Müzəffər Ali Baş Komandan İlham Əliyevin Rəhbərliyi ilə Zəfər Salnaməsi

“Mən dəfələrlə demişdim ki, Azərbaycan xalqı heç vaxt işğalla barışmayacaq. Dəfələrlə demişdim ki, nəyin bahasına olursa-olsun biz öz torpaqlarımızı geri qaytaracağıq. Dəfələrlə demişdim ki, düşmən öz xoşu ilə torpaqlarımızdan çıxmasa, biz onu torpaqlarımızdan qovacağıq və belə də oldu. Biz Birinci Qarabağ müharibəsindəki məğlubiyyətlə barışmadıq, güc topladıq, bütün gücləri səfərbər etdik, ordumuzu gücləndirdik, ölkə iqtisadiyyatını gücləndirdik, ölkəmizin nüfuzunu qaldırdıq və öz tarixi missiyamızı şərəflə yerinə yetirdik.”
Prezident İlham Əliyev, 27 sentyabr 2021

Ümummilli Lider Heydər Əliyevin xidmətləri sayəsində formalaşan Azərbaycan Silahlı Qüvvələri bu gün Müzəffər Ali Baş Komandan İlham Əliyevin rəhbərliyi altında xalqımıza Qələbəni bəxş etmiş müzəffər Orduya çevrilib. 2003-cü ildən etibarən ordu quruculuğu dövlət siyasətinin prioriteti kimi müəyyən olunmuş, planlı və ardıcıl işlər Azərbaycan ordusunu dünyanın ən güclü 50 ordusu sırasına çıxarmışdır.

Son illərdə Silahlı Qüvvələrin maddi-texniki təchizatı yenilənmiş, müasir infrastruktur yaradılmış, hərbi qulluqçuların sosial müdafiəsi və mənzil təminatı yaxşılaşdırılmış, müdafiə sənayesi inkişaf etdirilmişdir. Azərbaycan zavodlarında müxtəlif növ hərbi texnika, zirehli maşınlar, pilotsuz uçuş aparatları və atıcı silahlar istehsal olunur, bu da ordumuzu əhəmiyyətli dərəcədə təchiz etməyə imkan verir.

Azərbaycanın hərbi sənaye kompleksi ölkənin hərbi qüdrətini artırmış, mindən çox hərbi təyinatlı məhsul istehsal edilmiş və beynəlxalq sərgilərdə nümayiş olunmuşdur. Silah və texnika satın alınması, həmçinin bir sıra ölkələrlə hərbi əməkdaşlıq müqavilələri milli ordunun döyüş qabiliyyətini daha da möhkəmləndirmişdir.

Azərbaycan Silahlı Qüvvələri 44 gün davam edən Vətən müharibəsində düşmən üzərində qələbə qazanaraq tarixi nailiyyət əldə etdi. 2020-ci ilin 27 sentyabrında başlayan müharibə nəticəsində 300-dən çox şəhər və kənd işğaldan azad edildi, düşmən kapitulyasiya aktına imza atmağa məcbur oldu və ölkəmizin ərazi bütövlüyü bərpa edildi.

Qələbə diplomatiyası da müharibənin əhəmiyyətli tərəfini təşkil etdi. Prezident İlham Əliyev müharibə dövründə 30-dan çox beynəlxalq media qurumuna müsahibə verərək Azərbaycanın haqq işini dünya ictimaiyyətinə çatdırdı. Bu müsahibələr informasiya mübarizəsində yeni üslub və strategiya nümunəsi oldu, Azərbaycanın mövqeyini gücləndirdi.

Vətən müharibəsində qazandığımız Zəfərin əbədiləşdirilməsi üçün xüsusi tədbirlər həyata keçirilib. Azərbaycan Bayrağı Xankəndidə qaldırılıb, “Zəfər” və “Qarabağ” ordenləri, eləcə də 15 yeni medal təsis olunub. Qəhrəman hərbi qulluqçularımız və mülki iştirakçılar müxtəlif orden və medallarla təltif olunmuş, onların xidmətləri yüksək qiymətləndirilmişdir.

Zəfər Günü 3 dekabr 2020-ci il tarixli sərəncamla təsis edilib və hər il noyabrın 8-də təntənəli şəkildə qeyd olunur. Həmçinin, Vətən Müharibəsi Memorial Kompleksi, Zəfər muzeyi, Hərbi Qənimətlər Parkı və Zəfər Parkı yaradılaraq xalqımızın qəhrəmanlığının və tarixi zəfərin əbədiləşdirilməsi təmin edilmişdir.

Qələbəmizin şərəfinə keçirilən hərbi paradlar da strateji və rəmzi əhəmiyyət daşıyır. 2020-ci ildə keçirilən Zəfər paradında Azərbaycan və türk hərbçiləri iştirak etmiş, 2025-ci ildə isə Türk və Pakistan hərbçilərinin nümunəvi keçidi ilə Azərbaycan-Türkiyə-Pakistan dostluğu və qardaşlığının möhkəm təməlləri nümayiş etdirilmişdir.

Azərbaycan xalqı və Ordusu Müzəffər Ali Baş Komandan İlham Əliyevin rəhbərliyi altında tarixi Zəfəri qazandı, ərazi bütövlüyünü bərpa etdi və milli qüruru yüksəltdi. Bu salnamə, xalqımızın əzmkarlığının və ordumuzun gücünün əbədiləşmiş sübutudur.