DEPUTAT: "REVANŞİSTLƏRİN PAŞİNYANA MƏĞLUB OLMASINDA  AZƏRBAYCAN AMİLİ CİDDİ ROL OYNADI"

“Ermənistanda ciddi xarakter daşıyan və qarşıdurma səviyyəsində özünü ifadə edən parlament seçkiləri başa çatdı. Seçkilərin nəticəsi ilə bağlı gümanları özünü doğrultdu. Paşinyan və Köçəryanın ətrafında baş verən proseslərdən, keçirdikləri görüşlərdən və insanların münasibətindən nəticə çıxarmışdım ki, Paşinyan cüzi fərqlə də olsa, qalib gələcək, lakin Paşinyan daha çox səs fərqi ilə qələbə qazandı. Seçkilərin nəticəsi göstərdi ki, Ermənistanın əhalisi də artıq sülh və əmin-amanlıq istəyir”. 

Bu sözləri Demokrat.az-a açıqlamasında Milli Məclisin deputatı Fəzail Ağamalı deyib.

Ermənistanda keçirilən seçkilərin nəticəsi ilə bağlı danışan deputat bildirib ki, Paşinyanın qələbəsi müharibədən sonra vəziyyəti daha da gərginləşdirmək istəyən qüvvələrə əhalinin cavabı oldu: 

“Görünür, Ermənistan cəmiyyətini artıq Qarabağ məsələsi düşündürmür. Məğlub olan ölkənin baş naziri yenidən xalqın iradəsi ilə hakimiyyətdə qalır. Bu, qeyri-adi situasiyadır. Onlar səfalətdən, böhrandan çıxmaq istəyirlər, müharibə arzusunda deyillər. Ermənistan əhalisi artıq normal yaşamaq, müharibə içərisində məhv olmaq istəmirlər. Bu baxımdan onlar seçimlərini Paşinyana etdilər. Paşinyan həm də revanşistlər üzərində qələbə qazandı. Paşinyanın partiyasından başqa, demək olar ki, ölkədəki digər bütün partiyalar revanşist mövqedə idilər. Paşinyanın qələbəsi həm də revanşistlər üzərində xalqın iradəsinin ifadəsi kimi tarixə düşdü”.

Seçkidən sonra yaranacaq vəziyyətlə bağlı danışan deputatın sözlərinə görə, Paşinyan revanşist qüvvələrə qalib gəlsə də, bu mübarizədə onu çətin dövr gözləyir:

“Parlamentdə revanşistlər də təmsil olunacaqlar. Onların hansı yolu tutacaqları bəllidi. Revanşistlərlə mübarizədə o, özünə güclü komanda yaratmalı və məhkəmə sistemində ciddi islahatlar aparmalıdır. Köçəryan cinayətkardı. O, təkcə Qarabağda – Xocalıda deyil, həm də öz ölkəsində reallaşdırıb qətliamlar törədib. Sarkisyanın prezident seçkilərində yol verilən saxtakarlığa qarşı çıxan əhalini güllə-boran  etdi. 10 nəfər öldürüldü, çoxlu sayda yaralananlar oldu. Bu, Köçəryanın siyasi proseslərə yanaşma metodudur. Bu cinayətkarlara qarşı mübarizə üçün Paşinyana komanda ilə bərabər, xalqın güclü dəstəyi olmalıdır. Bir sözlə, Paşinyanı qarşıda çətin günlər gözləyir”

Deputat Azərbaycanın siyasi müstəvidə Ermənistana ciddi təsir etdiyini və bunun seçkilərin nəticəsində özünü göstərdiyini qeyd edib:

“Azərbaycan Ermənistanı bütün səviyyələrdə məğlub etdi. Azərbaycan Ermənistanın təkcə hərb maşınına deyil, dövlətçiliyinə də ciddi zərbələr vurdu. Bu zərbələrə görə, Ermənistan illər boyu özünə gələ bilməyəcək. Ermənistanda iqtisadi vəziyyəti çox ağırdı, sosial durum kifayət qədər gərgindir. Ölkədəki gərginlik özünü hər addımda göstərir. Azərbaycanın 44 günlük müharibədə Ermənistana vurduğu zərbə və ölkə prezidentinin qətiyyətli mövqeyi, hərbçilərimizin qəhrəmanlığı Ermənistanı çökdürdü. Müharibədən sonrakı dövrdə də Ermənistandakı proseslərə Azərbaycan xüsusilə, cənab prezident İlham Əliyevin çıxışları ciddi təsir göstərməkədi. Şübhəsiz ki, revanşistlərin Paşinyana məğlub olmasında Azərbaycan amili ciddi rol oynadı. Əminəm ki, bundan sonra da Ermənistanda gedən siyasi, iqtisadi, sosial proseslərə Azərbaycanın təsir imkanları olacaq və Ermənistan bütün mənalarda Azərbaycanla razılaşmaq məcburiyyətində qalacaq”.