"Xocavənd rayonunun Hadrut qəsəbəsinə ilk köçün baş tutması Azərbaycan tarixinin ən önəmli hadisələrindən biridir. Uzun illər işğal altında qalan bu qədim torpaqlarımıza sakinlərimizin geri dönüşü dövlətimizin həyata keçirdiyi “Böyük Qayıdış” siyasətinin real nəticəsidir. Bu, Prezident İlham Əliyevin qətiyyətli siyasi iradəsinin, dövlətimizin gücünün, xalqımızın böyük zəfərinin təntənəsidir".
Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədr müavini Günay Ağamalı Xocavənd rayonunun Hadrut qəsəbəsinə ilk köçdən və Prezident İlham Əliyevin səfər zamanı səsləndirdiyi fikirlərdən danışarkən bildirdi.
"Prezidentin Hadrut qəsəbəsinə səfəri və burada söylədiyi fikirlər bir daha təsdiq etdi ki, Azərbaycanın hər bir azad olunmuş guşəsində həyat bərpa olunur, xalqımızın firavan yaşayışı üçün bütün şərait yaradılır. Ölkə başçımızın vurğuladığı kimi, son beş ilin tarixi Zəfər tarixidir, şanlı tariximizdir. Azərbaycan post-münaqişə dövründə keçmiş Qarabağ münaqişəsinin ölkəmizin ərazi bütövlüyü, suverenliyi və ədalət prinsipləri əsasında sülh yolu ilə həll edilməsi üçün zəruri olan bütün diplomatik təşəbbüsləri irəli sürmüşdü. Lakin bir çox siyasi təşkilatların, eyni zamanda vasitəçi tərəflərin qərəzli, qeyri-obeyktiv və işğalı stimullaşdıran ritorikası səbəbindən ölkəmiz tarixi ədaləti məhz hərbi gücün tətbiqi ilə reallaşdırdı. Bu mənada Hadrutun azad olunması Vətən müharibəsində strateji dönüş nöqtələrindən biri kimi qəbul edilir. Hadrutun geri alınması Şuşaya açılan qapı idi və qəhrəman əsgər və zabitlərimizin şücaəti ilə biz bütün ali məqsədlərimizə çatdıq. Bu gün Hadrutda yeni evlər, sosial infrastruktur, müasir kommunikasiya şəbəkələri qurulur".
Deputat əlavə etdi ki, ilk köçlə ailələrin doğma yurdlarına qayıtması həm tarixi ədalətin bərpası, həm də milli ruhumuzun gücünün göstəricisidir:
"Bu hadisə eyni zamanda bütün köçkünlərimiz üçün böyük ümid və qürur mənbəyidir. Azərbaycan dövləti ardıcıl siyasəti ilə sübut edir ki, azad edilmiş torpaqlarımızda həyat yenidən canlanır. Qarabağ və Şərqi Zəngəzur yaxın illərdə ölkəmizin ən inkişaf etmiş bölgələrinə çevriləcək. Dövlətimizin başçısının Hadrutda səsləndirdiyi fikirlər də məhz bu strateji hədəfin bariz ifadəsidir. Hadrut köçü ilə yeni bir tarixi mərhələ başlanır. Bu mərhələ qayıdışın, dirçəlişin və Azərbaycanın əzəli torpaqlarında əbədi varlığının mərhələsidir", - deyə Günay Ağamalı yekunlaşdırdı.
