Azərbaycanın hərbi qüdrəti və strateji tərəfdaşlıqları

Azərbaycan Respublikasının Silahlı Qüvvələri ötən illər ərzində böyük inkişaf yolu keçərək regionun ən güclü ordularından birinə çevrilmişdir. Bu gün Azərbaycan Ordusu yalnız ölkəmizin təhlükəsizliyinin təminatçısı deyil, eyni zamanda dövlətimizin siyasi nüfuzunun, iqtisadi gücünün və milli maraqlarının qorunmasının əsas dayaqlarından biridir. Qazanılmış tarixi Zəfərdən sonra Silahlı Qüvvələrimizin inkişafı yeni mərhələyə qədəm qoymuş, ordunun daha da modernləşdirilməsi və dövrün çağırışlarına uyğunlaşdırılması istiqamətində mühüm addımlar atılmışdır.
Prezident, Silahlı Qüvvələrin Ali Baş Komandanı İlham Əliyevin qeyd etdiyi kimi, “Güclü dövlətin güclü ordusu olmalıdır”. Məhz bu prinsip Azərbaycanın hərbi siyasətinin əsas istiqamətlərindən birini təşkil edir. Son illər ərzində dövlət büdcəsində müdafiə və təhlükəsizlik məsələlərinə xüsusi diqqət ayrılması, müasir silah və texnikaların alınması, peşəkar hərbi kadrların hazırlanması və hərbi idarəetmənin təkmilləşdirilməsi ordumuzun güclənməsinə mühüm töhfələr vermişdir.
2020-ci ildə Vətən müharibəsində əldə edilən möhtəşəm Qələbə Azərbaycan Ordusunun gücünü bütün dünyaya nümayiş etdirdi. Ordumuzun yüksək döyüş qabiliyyəti, müasir texnologiyalardan səmərəli istifadə etməsi və peşəkar hərbi idarəetmə sistemi müharibənin qısa müddətdə qələbə ilə başa çatmasını təmin etdi. Bu Zəfərdən sonra Azərbaycan Silahlı Qüvvələrinin qarşısında duran əsas vəzifələrdən biri əldə edilmiş təcrübənin daha da inkişaf etdirilməsi və müasir hərbi çağırışlara uyğun yeni qüvvələrin formalaşdırılması oldu.
Bu baxımdan Komando briqadalarının yaradılması xüsusi əhəmiyyət daşıyır. Son illərdə Azərbaycan Ordusunda formalaşdırılan komando hərbi hissələri yüksək hazırlıqlı, çevik və peşəkar qüvvələr kimi diqqət çəkir. Ən mürəkkəb döyüş tapşırıqlarını yerinə yetirmək qabiliyyətinə malik olan bu hərbi hissələr müasir müharibələrin tələblərinə uyğun formalaşdırılmışdır. Komando bölmələrinin şəxsi heyəti xüsusi hazırlıq proqramlarından keçərək dağlıq, meşəlik və müxtəlif iqlim şəraitində döyüş əməliyyatları aparmaq bacarığı əldə edir. Bu gün komando qüvvələri Azərbaycan Ordusunun ən çevik və döyüş qabiliyyətli birləşmələri sırasında yer alır.
Azərbaycan Ordusunda həyata keçirilən mühüm islahatlardan biri də Silahlı Qüvvələrin Türkiyə Silahlı Qüvvələrinin modelinə uyğunlaşdırılmasıdır. Azərbaycan və Türkiyə arasındakı qardaşlıq münasibətləri hərbi sahədə də uğurla davam etdirilir. Birgə hərbi təlimlər, təcrübə mübadiləsi, kadr hazırlığı və müasir hərbi idarəetmə sistemlərinin tətbiqi ordumuzun inkişafında mühüm rol oynayır. Türkiyə modelinin tətbiqi nəticəsində Silahlı Qüvvələrimizdə çeviklik, operativlik və döyüş hazırlığı daha da yüksəlmişdir.
Azərbaycan-Türkiyə hərbi əməkdaşlığının ən mühüm siyasi sənədlərindən biri 2021-ci il iyunun 15-də imzalanmış Şuşa Bəyannaməsidir. Bu sənəd iki qardaş ölkə arasında münasibətlərin strateji müttəfiqlik səviyyəsinə yüksəldiyini bir daha təsdiqləmişdir. Bəyannamədə müdafiə və təhlükəsizlik sahəsində əməkdaşlığın daha da genişləndirilməsi, müdafiə sənayesi sahəsində birgə layihələrin həyata keçirilməsi, hərbi texnologiyaların qarşılıqlı mübadiləsi və birgə istehsal imkanlarının artırılması kimi mühüm istiqamətlər öz əksini tapmışdır.
Şuşa Bəyannaməsinə əsasən tərəflər dəniz, hava və kosmos sahələrində əməkdaşlığın genişləndirilməsini, müdafiə sənayesi texnologiyalarının inkişaf etdirilməsini, birgə tədqiqat və istehsalat layihələrinin həyata keçirilməsini, hərbi təyinatlı məhsulların istehsalı və ixracı sahəsində qarşılıqlı fəaliyyətin gücləndirilməsini nəzərdə tuturlar. Bu əməkdaşlıq Azərbaycan Ordusunun texnoloji imkanlarının artırılmasına və müdafiə sənayesinin daha da inkişafına mühüm töhfə verir.
Azərbaycanın hərbi sahədə mühüm tərəfdaşlarından biri də Pakistan İslam Respublikasıdır. Azərbaycan və Pakistan arasında dostluq və qardaşlıq münasibətləri uzun illərdir uğurla inkişaf edir. Pakistan Azərbaycanın ərazi bütövlüyünü daim dəstəkləyən ölkələrdən biri olmuşdur. Hərbi əməkdaşlıq sahəsində keçirilən birgə təlimlər, yüksək səviyyəli qarşılıqlı səfərlər və müdafiə sənayesi istiqamətində qurulan əlaqələr iki ölkə arasında strateji tərəfdaşlığın möhkəmlənməsinə xidmət edir.
Müasir dövrdə Azərbaycan Ordusunun inkişafı yalnız hərbi qüdrətin artırılması ilə məhdudlaşmır. Ordumuz yeni texnologiyaların tətbiqi, rəqəmsal idarəetmə sistemlərinin qurulması, pilotsuz uçuş aparatlarının imkanlarından istifadə, süni intellekt əsaslı hərbi həllərin öyrənilməsi və peşəkar insan resurslarının hazırlanması istiqamətində də mühüm nailiyyətlər əldə edir. Bütün bunlar Azərbaycan Silahlı Qüvvələrinin gələcək inkişaf perspektivlərini daha da genişləndirir.
Prezident İlham Əliyevin vurğuladığı kimi: “Bu gün bizim ordumuz dünya miqyasında güclü ordular sırasındadır. Biz bütün dünyaya göstərmişik ki, yenilməz xalq Azərbaycan xalqıdır, müzəffər ordu Azərbaycan Ordusudur”. Bu fikirlər Azərbaycan Ordusunun qazandığı tarixi nailiyyətlərin və əldə etdiyi nüfuzun ən dolğun ifadəsidir. Bu gün Azərbaycan xalqı öz ordusu ilə haqlı olaraq qürur duyur. Dövlətimizin gücü, xalqımızın birliyi və Silahlı Qüvvələrimizin peşəkarlığı ölkəmizin təhlükəsizliyinin etibarlı təminatıdır. Azərbaycanın müstəqilliyini, suverenliyini və milli maraqlarını qorumağa qadir olan müasir Azərbaycan Ordusu qarşıda duran bütün vəzifələri uğurla yerinə yetirməyə hazırdır.
Azərbaycan Ordusunun keçdiyi inkişaf yolu bir daha sübut edir ki, güclü dövlətin əsas dayaqlarından biri məhz güclü ordudur. Bu gün həyata keçirilən hərbi islahatlar, tətbiq olunan yeni idarəetmə modelləri və beynəlxalq əməkdaşlıq mexanizmləri Silahlı Qüvvələrimizin daha da möhkəmlənməsinə xidmət edir. Müasir Azərbaycan Ordusu öz potensialı, peşəkarlığı və döyüş təcrübəsi ilə ölkəmizin milli maraqlarının etibarlı müdafiəçisi olaraq inkişafını davam etdirir.

Abdulla Əliyev,
Salyan rayon Sarvan kənd tam orta məktəbinin hərbi rəhbəri,
Qarabağ müharibəsi iştirakçısı, YAP fəalı