Bu Amnistiya aktı Prezident İlham Əliyevin ümumbəşəri humanizm dəyərlərinə sadiqliyini əks etdirən mühüm təşəbbüsdür.

Prezident cənab İlham Əliyevin “Konstitusiya və Suverenlik İli” münasibətilə amnistiyanın elan edilməsi təşəbbüsü Azərbaycan dövlətinin hüquqi dövlət, humanizm və sosial ədalət prinsiplərinə sadiqliyinin növbəti bariz nümunəsidir. Bu təşəbbüs yalnız hüquqi xarakter daşımır, eyni zamanda cəmiyyətə ünvanlanmış mühüm sosial və mənəvi mesajdır. Dövlətin gücünün insan hüquqlarına hörmət və vətəndaşa qayğı üzərində qurulduğunu bir daha nümayiş etdirir. Azərbaycan Respublikasının Konstitusiyası ölkədə hüquqi münasibətlərin əsasını təşkil edir, insan və vətəndaş hüquq və azadlıqlarının təminatçısı rolunu oynayır. Suverenlik isə xalqın iradəsinin ifadəsi, dövlətin müstəqil siyasət yürütmək imkanının hüquqi və siyasi təminatıdır.
“Konstitusiya və Suverenlik İli”nin elan edilməsi bu dəyərlərin cəmiyyət həyatında daha dərindən təşviq olunmasına, hüquqi şüurun gücləndirilməsinə xidmət edir. Məhz bu kontekstdə amnistiya təşəbbüsünün irəli sürülməsi xüsusi rəmzi məna daşıyır. Amnistiya institutu Azərbaycan dövlətinin cəza siyasətində humanist yanaşmanın mühüm alətlərindən biridir. Sayca 13-cü olan Amnistiya aktı 20 mindən çox şəxsə şamil olunacaq. Humanizm prinsiplərinə sadiqliyin əsası Ulu Öndər Heydər Əliyev tərəfinfən qoyulub. Ümummilli Liderin rəhbərliyi ilə qəbul edilən Azərbaycan Respublikasının Konstitusiyası müasir dövlətçiliyimizin hüquqi təməlini formalaşdırmışdır. Möhkəm təməl üzərində qurulan dövlət siyasəti bu gün Prezident cənab İlham Əliyev tərəfindən uğurla və qətiyyətlə davam etdirilir.
Prezident cənab İlham Əliyev ölkəyə rəhbərliyə başladığı vaxtdan indiyədək humanizm onun həyata keçirdiyi dövlət siyasətinin əsas ideoloji dayaqlarından birini təşkil edir. Son 22 ildə həyata keçirilən siyasi kursun əsas amillərindən biri də insan amili, vətəndaş rifahı, sosial ədalət və mərhəmət prinsipləridir. Məhz bu humanist yanaşmanın nəticəsidir ki, ölkəmizdə cinayət-hüquq siyasətinin formalaşdırılmasında da humanizm əsas prinsip kimi qəbul edilib. Dövlətimizin başçısı bu ənənələrə sadiqliyini nümayiş etdirərək 15 dekabr 2025-ci ildə Amnistiya elan edilməsi təşəbbüsünü irəli sürüb. Prezident bu təşəbbüsü irəli sürərkən, ilk növbədə, suverenliyimizin bərpasının, Konstitusiyamızın ali hüquqi qüvvəsinin ölkəmizin bütün ərazilərində bərqərar olunmasının xalqımızın ən böyük tarixi Qələbəsi olduğunu nəzərə alıb. Dövlətimizin başçısı, eyni zamanda, humanizm və mərhəmət ənənələrinə sadiq qalaraq, cəzadan azad etmənin tərbiyəvi əhəmiyyətinə inanaraq, cəzadan azad olunacaq şəxslərin qanunlara dönmədən əməl edəcəklərinə və dövlətimizin inkişafına öz töhfələrini verəcəklərinə ümid edib.
Son illərdə qəbul olunan Amnistiya aktından fərqli olaraq bu sənəd ilk dəfə olaraq istintaq və məhkəmədə işi baxılan amnistiya aktının təsiri altına düşən şəxslərə şamil olunucaq. Budəfəki Amnistiyanın 20 minə yaxın şəxsə şamil oluncağı bundan irəli gəlir. Birdən-birə 20 min məhkumu cəzadan azad etmək mümkün deyil. Prezident cənab İlham Əliyevin təklifi sayəsində amnistiya aktı tətbiq ediləcəyi şəxslərin, o cümlədən azadlıqdan məhrumetmə cəzasından azad ediləcək məhkumların sayına görə ən böyük amnistiya olacaq. Belə ki, Amnistiya aktının ümumilikdə, 20 mindən çox şəxsə şamil ediləcəyi gözlənilir. Bunlardan, 5 mindən çox məhkumun azadlıqdan məhrumetmə cəzasından azad ediləcəyi, həmin cəzaya məhkum olunmuş 3 mindən artıq şəxsin cəzasının azaldılacağı, daha minlərlə şərti azadlıqdan məhrum edilmiş və digər cəzalarla cəzalandırılmış şəxslərin cəzadan azad olunması gözlənilir.
Bu Amnistiya aktı Prezident cənab İlham Əliyevin ümumbəşəri humanizm dəyərlərinə sadiqliyini əks etdirən mühüm təşəbbüsdür. “Konstitusiya və Suverenlik İli” münasibətilə amnistiyanın elan edilməsi təşəbbüsü dövlət-vətəndaş münasibətlərində etimadın möhkəmləndirilməsinə, hüquqi dövlət prinsiplərinin dərinləşməsinə xidmət edir. Bu addım həm Konstitusiyanın ruhuna, həm də Azərbaycanın müstəqil və suveren dövlət kimi müəyyənləşdirdiyi strateji inkişaf xəttinə tam uyğun olmaqla, cəmiyyətə birlik, bağışlama və gələcəyə inam mesajı verir.

Hüseyn Rzayev ,
Salyan Rayon Məhkəməsinin böyük məsləhətçisi