Dünya Azərbaycanlılarının həmrəyliyi Qələbə ilə yekunlaşdı

2020-ci ilin 27 sentyabr günü Müzəffər Ali Baş Komandan İlham Əliyevin rəhbərliyi ilə qüdrətli Azərbaycan ordusu şanlı qələbəyə aparan yolun təməlini qoydu. Ölkə başçımız müraciətində bir daha təkrarən xatırlatdı ki, onun daha əvvəl beynəlxalq kürsülərdə, böyük auditoriyalar qarşısında etdiyi çıxışlarda səsləndirdiyi reallıq öz təsdiqini tapdı. Belə ki, dövlət başçımız daim bildirirdi ki, Azərbaycan xalqı heç vaxt işğalla barışmayacaq və belə də oldu. 2020-ci ilin sentyabrın 27-sində Ermənistan Silahlı Qüvvələrinin cəbhəboyu ərazilərdə genişmiqyaslı təxribatlar törətməsinə cavab olaraq Azərbaycan Ordusu sonradan dəmir yumruq adlandırılan əks hücum əməliyyatına başladı və nəticə hər kəsə məlumdur: Azərbaycan tərəfindən tarixə yazılacaq möhtəşəm qələbə. Azərbaycanın son müharibədə nümayiş etdirdiyi güc hamı üçün təmamilə gözlənilməz oldu. Bu əvvəllər fantastik gələcək kimi görünən yeni nəsil müharibə, yeni hərbi startegiya idi. Dünyanın aparıcı ekspertləri bütün bunları ilk yeni nəsil müharibəsi adlandırır, Azərbaycan Ordusunun təcrübəsini öyrənir, dövlətlər öz hərbi doktrinalarına, hərbi strategiyalarına hətta müdafiə büdcələrinə düzəlişlər edirlər. Çünki dünyanı sarsıdan 44 gündən sonra hərbi ekspertlərin hərb elmi haqqında təsəvvürləri köhnəlmiş hesab olundu. Azərbaycan yazdığı dastan ilə sadəcə öz tarixinə yox, həm də dünya hərb tarixinə qızıl hərflərlə həkk olundu.
Şanlı Qələbədən sonra qədim mədəniyyət paytaxtımız Şuşada bir sıra mötəbər tədbirlər keçirilmişdir. 12 may 2021-ci ildə Şuşa “Xarıbülbül” musiqi festivalına ev sahibliyi etdi, 18 sentyabr 2021-ci il tarixdə ilk dəfə Milli Musiqi Günü Şuşada keçirildi, 2021-ci il iyunun 15-də Şuşa şəhərində Türkiyə Respublikası ilə Azərbaycan Respublikası arasında müttəfiqlik əlaqələri haqqında Şuşa Bəyannaməsi təsdiq edildi, 2021-ci il avqust ayının 30-da Şuşada H.Əliyev Fondu tərəfindən Vaqif Poeziya Günləri keçirildi, 18 mart 2022-ci ildə Şuşa şəhərində Azərbaycan – BMT tərəfdaşlığının 30 illiyinə həsr olunmuş toplantı keçirildi. Möhtərəm Prezidentimiz və ailə üzvləri işğaldan azad olunmuş ərazilərə, o cümlədən dilbər Şuşaya dəfələrlə səfər etdilər.
Ən böyük uğurlarımızdan biri də dünyanın dörd bir yanında yaşayan azərbaycanlıların birliyinə, həmrəyliyinə nail olunmasıdır. Tarixi Qələbəmizdən sonra Türk dünyasının mədəniyyət paytaxtı olan Şuşada keçirilən Dünya Azərbaycanlılarının V Qurultayı tariximizə Zəfər Qurultayı kimi yazıldı. Dünyanın 65 ölkəsindən 400-dən çox soydaşımızı araya gətirən bu Qurultay həm də böyük rəmzi məna daşıyır. Belə ki, Azərbaycanın haqq səsinin beynəlxalq aləmə çatdırılmasında fəallıq göstərən insanlar məhz, qəhrəman Azərbaycan oğullarının dastan yazdığı qədim Şuşada bir araya gəldilər.
Bu böyük qələbə nəticəsində azad olunmuş torpaqlarda dünya azərbaycanlılarının V qurultayının keçirilməsi bütün xalqımızda qürur və fərəh hissi yaratdı. Zəfər qurultayında iştirak edən dünya azərbaycanlıları düşmənin torpaqlarımızda yaratdığı xarabalıqları öz gözləri ilə gördü. Həm də 30 il işğal altında olan torpaqları azadlığa qovuşduqdan sonra ziyarət etdi. Bir daha sübut olundu ki, Qarabağ Azərbaycandır !
Bu gün Şuşada möhtəşəm hadisələr baş verir. Dünyanın hər yerindən bura təşrif buyuran soydaş­larımız tarixi Cıdır düzündə bir araya gəliblər. Cəmi iki il bundan əvvəl belə bir xoşbəxtliyin baş verəcəyini təsəvvür etmək çətin idi. İki il bundan əvvəl bu arzu bizə xəyal kimi görünürdü.
Bu gün isə Şuşa azaddır, xoşbəxtdir. Şuşa ilə bərabər xalqımız da özünü haqlı olaraq xoşbəxt sanır. Bu xoşbəxtlik bizə Ali Baş Komandan İlham Əliyevin yüksək qətiyyəti, rəşadətli ordumuzun igid əsgər və zabitlərinin qeyri-adi şücaətləri sayəsində nəsib olubdur.

İsmayılova Nigar,
İsmayıllı rayon Heydər Əliyev Mərkəzinin bələdçisi.