Salyanda "Konstitusiya və Suverenlik ili"nə həsr edilmiş güllə atıcılığı idman növü üzrə rayon birinciliyi keçirilib

18 may 2025-ci il tarixində Salyan Rayon İcra Hakimiyyətinin, Yeni Azərbaycan Partiyası Salyan Rayon Təşkilatının, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun, Şirvan-Salyan Regional Təhsil İdarəsinin Salyan rayonu üzrə Təhsil sektorunun və Salyan Atıcılıq klubunun birgə təşkilatçılığı ilə "Konstitusiya və Suverenlik ili"nə həsr edilmiş orta ümumtəhsil məktəblərinin IX-XI sinif oğlan və qız şagirdləri arasında güllə atıcılığı idman növü üzrə rayon birinciliyi keçirilib. Salyan şəhər 2 saylı tam orta məktəbin atıcılıq tirində keçirilən tədbirdə ilk öncə Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.
Tədbirdə Salyan Rayon İcra Hakimiyyətinin ictimai-siyasi və humanitar məsələlər şöbəsinin müdir müavini Məhərrəm Məmmədov, Yeni Azərbaycan Partiyası Salyan rayon təşkilatının sədr müavini Aqşin Babayev, Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun baş məsləhətçisi Əlişir Əliyev və Salyan Atıcılıq klubunun məşqçi-müəllimi İsa Əliyev çıxış edərək bildiriblər ki, 2025-ci ilin “Konstitusiya və Suverenlik ili” elan olunması ölkəmizin dövlətçilik tarixinin mühüm mərhələlərinin daha dərindən öyrənilməsi, vətəndaşların, xüsusən də gənclərin milli dəyərlərə, hüquqi biliklərə və dövlətə bağlılıq ruhunda tərbiyə olunması baxımından xüsusi əhəmiyyət daşıyır. Bu kimi idman tədbirləri isə gənclərin fiziki və mənəvi inkişafına, sağlam həyat tərzinin təbliğinə xidmət edir. Qeyd olunub ki, Prezident İlham Əliyevin rəhbərliyi ilə ölkəmizdə idmanın bütün növlərinə, o cümlədən güllə atıcılığına göstərilən diqqət və qayğı nəticəsində bu sahə dinamik inkişaf etməkdədir. Bu cür yarışlar həm gənc nəslin idmana marağının artırılmasına, həm də onların peşəkar idmançılar kimi formalaşmasına şərait yaradır. Çıxış edənlər yarışda iştirak edən bütün şagirdlərə uğurlar arzulayıb, onlara gələcək fəaliyyətlərində uğurlar diləyib və bu cür tədbirlərin mütəmadi təşkil olunmasının vacibliyini vurğulayıblar.
Çıxışlardan sonra iştirakçılara yarışın qaydaları izah edilib və birinciliyə start verilib. Maraqlı və gərgin mübarizə şəraitində keçən birincilikdə qızlar arasında III yerə Nağıyeva Gülər (Salyan rayon Kürqaraqaşlı kənd tam orta məktəb), II yerə Mustafayeva Həvva (Salyan şəhər 7 nömrəli məktəb-lisey), I yerə Ataşova Zeynəb (Salyan rayon Yenikənd kənd tam orta məktəb), oğlanlar arasında isə III yerə Hüseynzadə Əlibəy (Salyan rayon Arbatan kənd tam orta məktəb), II yerə İlyasov Yəhya (Salyan rayon Yenikənd kənd tam orta məktəb), I yerə Rüstəmli Saleh (Salyan şəhər 9 nömrəli tam orta məktəb) layiq görülüblər. Qaliblər Şirvan-Salyan Regional Gənclər və İdman İdarəsinin diplomları ilə təltif olunub.