Fəzail Ağamalı: “Rusiya öz davranışlarında ciddi dönüş yaratmalıdır, yoxsa...”

“Rusiyanın son vaxtlar Azərbaycanın ərazisində baş verən hadisələrlə bağlı davranışları hec cür başa düşülən və qəbul edilən deyil. Azərbaycan öz ərazisində hərbi hissələrin dislokasiyasını həyata keçirərkən kiminləsə məsləhətləşmir. Rusiyanın sülhməramlı qüvvələrinin üzərinə düşən missiya isə, mahiyyət etibarilə, qarşıdurmanın qarşısını almaq, müharibənin yenidən alovlanmasına imkan verməməkdir”.

Bunu açıqlamasında Milli Məclisin deputatı, Ana Vətən Partiyasının sədri Fəzail Ağamalı bildirib.

Millət vəkili deyib ki, sülhməramlılar 10 noyabr 2020-ci il tarixində imzalanmış  üçtərəfli bəyanatın dördüncü bəndinin icra olunmasına daha çox diqqət yetirməlidirlər: “Bu bəyanatı Azərbaycan Respublikasının Prezidenti, Ermənistanın Baş naziri ilə bərabər Rusiya Federasiyasının Prezidenti də imzalayıb. Bu imzaya hörmət əlaməti olaraq, Rusiya Prezidentinin nüfuzuna xələl gətirməmək üçün həmin maddə yerinə yetirilməlidir. Orada açıq şəkildə deyilir ki, Rusiyanın sülhməramlı qüvvələrinin həmin ərazidə yerləşdirilməsi ilə paralel olaraq, Qarabağdakı erməni hərbi qüvvələri də çıxarılır. Fərqi yoxdur, bu qüvvələr Ermənistanındır, yaxud keçmiş Dağlıq Qarabağdakı qondarma hərbi qurumun tör-töküntüləridir. Ancaq indiyədək Rusiya Qarabağdakı qanunsuz silahlı dəstələrin ordan çıxarılması istiqamətində heç bir addım atmayıb. Əksinə, sülhməramlıların gözünün önündə səngərlər qazılır, təxribatlar törədilir, ermənilərin özünümüdafiə dəstələri Azərbaycanın Kələbəcərə gedən maşınlarını yoxlayır.  Hətta, Rusiyanın sülhməramlı qüvvələrinin müvəqqəti yerləşdiyi ərazilərdə Azərbaycan  avtomobillərinə təxribatlar törədilir, Laçın dəhlizindən müxtəlif təxribatçılar ərazimizə daxil olur”.

Fəzail Ağamalının sözlərinə görə, sülhməramlılar bunların qarşısını almaq əvəzinə, Azərbaycan özünün suveren hüquqlarından istifadə edərək, hərbi dislokasiyanı yerinə yetirən zaman ermənilərin yanında dayanır, heç cür qəbul edilməyən, həmin bəyanatın, Rusiya ilə Azərbaycan arasında imzalanmış müttəfiqlik müqaviləsinin  mahiyyətinə uyğun olmayan addımlar atırlar. 
“Bu, qəbul edilən deyil, kifayət qədər suallar doğurur, kifayət qədər problemlər yaradır. Ona görə də Rusiya öz davranışlarında, hərəkətlərində ciddi dönüş yaratmalı və üzərinə düşən vəzifəni yerinə yetirməlidir. Əgər Rusiyanın sülhməramlı qüvvələri orada hələ də qalan erməni quldurlarının tör-töküntülərinin çıxarılmasını həyata keçirməsə, təbii ki,  bunu Azərbaycan yerinə yetirəcəkdir. Bunun alternativi yoxdur və ola bilməz. Rusiya buna aydınlıq gətirməlidir və bir daha təkrar edirəm, imzalamış olduğu səndlərə hörmətlə yanaşmalıdır. Yoxsa, Azərbaycan özünün imkanlarından istifadə edib suverenliyini təmin edəcək, Xankəndi və onun ətrafını separatçı tör-töküntülərdən təmizləyəcəkdir.  Orada yaşayan dinc insanlarla, təbii ki, Azərbaycan dövlətinin problemi yoxdur. Dəfələrlə bu bəyan edilib. Hətta, 44 günlük müharibə dövründə Azərbaycan Ermənistandan fərqli olaraq, mülki əhaliyə zərrə qədər ziyan gətirəcək addımlar atmadı.  Biz indi də o mövqeyi daşıyırıq, o mövqedə dayanmışıq.  Bundan həm Ermənistan, həm də Ermənistanın arxasında dayanan Rusiya nəticə çıxarmalıdır", - partiya sədri bildirib.

Deputat Laçın dəhlizinin bağlanma ehtimalı ilə bağlı suala cavabında deyib ki, bu, istisna olunmur.
“Laçın dəhlizinin yeni bir marşrutu üzərində iş gedir. Mənə elə gəlir ki, həmin marşrutun yaradılması başa çatdırılqdan sonra onun fəaliyyətində də ciddi dəyişikliklər olacaqdır. Azərbaycanın icazəsi ilə və ölkəmizin ərazi bütövlüyünə xələl gətirə biləcək amillər istisna olunmaqla, bu dəhlizdən istifadə oluna bilər.  Burada biz problem görmürük. Azərbaycan dövləti humanist, məsuliyyətli bir dövlət olaraq, dinc insanların gedib-gəlməsinə, yəni ermənilərin Ermənistanla, öz etnik soydaşları, qohumları ilə əlaqə saxlamasına məhdudiyyət yaratmaq fikrində deyil. Lakin, bir şərtlə ki, orada ancaq humanitar dəhliz olsun.  Başqa məqsəd daşımasın. Düşünürəm ki,  yaxın zamanlarda buna çox ciddi aydınlıq gətiriləcək, orada qayda-qanun təmin olunacaqdır", - Fəzail Ağamalı əlavə edib.

Milli Məclisin deputatı, Ana Vətən Partiyasının sədri Fəzail Ağamalı.