Deputat:Azərbaycan Türkmənistan arasında qardaşlıq münasibətlərinin inkişafında parlamentlərin də mühüm rolu danılmazdır.

Azərbaycan Respublikası ilə Türkmənistan arasında diplomatik münasibətlərin yaranmasının 30 illiyilə münasibətilə Türkmənistan XİN-nin Beynəlxalq Münasibətlər İnstitutu və ADA Universitetinin birgə telemostu keçirildi. Yüksək səviyyədə təşkil olunan telemostda Azərbaycan-Tükrmənistan Parlamentlərarası dostluq qrupunun sədri kimi cıxış etdim.

Hörmətli, cənab səfir Mekan İşankuliyev, cənab səfir Həsən Zeynalov və konfrans iştirakçıları, hamınızı böyük məmnuniyyətlə salamlayıram.

İlk növbədə Türkmənistanın Azərbaycan respublikasındakı Böyük elçisi cənab Mekan İşankuliyevə dəvətə görə təşəkkür edir, iki qardaş ölkə arasında diplomatik münasibətlərin yaradılmasının 30 illiyi ilə bağlı xalqlarımızı təbrik edir, birgə fəaliyyətimizdə uğurlar arzulayıram.

Azərbaycanla Türkmənistan arasında diplomatik əlaqəlar 1992-ci il iyunun 9-da yaradılmışdır. İki qardaş dövlətlər arasında rəsmi münasibətlərin təməlinin qoyulması mərhum Ulu Öndər Heydər Əliyev və mərhum Saparmurad Niyazovun adları ilə bağlıdır.

1993-cü il dekabrında Aşğabadda keçirilən MDB üzv ölkələri başçılarının toplantısı səviyyəsində Azərbaycan Respublikasının prezidenti Heydər Əliyev Türkmənistanın prezidenti Saparmurad Niyazov arasında ilk görüşdə hər iki ölkənin maraq doğurduğu məsələlər ətrafında geniş fikir mübadiləsi aparılmış, 1994-cü ilin oktyabrında H.Əliyev Türkmənistanın müstəqillik günü münasibətilə keçirilən tədbirdə iştirak etmişdir. 1996-cı ilin martında isə Türkmənistan prezidenti Saparmurad Niyazov Azərbaycana rəsmi səfər etmiş və bu səfər zamanı Bakı Bəyannaməsi və bir sıra rəsmi sənədlər imzalanmışdır.

Sonrakı illərdə də ayrı-ayrı beynəlxalq tədbirlərdə H.Əliyevlə S.Niyazov arasında görüşlər keçirilmiş, münasibətlərimizin inkişafı üçün əhəmiyyətli addımlar atılmışdır.

Xəzər dənizinin hüquqi statusu və milli sektorların sərhədlərilə bağlı ölkələrimiz arasında olan fikir ayrılığı tədricən aradan qalxmış və 2008-ci ilin mayında Türkmənistan prezidenti cənab Qurbanqulu Berdimühəmmədovun Azərbayacana ilk rəsmi səfərə gəlməsi və Azərbaycan prezidenti cənab İlham Əliyevlə təkbətək görüşü, görüş zamanı ikitərəfli əlaqələrin möhkəmləndirilməsinin zəruriliyi qeyd olunmuş, bir sıra sahələr üzrə sazişlər imzalanmışdır.

Sonrakı illərdə də prezidentlərin qarşılıqlı səfərləri münasibətlərimizin yüksək səviyyədə qurulmasında əhəmiyyətli rolunu oynamışdır. Bu baxımdan 2021-ci ilin yanvarında Azərbaycan Respublikası Hökuməti ilə Türkmənistan höküməti arasında Xəzər dənizində “Dostluq” yatağında korbohidrogen resuslarının birgə kəşfiyyatı, işlənməsi və mənimsənilməsi haqqında Anlaşma Memorandumunun imzalanması ilə bağlı Azərbaycan Respublikasının prezidenti İlham Əliyevlə Türkmənistan prezidenti  Qurbanqulu Berdiməhəmmədov arasında videokonfrans formatında keçirilən görüş xüsusi əhəmiyyət kəsb edir. Bu sənədin imzalanması ilə Xəzərdə Azərbaycanla Türkmənistanın energetika sahəsində əməkdaşlıq özünün yeni və üstün mərhələsinə daxil oldu.

Hazırda möhkəm hüquqi bazaya və iki qardaş xalqın maraqlarına söykənən münasibətlər yüksələn xətlə inkişaf etməkdədir. Əminəm ki, Türkmənistan xalqının böyük əksəriyyətinin etimadını qazanan Türkmənistanın yeni prezidenti cənab Sərdar Berdimühəmmədov dili bir, dini bir, soykökü bir iki doğma xalq arasında münasibətlərinin daha da möhkəmlənməsinə özünün əhəmiyyətli töhvəsini verəcəkdir.

Azərbaycan Türkmənistan arasında qardaşlıq münasibətlərinin inkişafında parlamentlərin də mühüm rolu danılmazdır. Etiraf edim ki, bu münasibətlər hələlik arzu etdiyimiz səviyyədə deyil. Çox istərdim ki, hər iki parlamentin dostluq qrupları əlaqələri daha sıx şəkildə qursun, qarşılıqlı səfərlərimiz sistemli xarakter daşısın. Bu baxımdan, böyük məmnuniyyətlə Qardaş Türkmənistan parlamentinin Azərbaycanla dostluq qrupunu bu ilin 2-ci yarısında Azərbaycana dəvət edirəm. Eyni zamanda bu əlaqələr müxtəlif platformalarda xalqlarımızın, xüsusilə gənclərimizin, vətəndaş cəmiyyətinin və media nümayəndələrinin, regionlarımızın qarşılıqlı səfərlərilə daha da genişlənməli və cəmiyyətlərimizin bütün tərəflərini əhatə etməlidir.

Fəzail Ağamalı,
Millət vəkili
Azərbaycan Türkmənistan Parlament dostluq qrupunun sədri