Minsk qrupunun ləğvi qərarı Azərbaycanın haqlı mövqeyinin qəbul edilməsi və yeni dövrün başlanğıcıdır ŞƏRH

Sentyabrın 1-də ATƏT Nazirlər Şurası tərəfindən Minsk Prosesi və əlaqəli institutların fəaliyyətinə xitam verilməsi mühüm siyasi qərardır. Bu addım uzun illər boyu səmərəsiz fəaliyyət göstərən və münaqişənin həllinə töhfə verməkdə aciz qalan mexanizmlərin artıq aktuallığını itirməsinin beynəlxalq miqyasda rəsmiləşdirilməsidir.

Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.

O bildirib ki, Azərbaycanın ərazi bütövlüyünün bərpası, işğal olunmuş torpaqlarımız üzərində nəzarətin təmin olunması, həmçinin Ermənistan-Azərbaycan münaqişəsinin tam həll edilməsi faktı beynəlxalq səviyyədə artıq danılmaz həqiqət kimi qəbul olunub. ATƏT-in bu qərarı məhz həmin reallığın beynəlxalq səviyyədə təsdiqi, Azərbaycanın haqlı mövqeyinin qəbul edilməsi və yeni dövrün başlanğıcıdır.

Avqustun 8-də Vaşinqtonda Prezident İlham Əliyevin, Ermənistanın Baş naziri Nikol Paşinyanın və ABŞ Prezidenti Donald Trampın iştirakı ilə keçirilmiş görüş çərçivəsində Azərbaycanın qoyduğu tələblərlə əldə olunmuş razılaşmaların praktik nəticəsi olaraq Minsk Prosesinin bağlanması sülh gündəliyinin reallaşdırılması yolunda mühüm bir addımdır. Bu, həm də onu göstərir ki, Azərbaycan regionda sülhün təşəbbüskarı və təminatçısıdır.

“İkinci Qarabağ müharibəsindən sonra Minsk qrupunun fəaliyyəti üçün hüquqi əsas formalaşdıran bütün məsələlər məhz Azərbaycanın hərbi-siyasi qərarları fonunda öz həllini tapdı. Lakin atəşkəs dövründə Minsk üçlüsü BMT Təhlükəsizlik Şurasının Azərbaycan ərazilərinin Ermənistan tərəfindən işğalını tanıyan və erməni silahlı birləşmələrinin həmin ərazilərdən dərhal çıxarılmasını tələb edən qətnamələrinin həlli istiqamətində hər hansı bir təşəbbüskarlıq irəli sürmədi. Əksinə, bu müddət ərzində konfliktin həlli ilə bağlı hüquqi çərçivə formalaşdırmaq yerinə, status-kvonu qoruyub saxlamağa xidmət edən yanaşmalar sərgiləndi. Belə olduğu təqdirdə rəsmi Bakının qurumun fəaliyyətini sonlandırmaqla əlaqədar prinsipial mövqeyi məhz yeni reallıqlar fonunda ənənəvi narrativləri gündəmə gətirmək cəhdlərinin qarşısını aldı.

Artıq Azərbaycan və Ermənistan arasında münasibətlərin normallaşması üçün hüquqi baza yaradılıb. İndi əsas məsələ sülh sazişinin imzalanması, sərhədlərin delimitasiyası və kommunikasiya xətlərinin açılmasıdır. Bu istiqamətdə Azərbaycan öz prinsipial mövqeyini qoruyur və ardıcıl addımlar atır.

Ölkəmiz hər zaman beynəlxalq hüququn norma və prinsiplərinə əsaslanıb. Qəbul edilmiş qərar da göstərir ki, dövlətimizin qətiyyətli mövqeyi, Prezident İlham Əliyevin uzaqgörən siyasəti nəticəsində 30 ildən artıq davam edən münaqişəyə son qoyulub və bölgədə yeni reallıq yaranıb. Azərbaycan bundan sonra da regionda sülhün, təhlükəsizliyin və davamlı inkişafın təmin edilməsi üçün bütün beynəlxalq platformalarda fəal iştirak edəcək”, - deyə deputat vurğulayıb.