"Qalib xalqın ordusu – qürurumuzun Zəfər Paradı"

Azərbaycan xalqı üçün 26 İyun – Silahlı Qüvvələr Günü sadəcə bir bayram deyil, dövlət müstəqilliyimizin qorunmasının və xalqımızın şanlı tarixinin canlı rəmzidir. Bu gün, ölkəmizin hərbi qüdrətini, ordu quruculuğunda qazanılmış nailiyyətləri və ən əsası – Vətənə olan sevgi və sədaqətin təntənəsini əks etdirən bir gündür. Bu bayram 1998-ci ildə Ulu Öndər Heydər Əliyevin fərmanı ilə dövlət səviyyəsində qeyd olunmağa başlanmış və hər il daha böyük ruh yüksəkliyi ilə qarşılanmışdır.
Ulu Öndər Heydər Əliyev hər zaman ordunun dövlətin dayağı olduğunu vurğulayırdı:
“Biz müstəqil dövlətik, bizim müstəqil dövlətimizin güclü ordusu olmalıdır.” Bu ideya onun dövlətçilik fəlsəfəsinin əsas sütunlarından birinə çevrilmişdir. Məhz Ulu Öndərin rəhbərliyi ilə Azərbaycanda peşəkar, müasir ordu quruculuğunun bünövrəsi qoyulmuşdur. Bu siyasət bu gün Prezident cənab İlham Əliyev tərəfindən uğurla davam etdirilir.
Azərbaycan Respublikasının Prezidenti, Ali Baş Komandan İlham Əliyevin rəhbərliyi ilə 2020-ci ildə baş verən 44 günlük Vətən müharibəsi ordumuzun gücünü və xalqımızın iradəsini bütün dünyaya göstərdi. İşğal altında olan torpaqlarımız bir-bir azad edildi, Ermənistanın 30 illik təcavüzünə son qoyuldu. Bu tarixi qələbə yalnız hərbi sahədə deyil, siyasi və mənəvi arenada da böyük uğur idi.
2020-ci il dekabrın 10-da Bakının Azadlıq meydanında keçirilmiş Zəfər Paradı bu böyük qələbənin möhtəşəm təntənəsi idi. Paradda 3000-ə yaxın hərbçi iştirak etdi, 100-dən artıq hərbi texnika nümayiş olundu. İşğaldan azad edilmiş torpaqların adları meydanı dolaşan texnikaların üzərində yazılmışdı – Cəbrayıl, Füzuli, Zəngilan, Qubadlı, Şuşa... Bu mənzərə təkcə bir paraddan ibarət deyildi – bu, tarixin canlı təcəssümü idi. Prezident İlham Əliyev Zəfər Paradında çıxışı zamanı bildirdi: “Biz bu Qələbəni döyüş meydanında qazandıq. Bu, tarixi ədalətin bərpasıdır.” Bu sözlər həm hərbi, həm də siyasi iradənin nəticəsini əks etdirirdi. Azərbaycan xalqı öz haqqını, öz torpaqlarını, öz gələcəyini özü təmin etdi. Ən əsası – bu qələbə xalq-ordu-dövlət birliyinin bəhrəsi idi.
Zəfər Paradının beynəlxalq və mənəvi əhəmiyyətini daha da artıran əsas məqamlardan biri də qardaş Türkiyə Respublikasının Prezidenti Rəcəb Tayyib Ərdoğanın bu tədbirdə iştirak etməsi oldu. Bu, Azərbaycan-Türkiyə birliyinin, ortaq dəyərlərimizin, ortaq sevincimizin və ortaq qələbəmizin rəmzi idi. Prezident İlham Əliyev bu barədə bildirmişdi: “Bu gün dünya bir daha gördü ki, Türkiyə və Azərbaycan bir millət, iki dövlətdir. Bu birliyin sarsılmaz təməlləri var.” Türkiyəli hərbçilərin də parada qatılması, iki dövlətin bayraqlarının yanaşı dalğalanması həm tarixi mirasımızın, həm də gələcək hədəflərimizin bir olduğunu dünyaya göstərdi. Bu həm də Azərbaycan xalqının tək olmadığını, haqq və ədalət naminə mübarizədə dəstəkləndiyini sübut etdi.
Zəfər Paradı həm də müqəddəs şəhidlərin ruhuna ehtiramın rəmzi idi. Onların hər biri bu qələbənin memarlarıdır. Hər şəhidin canı, hər qazinin qanı bu vətənin azadlığı üçün axıdılıb. Ulu Öndərin dediyi kimi: “Şəhidlər ölməz, Vətən bölünməz!”. Hər bir Azərbaycan vətəndaşı üçün bu ifadə bir and, bir amal, bir vicdan borcudur. Bizim zəfərimizin əsasında şəhidlərin qəhrəmanlığı, ailələrinin fədakarlığı, qazilərin iradəsi və xalqımızın birliyi dayanır.
Bu gün Azərbaycan Ordusu regionun ən güclü ordularından biridir. Ordumuz müasir texnika, yüksək döyüş qabiliyyəti və ruh yüksəkliyi ilə fərqlənir. Orduya olan ictimai inam və etimad, onun inkişafına ayrılan diqqət və dəstək hər bir vətəndaşda fəxarət hissi yaradır. Prezident İlham Əliyevin dediyi kimi: “Əgər xalq öz liderinin ətrafında birləşirsə, əgər xalq öz ordusuna güvənirsə, əgər ordu da Vətəni canı, qanı bahasına müdafiə etməyə hazırdırsa – o xalqı heç bir qüvvə məğlub edə bilməz.” Bu sözlər yalnız bir qələbənin deyil, dövlət siyasətinin, milli ruhun və strateji baxışın bəyanıdır.
Bir sözlə, Zəfər Paradı tariximizin ən parlaq səhifələrindən biridir. Bu, gücün, həmrəyliyin, şəhidlərə ehtiramın, dostluğun və qardaşlığın nümayişidir. 26 İyun – Silahlı Qüvvələr Günü ilə eyni ruhda qeyd olunan bu parad Azərbaycan xalqının yaddaşında daim qürurla xatırlanacaq. Biz Zəfərin nə olduğunu tarixə öz əlimizlə yazdıq. İndi isə bu zəfəri qorumaq, gələcək nəsillərə çatdırmaq bizim müqəddəs borcumuzdur.

Nəcəf Kərimov,
Salyan rayon Kərimbəyli kənd İƏD üzrə nümayəndənin müavini,
Vətən müharibəsi iştirakçısı, YAP fəalı