Dünya Azərbaycanlılarının V qurultayı - Zəfər qurultayı

Müzəffər Ali Baş Komandan, Cənab Prezident İlham Əliyev 22 aprel 2022-ci il tarixdə Azərbaycanın mədəniyyət paytaxtı olan Şuşa şəhərində keçirilən Dünya Azərbaycanlılarının V qurultayında geniş məzmunlu və dünyada yaşayan azərbaycanlıların və diasporanın gələcək fəaliyyəti üçün proqram xarakterli nitq söyləmişdir. Cənab Prezidentimizin Proqmatik xarakterli, tarixi faktlara əsaslanan geniş məzmunlu nitqindən irəli gələn bəzi məqamları ictimaiyyət ilə bölüşməyi özümə borc bilərək bəzi məsələləri nəzərlərə çatdırmaq istəyirəm:

Əsası 2001-ci ildə Azərbaycan adlı bir müstəqil dövlətin yaradıcısı və memarı, Azərbaycan xalqının müasir dövrdəki ideoloqu və bundan sonra yüz illər boyunca çağlayacaq ideologiya çeşməsi olan Ulu Öndər Heydər Əliyev tərəfindən həyata keçirilən Azərbaycançılıq məfkurəsinin təbliği və təşkili ideyası bu günki Zəfər qurultayının mənbəyidir. “Hər bir kəsin milli mənsubiyyəti onun qürur mənbəyidir” söyləyən Ulu Öndər “Mən həmişə fəxr etmişəm, bu gün də fəxr edirəm ki, Mən Azərbaycanlıyam!” dedi və dünyanın 60 dan çox  ölkəsində yaşayan azərbaycanlıları bir araya topladı və 2001-ci ildə Dünya azərbaycanlılarının I Qurultayını keçirdi.
Bundan sonra 2006; 2011; 2016-cı illərdə dünya azərbaycanlılarının qurultayları keçirilmiş və bu qurultaylarda sədrlik edən Cənab Prezidentimiz İlham Əliyev bu günki Qələbəyə aparan yolları və Azərbaycan həqiqətlərini dünyaya çatdırmaq üçün diasporaların fəaliyyətinə tarixi həqiqətə əsaslanan geniş miqyaslı töhfələr vermişdir. Keçən müddət ərzində Ulu Öndər ideyalarına və strategiyasına sadiq qalan və bu strategiyanı uğurla davam etdirən Cənab Prezidentimiz V qurultayı Zəfər qurultayı adlandırdı. Nə üçün Zəfər qurultayı? Əvvəla  ona görə Zəfər qurultayıdır  ki, 2020-ci il 8 noyabrda tarixi “Zəfər Günü”ndən sonra ilk dəfədir ki, dünya azərbaycanlıları toplaşır və qurultay keçirir.      
İkinci, ona görə ki, Azərbaycanın qəhrəman oğulları tarixi missiyanı həyata keçirərək tarix qarşısında, xalq qarşısında, vətən qarşısında misilsiz xidmətlər göstərmişlər. Müstəqillik dövründə yetişən gənclər bu tarixi hadisəni, tarixi müjdəni Azərbaycan xalqına bəxş etmişlər.
Üçüncü ona görə ki, Azərbaycan xalqı 30 il davam edən mənasız danışıqlar əvəzinə öz gücünü ortaya qoydu, ədaləti bərpa etdi və bütün dünyaya sübut etdi ki, Azərbaycan xalqı heç zaman işğalla barışmaq fikrində deyildi. Həm Azərbaycanda yaşayan vətəndaşlarımız, həm də Azərbaycandan kənarda yaşayan soyadaşlarımız bir hədəfə çatmaq üçün 30 il çalışdıq, torpaqlarımızı işğaldan azad etdik və dünya azərbaycanlılarının həmrəyliyi, birliyi Qələbə ilə yekunlaşdı.
Dördüncü ona görə ki, Azərbaycan  təkcə Ermənistanla və dünya erməniliyi ilə müharibə aparmayıb, eyni zamanda Ermənistanın himayədarları ilə müharibə aparıb və Qələbə qazanıb. Ona görə bu qələbənin tarixi əhəmiyyəti daha böyükdür.
Beşinci ona görə ki, informasiya təxribatı hələ davam edir. Müharibə başa çatsa da, bizə qarşı olan ərazi iddiaları hələ ki, başa çatmayıb. Ona görə Qurultay nümayəndələrinin qarşısına böyük məsuliyyət tələb edən bir vəzifə düşür: 
1. Postmüharibə dövründə göstərilən səylər nəticəsində, Ermənistanın və dünya erməniliyinin Azərbaycana qarşı ərazi iddiaları aradan qaldırılması.2. Dünyada yaşayan azərbaycanlılar yaşadıqları ölkələrdə Azərbaycan məktəblərinin açılmasına çalışması. 3.İnformasiya təxribatına son qoyulması, Azərbaycanın yeni reallıqlarının dünya ictimaiyyətinə çatdırılması və.s.
Cənab Prezidentimiz İlham Əliyev nitqinin sonunda bir daha vurğuladı ki, bundan sonra Azərbaycan xalqı Müzəffər xalq kimi, Azərbaycan dövləti qalib dövlət kimi əbədi yaşayacaqdır! Xalq öz torpağındadır. Bu torpaqda möhkəm dayanıb və heç kim heç vaxt bu torpaqlardan xalqımızı tərpədə bilməz. Qarabağ Azərbaycandır!

   Səlimağa Səlimli,
   Salyan rayonu Şəkərli kəndi, Əməkdar müəllim