Azərbaycan Ermənistanla sülh danışıqlarına və sülh razılaşması üzərində işləməyə hazırdır

        Azərbaycanın 44 günlük Vətən müharibəsində qazandığı tarixi Qələbə regionda yeni reallıq yaradıb. Tarixi Zəfər Müzəffər Ali Baş Komandan, Prezident cənab İlham Əliyevin rəhbərliyi ilə Ordumuzun böyük qəhrəmanlığını, Azərbaycan xalqının iradəsini, vətənpərvərliyini, böyüklüyünü bütün dünyaya çatdırmış oldu. Dinc şəkildə ədalətə və beynəlxalq normalara uymayan Ermənistan Azərbaycanın hərbi gücü ilə buna məcbur edildi. Ölkə rəhbəri eyni vaxtda həm diplomatik, həm hərb arenasında, həm də informasiya müharibəsi meydanında bütün qüvvələri vahid hədəfə yönəltməyin uğurlu nümunəsini yaratdı. 44 gün ərzində 30 illik təcavüz, işğal və etnik təmizləmə siyasətinin qanunsuz nəticələrini ləğv etmək Azərbaycan tarixinin həqiqətən şanlı səhifəsidir. Prezident İlham Əliyev haqqımızı, ədaləti dünyaya böyük məharətlə çatdıraraq böyük nəticələri əldə etdi. Azərbaycanın ədalətli mövqeyini dəstəkləyən ölkələrin sayı daha da artdı. Azərbaycan dövləti Prezident İlham Əliyevin həyata keçirdiyi uğurlu siyasət nəticəsində qalib gəldiyi Vətən müharibəsindən daha da güclənərək çıxdı.
       Ölkə rəhbəri dekabrın 14-də İspaniyanın “El Pais” qəzetinə müsahibə zamanı bildirib ki, Ermənistanın ərazisinə Azərbaycanın hər hansı bir səbəb olmadan müdaxilə etməsi ilə bağlı rəsmi İrəvanın iddiaları əsassızdır: “Azərbaycan və Ermənistan arasında dövlət sərhədi təyin olunmayıb. Buna səbəb 1990-cı illərin əvvəlində hər iki ölkənin müstəqilliyinin bərpasından dərhal sonra Azərbaycanın həmin hissəsinin işğalının baş verməsidir. Ötən ilin noyabrında İkinci Qarabağ müharibəsi bitəndə ərazidə iqlim şəraiti əlverişsiz idi. Qar əriməyə cari ilin may ayında başladı və dərhal Azərbaycan Ordusu dövlət sərhədinə tərəf hərəkət etməyə başladı. Sərhədin haradan keçməsi ilə bağlı olan anlayışımıza əsasən, ordumuz dövlət sərhədində mövqe tutdu. Dağlıq Qarabağ münaqişəsi həll olunub. Dağlıq Qarabağın qondarma statusu ilə bağlı və ya buna bənzər hər hansı müzakirələrə qayıdış yoxdur. Biz onu özümüz, güc yolu və siyasi vasitələrlə həll etdik. Biz BMT Təhlükəsizlik Şurasının qətnamələri qəbul olunandan 27 il sonra bunu birtərəfli qaydada həyata keçirdik və bu, ilk növbədə Ermənistan tərəfindən nəzərə alınmalı olan yeni reallıqdır. Çünki postmüharibə vəziyyətinin gedişatından gördüyümüz kimi, əsas beynəlxalq oyunçular artıq yeni reallığı qəbul edib və gələcəyi bu yeni reallığa əsaslanaraq qurmağa çalışırlar.
         Müharibədən sonra Ermənistan tərəfdə yenidən revanşist qüvvələrin baş qaldırması bir daha təsdiqləyir ki, ermənilər hələ bu müharibədən nəticə çıxarmayıblar. Belə ki, hər zaman olduğu kimi rəsmi İrəvan Azərbaycana qarşı əsassız iddialar irəli sürməkdə davam edir. Azərbaycan Ordusu hazırda öz suveren ərazisindədir. Sözsüz ki, işğalçı Ermənistan belə əsassız iddialar irəli sürməklə yenə də beynəlxalq ictimaiyyəti aldatmağa yönəlik addımlar atır. Bütün bunlar isə ondan xəbər verir ki, Ermənistanda hələ də revanşizm hissi ilə alışıb-yanan qüvvələr var. Ancaq onların bütün bu cəhdləri məhvə məhkumdur. Ali Baş Komandan İlham Əliyevin də qeyd etdiyi kimi, görsək ki, erməni faşizmi baş qaldırır onların başını bir daha əzəcəyik. Ermənistanın Azərbaycanla sülh sazişini imzalamağa hazır olmaması, təxribatlar törətməsi, Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələrinin atəş açması rəsmi İrəvanın regionda sabitliyi yenidən pozmağa cəhdi kimi də dəyərləndirilə bilər. Bütün dünya Azərbaycanın ərazi bütövlüyünü və Qarabağı Azərbaycanın ayrılmaz hissəsi kimi tanıyır. Ermənistan nə ərazi bütövlüyünü tanıdığını, nə də tanımadığını söyləyir. İkinci Qarabağ müharibəsindən onların baş naziri açıq şəkildə bildirmişdi ki, “Qarabağ Ermənistandır və nöqtə”. Bu bəyanat əslində danışıqlar prosesini məhv etdi və onların keçən il yaşadığı acı məğlubiyyətin elementlərindən biri idi. Lakin indi Ermənistanın sanki bu məsələ ilə bağlı heç bir mövqeyi yoxdur” - deyə Prezident İlham Əliyev vurğulayıb. Ümid edirik ki, yəqin Avropa tərəfdaşları Ermənistanı bu mövqeyinin gələcəyinin olmamasına inandıra biləcəklər. Azərbaycanla sülh razılaşması olmazsa, onlar gələcəkdə yenə də əziyyət çəkə bilərlər. Ermənistan Azərbaycana qarşı istənilən düşmənçilik əməllərindən və ərazi iddialarından çəkinməlidir.

Rövşən Əsədli, İmişli RİHB Aparatı İnformasiya təminatı
və təhlili sektorunun aparıcı məsləhətçisi