Bu gün artıq Azərbaycan digər ölkələr üçün vacib tranzit imkanlarını təqdim edir

  “ Bu gün  Azərbaycan digər ölkələr üçün vacib tranzit imkanlarını təqdim edir. Bu potensialdan da maksimum dərəcədə istifadə oluna bilər. Təəssüf ki, bu günədək bu potensialdan tam istifadə edilməyib, Azərbaycanın mühüm tranzit ölkəsi qismində potensialı təchizatçılar tərəfindən düzgün qiymətləndirilməyib. Hesab edirəm ki, bu gün artıq onlar fikirlərini dəyişiblər. Çünki hər kəs anlayır ki, şaxələndirmə enerji təhlükəsizliyinin başlıca amillərindəndir. Biz isə enerji strategiyamızın həyata keçirilməsinin ilk günündən etibarən şaxələndirmə üzərində çalışmışıq. Bunun nəticəsində bizim şaxələndirilmiş ixrac marşrutlarımız var – müxtəlif istiqamətə uzanan 3 neft boru kəməri və 4 qaz boru kəmərimiz mövcuddur. Elektrik enerjisi xətlərinə gəldikdə isə biz 4 qonşu ölkəyə elektrik enerjisi ixrac edirik və Avropaya elektrik enerjisi ixrac etməyi planlaşdırırıq.Biz Zəngəzur dəhlizinin fəaliyyətinə start vermək istəyirik. Bu da yalnız yüklər üçün deyil, elektrik enerjisi üçün mühüm ixrac marşrutu ola bilər. Biz işlərə başlamışıq və bu istiqamətdə investisiya ilə bağlı artıq praktiki addımlar atırıq. Beləliklə, hər bir məsələdə şaxələndirmə vacibdir.Bu səbəbdən vaxtilə Azərbaycanın etibarlı tranzit ölkəsi kimi potensialını düzgün qiymətləndirməyənlər fikirlərini dəyişəcəklər. Biz artıq müəyyən eyhamlar görürük və biz buna hazırıq. Biz köməyə ehtiyacı olan hər kəsə yardım etməyə hazırıq. Bunun üçün bizdə siyasi iradə var. Hər zaman bizim siyasətimiz körpülər qurmaqdan və əməkdaşlığı gücləndirməkdən ibarət olub.Bundan əlavə, biz zəruri infrastruktura malikik. Yeni dəniz limanı, bütün istiqamətlərlə bizi birləşdirən dəmir yolu, avtomobil yolları və hava limanları. Azad olunmuş ərazilərdə üç yeni hava limanımız olacaq. Onlardan biri artıq istifadə verilib. Beləliklə, Azərbaycan 9 beynəlxalq hava limanına sahib olacaq. Nəhayət, ölkəmizin coğrafi yerləşməsi, yəni, neft və qaz sahəsində əməkdaşlıqla bağlı planlar qurarkən Azərbaycanın tranzit potensialı nəzərə alınmalıdır” - bu fikirləri  Prezident  İlham Əliyev Bakı Enerji Həftəsi çərçivəsində  27-ci Beynəlxalq Xəzər Neft və Qaz Sərgisinin rəsmi açılışında söyləyib. 
Rəqəmsal İnkişaf və Nəqliyyat naziri, Koordinasiya Şurasının sədri Rəşad Nəbiyev  Azərbaycan Respublikasının Tranzit Yükdaşımalar üzrə Koordinasiya Şurasının 6-cı iclasında bildirmişdir ki, 2015-ci ildə Azərbaycan Respublikası Prezidentinin (655 nömrəli) Fərmanı ilə Koordinasiya Şurası yaradılan zaman tranzit yüklərin ölkəyə cəlb edilməsi və ölkəmizin üzərindən daşınan ənənəvi yüklərin həcmində artıma nail olmaq üçün mühüm tədbirlərin həyata keçirilməsi zərurəti müəyyən edilmişdir. Ötən dövr ərzində istər Şuraya üzv icra hakimiyyəti orqanları, istərsə də nəqliyyat müəssisələri tərəfindən mühüm təşəbbüslər irəli sürülmüş və əhəmiyyətli işlər görülmüşdür. Bununla yanaşı, ölkə başçısı möhtərəm İlham Əliyevin başçılığı və uzaqgörən siyasəti nəticəsində ölkəmizin tranzit potensialının artırılmasına təkan verəcək irimiqyaslı infrastruktur layihələrinin (Bakı Beynəlxalq Dəniz Ticarət Limanının inşası, Bakı-Tbilisi-Qars dəmir yolu xəttinin tikintisi, avtomobil yolları şəbəkəsinin genişləndirilməsi və yeni RO-PAX tipli gəmilərin istifadəyə verilməsi) həyata keçirildiyi qeyd olundu. Rəşad Nəbiyev bildirdi ki, nəqliyyat infrastruktrununun təkmilləşdirilməsi sahəsində görülən işlər təkcə sadalananlarla məhdudlaşmır və Ali Baş Komandanın rəhbərliyi ilə işğaldan azad olunmuş ərazilərdə bərpa-quruculuq işləri sürətlə həyata keçirilməkdədir. Eyni zamanda, Naxçıvan üzərindən ölkəmizi Türkiyə ilə birbaşa avtomobil və dəmir yolu vasitəsilə əlaqələndirəcək Zəngəzur dəhlizi Türkiyə və Mərkəzi Asiya ölkələrinin iqtisadiyyatlarını daha qısa məsafə qət etməklə və daha az vaxta birləşdirməklə ölkəmizə əlavə tranzit yüklərinin cəlb edilməsi istiqamətində imkanlar yaradacaqdır.

Yeni Azərbaycan Partiyası Salyan rayon Təşkilatının 
"Salyan Oil LTD"  ƏPT-nın sədri  Mirzağa Əbilov