“Azneft” İB-nin Qaz Emalı Zavodunun 60 illik yubileyi qeyd edilib

SOCAR-ın “Azneft” İB-nin Qaz Emalı Zavodunun (QEZ) 60 illik yubileyi qeyd edilib. QEZ-in direktoru Aqşin Paşayev zavodun tarixi ilə bağlı məlumat verərək qeyd edib ki, 1961-ci ildə yaranan zavod zəngin inkişaf dövrü keçib, neft-qaz sənayesinin inkişafına dəyərli töhfələr verib.

60 illik yubiley münasibətilə zavodun kollektivini SOCAR rəhbərliyi adından təbrik edən SOCAR-ın Neftin, qazın nəqli və qaz təsərrüfatı məsələləri üzrə vitse-prezidenti Daşqın İskəndərov bu günün xüsusilə əlamətdar olduğunu bildirib. O vurğulayıb ki, bu gün xalqımız məğlubedilməz sərkərdə, dövlət başçımız cənab İlham Əliyevin yubileyini qeyd edir.

Daşqın İskəndərov zavodun neft-qaz sənayesinin inkişafında xüsusi xidmətləri olduğunu deyib. Zavodun SOCAR-ın dəyər zəncirinin bir parçası olduğunu söyləyən vitse-prezident mobil və kifayət qədər çevik kollektivi olan zavodun ötən 60 ildə fasiləsiz fəaliyyət göstərdiyini bildirib, onlara gələcək fəaliyyətlərində uğurlar arzulayıb.  

SOCAR-ın “Azneft” İB-nin baş direktoru Şahmar Hüseynov isə QEZ-nin kollektivini 60 illik yubiley münasibətilə belə təbrik edib: “Bu gün bizim üçün ikiqat bayramdır. Çünki bu gün cənab Prezidentimiz, xalqımızın 30 illik Qarabağ həsrətinə son qoyan qalib sərkərdə, qətiyyətli Ali Baş Komandan İlham Əliyevin 60 illik yubileyidir. Biz də, “Azneft” ailəsi olaraq, cənab Prezidentimizi yubileyi münasibətilə təbrik edir, Ona çətin, şərəfli və yorulmaz fəaliyyətində uğurlar arzu edirik”. 

Şahmar Hüseynov qeyd edib ki, mövcud imkanlar nəzərə alınmaqla zavodun fəaliyyəti daha da təkmilləşdirilməli, hədəflər müəyyən olunmalı və daha uğurlu nəticələrin əldə olunması üçün var qüvvəmizlə çalışmalıyıq: “Əminəm ki, biz bu mühüm tapşırıqların öhtəsindən gələcəyik. Bunun üçün bizim peşəkar kadrlarımız, imkanlarımız və hər zaman olduğu kimi SOCAR rəhbərliyi tərəfindən dəstəyimiz var. Bugünkü yubiley münasibətilə zavodun bir qrup əməkdaşının SOCAR prezidenti cənab Rövnəq Abdullayev tərəfindən “Fəxri neftçi” döş nişanı və “Fəxri Fəman”la mükafatlandırılması da bu dəstəyin, diqqət və qayğının parlaq nümunəsidir. Bu mükafatlar işimizə, əməyimizə verilən diqqətlə yanaşı, üzərimizə böyük məsuliyyət qoyur. Şübhəsiz ki, biz bu məsuliyyətli işin öhdəsindən layiqincə gələcək, zavodun həyatında yeni bir səhifə açacaq, sizinlə birlikdə böyük uğurlara imza atacağıq”. 
Yubiley tədbirində SOCAR prezidentinin müvafiq əmrləri ilə “Fəxri neftçi” döş nişanı və “Fəxri Fəman”la mükafatlandırılan zavodun bir qrup əməkdaşına mükafatlar təqdim edilib, ağacəkmə aksiyası keçirilib.
#SOCAR #AzneftİB #QazEmalıZavodu #60il #yubiley #bizneftçiyik