15 İyun – Bir Millətin Qurtuluş Manifesti

Bəzən bir an gəlir ki, xalq ayağa qalxmasa, dövlət çökər. Bəzən bir lider gəlir ki, xalqın ruhuna nəfəs, qəlbinə ümman, gələcəyinə yol olur.
Azərbaycanın müasir tarixində 15 İyun – Milli Qurtuluş Günü məhz bu anla, bu liderlə yadda qaldı. Bu tarix xalqla liderin birləşdiyi, millətin taleyinə sahib çıxdığı gündür. Bu, dirçəlişin, sabaha dönən iradənin tarixidir.
1993-cü ilin yayında Azərbaycanın üzərini qaranlıq buludlar bürümüşdü. Dövlət süqutun bir addımlığında, xalq ümidsizlik içində, meydanlar xaosun səsinə bürünmüşdü. Silahların səsi məktəblərin zəngini, xəstəxanaların sükutunu, parlamentin qanununu üstələmişdi. İtirilən sadəcə ərazi yox, inam, ruh, gələcək idi.
O anlarda xalqın dili susmuşdu, amma ümidinin adı vardı – Heydər Əliyev.
Əslində, o ad sadəcə bir insan adı deyildi – bir məktəb idi, bir siyasət fəlsəfəsi, bir dövlətçilik dərsi idi.
Ulu Öndər Bakıya qayıdanda paytaxtda da, bölgələrdə də bir təskinlik vardı. İnsanlar sanki gözlərinə yox, qəlblərinə inanaraq sevinirdi. Çünki gələn – xalqın inandığı, təcrübə ilə zamanın sınağından keçmiş, dövlətçiliyi öz nəfəsi ilə yaşadan bir lider idi.
O gün Milli Məclisdə səslənən səs təkcə bir deputatın danışığı deyildi – Azərbaycanın tarixə dönən qüruru danışırdı.
Heydər Əliyev dövlətin sükanına keçdiyi gündən etibarən ölkədə sabitlik yarandı, iqtisadi iflas dayanmağa başladı, ordu formalaşdı, diplomatik mövqelər möhkəmləndi. Və ən əsası – xalq özünə, bayrağına, dövlətinə yenidən inandı.
Bu gün Azərbaycan dünya siyasi səhnəsində etibarlı tərəfdaşdırsa, Qarabağda zəfər çalınıbsa, ölkə inkişaf və sabitlik adası kimi tanınırsa – bu, 15 İyunun mirasıdır.
Qurtuluş sadəcə bir dönüş nöqtəsi deyil, xalqın iradəsinin təntənəsi, liderə inamın zəfəri, müstəqilliyə sadiqliyin ifadəsidir.
Bugün Ulu Öndərin siyasi irsini Prezident İlham Əliyev dəmir iradə və strateji uzaqgörənliklə davam etdirir. O yolun sonu Qarabağ Zəfəri oldu, əbədi Zəfərin astanası oldu. Ulu Öndərin "Qarabağ Azərbaycandır!" çağırışı dövlətin ideoloji sütununa çevrildi, bu gün isə təntənəli gerçəkliyimizdir.
Azərbaycan bu gün təkcə özünü deyil, bölgəni dəyişir. Bütün bunlar 15 İyunun ruhuna, təməl daşına söykənir.
Qurtuluş – bir millətin yenidən doğulmasıdır.
Qurtuluş – xalqla liderin bir ruh olmasıdır.
Qurtuluş – sabaha yazılmış ümidin adıdır.

15 İyun bizə öyrətdi ki:

Dövlətin sahibi xalqdır, amma o xalq liderinə güvənmədikcə sabah olmur.
Müstəqillik bir imza ilə qazanıla bilər, amma onu qorumaq üçün can, ruh və iradə gərəkdir.
Azərbaycan tarixində xalqa arxa dayaq olan liderlər heç vaxt unudulmur – çünki onların adı zaman deyilən kitabın ən şərəfli səhifələrində yazılır.
Bu gün biz Ulu Öndərin qoyduğu yolda inamla irəliləyirik. Azərbaycanın hər bir qələbəsi, hər bir uğuru – o müqəddəs Qurtuluşun bəhrəsidir. Qoy bu müqəddəs tarix daim xalqımızın düşüncəsində, dövlətimizin yaddaşında yaşasın!

Yaşasın 15 İyun – Milli Qurtuluş Günü!
Yaşasın Ulu Öndərin ideyaları, yaşasın Müstəqil Azərbaycan!

Aygül Bağırova 
15.06.2025