq ki, onların maraqları Azərbaycanın dövlət maraqlarına ziyan gətirməsin. Bu, dünya miqyasında da belədir. Dəfələrlə söyləmişəm, bu gün də tərəfdarıyam ki, Rusiya ilə möhkəm dostluq və mehriban qonşuluq əlaqələrinin qorunmasına çalışmalıyıq. Rusiya kimi böyük dövlətlə düşmənçilik etmək məqsədlərimizə adekvat deyil. Rusiyada müəyyən dairələr istəyirlər ki, sovet imperiyasının sərhədlərini bərpa etsinlər. Ancaq bu gün diplomatik müstəvidə mübarizə gedir və Azərbaycanın itirdiklərini geri qaytarmaq mərhələsi başlayıb".