Brüssel görüşü: Azərbaycan istədiklərinə nail olur

Dünən Brüsseldə Azərbaycan Respublikasının Prezidenti İlham Əliyevin Avropa İttifaqı Şurasının Prezidenti Şarl Mişel və Ermənistan Respublikasının Baş naziri Nikol Paşinyan ilə birgə görüşü keçirilib.

Görüşdə Azərbaycanın işğaldan azad edilmiş ərazilərinin minalardan təmizlənməsi məsələsi gündəliyə gətirilib. Avropa İttifaqının bu istiqamətdə Azərbaycana texniki yardım göstərməyə hazır olduğu bildirilib.

Həmçinin, Ermənistan-Azərbaycan dövlət sərhədinin delimitasiyası ilə bağlı hər iki tərəf müvəqqəti işçi qrupun yaradılması ilə bağlı razılığa gəliblər. Eyni zamanda, kommunikasiya və nəqliyyat xətlərinin açılması məsələsi də geniş müzakirə olunub. Ermənistan tərəfi öz ərazisindən dəmir yolu xəttinin çəkilməsi ilə bağlı üzərinə düşən öhdəliyi təsdiq edib.

Bildirilib ki, Ermənistan dəmir yolunun çəkilişinə tezliklə start verəcəkdir. Burada gömrük və sərhəd nəzarət məsələlərinin qarşılıqlı prinsip əsasında təmin olunması barədə razılığa gəlinib.

Qeyd edək ki, avtomobil yolu marşrutunun müəyyən edilməsi ilə bağlı müzakirələr isə davam etdiriləcək.

Politoloq Turab Rzayev Cebhe.info-ya açıqlamasında bildirib ki, Brüssel görüşü çox uğurlu oldu:

“Əslində, Avropa İttifaqı ilə keçirilən görüşlərdə ilk dəfədir ki, konstruktiv şəkildə hansısa nəticə əldə olundu. Azərbaycan tərəfi daha əvvəl də bəyan etmişdi ki, biz bütün tərəflərin vasitəçi kimi neytral şəkildə proseslərə töhfə verə biləcək iştirakına razıyıq. Hətta belə addımları dəstəkləyirik, yetər ki, onlar da obyektiv olsunlar.

Brüssel görüşündə Avropa İttifaqı ilk dəfə konstruktiv mövqe nümayiş etdirdiyi üçün nəticəyə nail olundu. Bu, bizim üçün böyük yenilikdir. Çünki 30 ilə yaxın bir müddət sonra ilk dəfə olaraq Azərbaycan ərazisindən Naxçıvana dəmir yolu xəttini əldə etmiş olduq.

Yəni Zəngilandan Ordubada birbaşa dəmir yolu xətti çəkiləcək. Bu isə Azərbaycanı təkcə Naxçıvanla deyil, həm də Türkiyə ilə birləşdirir. Bildiyiniz kimi, Türkiyə də artıq İğdırdan Naxçıvana dəmir yolu xətti çəkib. Yeni yol vasitəsilə Türkiyə Azərbaycan üzərindən Orta Asiyaya çıxış imkanları əldə edəcək. Həmçinin, Çinin Orta Asiya və Azərbaycan üzərindən Avropaya yolunun açılması deməkdir. Düşünürəm ki, bu, ölkəmiz üçün olduqca müsbət addımdır”.

Politoloq qeyd edib ki, Azərbaycan gələcəkdə avtomobil yolu ilə bağlı da razılığın əldə olunmasına çalışacaq:

“Gedişat göstərir ki, dəmir yolu ilə bağlı razılıq əldə olundusa, mütləq avtomobil yolu ilə də bağlı da razılaşma olacaq. Həmçinin, Avropa İttifaqının da bu məsələ ilə bağlı mövqeyi çox konstruktivdir. Ümid edirik ki, yaxın zamanda avtomobil yolu ilə bağlı yekun bir nəticəyə nail olacağıq”.