“Azərbaycan” məhəlləsi birliyin möhkəm təməl üzərində qurulduğunun daha bir göstəricisidir ŞƏRH

Azərbaycan və Türkiyə arasında əsrlərə dayanan dostluq, qardaşlıq və strateji müttəfiqlik münasibətləri hər bir sahədə özünü açıq şəkildə göstərməkdədir. Xalqlarımızı birləşdirən bu sarsılmaz bağlar istər sevinc, istərsə də ağır günlərdə daha da güclənib, ölkələrimiz bir-birinə daim dayaq olublar. 2023-cü ilin fevral ayında qardaş ölkədə baş verən dağıdıcı zəlzələ zamanı Azərbaycan dövləti və xalqı dərhal səfərbər olaraq Türkiyənin yanında oldu, yardım göndərdi, xilasedicilər, tibb qrupları və bərpa heyətləri hadisə yerinə cəlb olundu. Bu qardaşlıq nümunəsinin davamı olaraq Kahramanmaraşda inşa edilmiş “Azərbaycan” məhəlləsinin açılış mərasimi və bu mərasimdə Prezident İlham Əliyevin iştirakı Azərbaycan-Türkiyə birliyinin möhkəm təməl üzərində qurulduğunun daha bir aydın göstəricisidir.

Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.

O bildirib ki, “Azərbaycan” məhəlləsi zəlzələdən zərər çəkmiş ailələr üçün təhlükəsiz, müasir və rahat yaşayış şəraiti yaratmaqla yanaşı, həm də dostluğumuzun əbədiyaşarlığını simvolizə edən unikal təşəbbüsdür. Kahramanmaraşda binalarla yanaşı, eyni zamanda, mərhəmət, sədaqət və humanizm inşa olunub. Bu addım xalqlarımızın qardaşlıq münasibətinin təzahürü, Azərbaycan dövlətinin Türkiyəyə verdiyi dəstəyin təcəssümüdür.

“Prezident İlham Əliyevin “Azərbaycan” məhəlləsinin açılışında şəxsən iştirak etməsi bu hadisəni daha dəyərli və yaddaqalan etdi. Dövlətimizin başçısının çıxışı zamanı səsləndirdiyi “Azərbaycan hər zaman Türkiyənin yanında olub, Türkiyə də hər zaman Azərbaycanın yanında olub" fikirləri xalqlarımızın birliyinin zaman və məkan tanımadığını, istənilən şəraitdə bir-birimizə arxa-dayaq olduğunu bir daha təsdiq etdi.

Bu mərasim, eyni zamanda, Türk dünyası daxilində həmrəyliyin möhkəmləndirilməsi, regional təhlükəsizlik və sosial-siyasi sabitliyin qorunmasına yönəlmiş ortaq iradənin göstəricisi kimi də dəyərləndirilməlidir. Azərbaycan-Türkiyə münasibətləri yalnız ikitərəfli deyil, həm də Türk dövlətləri üçün nümunəvi bir model təşkil edir. Azərbaycan məhəlləsinin açılışı bu modelin gerçək təməli üzərində yüksəldiyini, qardaşlıq dəyərlərinin təkcə sözlə deyil, əməli fəaliyyətlərlə yaşadıldığını göstərir. Qürurla deyə bilərik ki, bu gün Azərbaycan və Türkiyə münasibətləri təkcə diplomatik və siyasi deyil, xalq-dövlət birliyi, humanizm və tarixi yaddaş müstəvisində də bənzərsiz səviyyəyə çatıb. Azərbaycan məhəlləsinin açılışı bu baxımdan həm unudulmaz bir humanitar jest, həm də strateji əməkdaşlığın həyatın hər sahəsinə nüfuz etdiyinin bariz təzahürüdür. Azərbaycan və Türkiyə tək millət, iki dövlət olaraq gələcəkdə də bir-birinin yanında olmağa, ortaq dəyərləri birlikdə yaşatmağa davam edəcək”, - deyə G.Ağamalı vurğulayıb.