Xankəndidən qlobal arenaya: Azərbaycanın yeni media strategiyası

Son illər ərzində Azərbaycan yalnız iqtisadi inkişaf göstəriciləri ilə deyil, həm də siyasi sabitlik, müasir ordu quruculuğu və müstəqil xarici siyasəti ilə regionda lider mövqeyini möhkəmləndirib. Prezident İlham Əliyevin rəhbərliyi ilə həyata keçirilən çoxşaxəli diplomatik strategiya sayəsində ölkəmiz bir tərəfdən Avropa İttifaqı ilə enerji təhlükəsizliyi sahəsində tərəfdaşlığını dərinləşdirir, digər tərəfdən Türkiyə ilə strateji müttəfiqliyi daha da gücləndirərək Türk Dövlətləri Təşkilatında yeni güc mərkəzinin formalaşmasında mühüm rol oynayır.

Azərbaycanın eyni zamanda Çinlə Orta Dəhliz layihəsində fəal iştirakı və COP29 kimi qlobal tədbirlərə ev sahibliyi etməsi onu beynəlxalq arenada etibarlı tərəfdaş, qlobal problemlərin həllində isə konstruktiv aktor kimi tanıdır. Bu strateji uğurlar fonunda informasiya siyasəti və media sahəsində atılan addımlar da diqqət çəkir – çünki dövlətin yumşaq güc potensialının əsas dayaqlarından biri məhz mediaya əsaslanan diplomatik platformalardır.

Bu kontekstdə işğaldan azad olunmuş Xankəndi şəhərində III Şuşa Qlobal Media Forumunun keçirilməsi təkcə beynəlxalq tədbir deyil, həm də Azərbaycanın geosiyasi və informasiya nüfuzunun göstəricisidir.

Mövzu ilə bağlı Bakıvaxtı.az-a danışan Milli Məclisin deputatı Günay Ağamalı bildirib ki, Azərbaycan siyasi sabitliyi, müasir ordusu və müstəqil xarici siyasəti ilə Cənubi Qafqaz regionun lider dövləti olaraq beynəlxalq müstəvidə öz nüfuzunu artırmaqdadır:

"Cənab Prezident İlham Əliyev tərəfindən uğurla davam etdirilən çoxvektorlu xarici siyasət strategiyası nəticəsində ölkəmiz Avropa İttifaqı ilə enerji tərəfdaşlığını genişləndirir, Türkiyə ilə müttəfiqlik münasibətlərini inkişaf etdirməklə Türk Dövlətləri Təşkilatı çərçivəsində yeni bir güc mərkəzinin institusionallaşmasında aktivlik nümayiş etdirir, Çinin Orta Dəhliz təşəbbüsündə fəal rol oynayır və COP 29 kimi beynəlxalq səviyyəli tədbirlərə ev sahibliyi etməklə ümumbəşəri problemlərə öz töhfəsini verir. Təbii ki, ölkə rəhbərinin uğurlu diplomatik missiyası davam edir və hər birimiz Azərbaycanın ard-arda mötəbər tədbirləri keçirməsinin qürurunu yaşayırıq. İşğaldan azad olunmuş Xankəndi şəhərində III Şuşa Qlobal Media Forumunun keçirilməsi bir daha ölkəmizin qlobal arenada, onun informasiya mühitində yüksələn rolunun təsdiqidir".

Günay Ağamalı, Milli Məclisin deputatı

Parlament üzvü onu da əlavə edib ki,İlham Əliyevin Forumun açılış mərasimindəki çıxışı, dövlətin media siyasətinə baxışlarını, regionun geosiyasi reallıqlarını, mövcud reallıqlar fonunda informasiya təhlükəsizliyinin əhəmiyyətini və Azərbaycanın qlobal media sahəsindəki rolunu əks etdirdi: 

"Məlum olduğu kimi, Şuşa Qlobal Media Forumu diplomatik inkişafa xidmət edən bir platformadır. Forum müxtəlif ölkələrdən media nümayəndələrini bir araya gətirməklə fikir mübadiləsinə şərait yaradır və qarşılıqlı etimadı gücləndirir. Bu kimi əhəmiyyətli tədbirin Xankəndi şəhərində keçirilməsi Azərbaycanın öz mədəni irsini təbliğ etmək, sülh gündəliyinə sadiqliyini və regional istiqrara verdiyi əhəmiyyəti göstərmək kontekstində yumşaq gücün tətbiqi kimi qiymətləndirilməlidir. Çıxışı zamanı medianın insanları maarifləndirməkdə və prosesləri işiqlandırmaqda oynadığı rolu xususi olaraq qeyd edən ölkə rəhbəri Azərbaycan mediasının inkişafından məmnunluğunu vurğuladı".

Son olaraq G.Ağamalı vurğulayıb ki, Cənab Prezident İlham Əliyevin qeyd etdiyi kimi "Bu gün Azərbaycan mediası dövlət maraqlarını qorumağa qadirdir. Azərbaycana qarşı əsassız ittihamları arqumentlərlə, ciddi təhlillə və faktlar əsasında ifşa etməkdə də böyük uğurlar əldə edib. Bizim mediamız nəinki dövlət maraqlarını müdafiə edir, eyni zamanda, lazım gəldikdə hücuma da keçir." Bütün bunlar Azərbaycanın informasiya siyasətinin düzgünlüyünün və dövlətin media nümayəndələrinə göstərdiyi qayğının təzahürüdür.