"Birləşmiş Millətlər Təşkilatının ilk dəfə olaraq dekabrın 15-ni Dünya Türk Dili Ailəsi Günü kimi qeyd etməsi tarixi, mənəvi və siyasi baxımdan olduqca əhəmiyyətli hadisədir. Bu qərar türk dillərinin zənginliyinin və çoxəsrlik mədəni irsinin beynəlxalq səviyyədə tanınması deyil, dillərarası bərabərliyin, mədəni müxtəlifliyin və xalqlar arasında qarşılıqlı hörmətin təşviqi baxımından mühüm addımdır".
Bu fikirləri Redaktor.az-a açıqlamasında Milli Məclisin deputatı, Ana Vətən Partiyasının sədr müavini Günay Ağamalı Birləşmiş Millətlər Təşkilatının ilk dəfə Türk Dili Ailəsi Gününü qeyd etməsindən danışarkən bildirdi.
Parlamentari qeyd etdi ki, türk dilləri Avrasiya məkanında yüz milyonlarla insanın ünsiyyət vasitəsidir:
"Bu böyük sivilizasiyanın yaddaşı, tarixi təcrübəsi, düşüncə tərzi və mənəvi dəyərlər sistemidir. Dünya Türk Dili Ailəsi Gününün təsis edilməsi bu irsin qorunmasına, inkişafına və gələcək nəsillərə ötürülməsinə beynəlxalq diqqətin artırılmasına xidmət edir. İlk dəfə olaraq bu tip müsbət qərarın qəbul edilməsi məhz Türk Dövlətləri Təşkilatının (TDT) qlobal müstəvidə artan nüfuzunun, gücünün göstəricisidir. Artıq TDT güc mərkəzi kimi qəbul edilir və diqqət göstərilir. Bu vacib qərar hər birimizin, böyük türk ailəsinin uğurudur. Azərbaycan üçün bu qərarın xüsusi mənası var. Ana dilimiz olan Azərbaycan dili milli kimliyimizin, dövlət müstəqilliyimizin və mədəni suverenliyimizin əsas dayaqlarından biridir".
Millət vəkili qeyd etdi ki, İlham Əliyevin rəhbərliyi ilə ana dilimizin qorunması, onun beynəlxalq nüfuzunun artırılması və türk dünyası ilə mədəni bağların möhkəmləndirilməsi dövlət siyasətinin prioritet istiqamətlərindəndir.
"Bu kontekstdə BMT-nin qərarı Azərbaycanın apardığı məqsədyönlü siyasətlə tam uyğun gəlir. Hesab edirəm ki, Dünya Türk Dili Ailəsi Günü türk dövlətləri və xalqları arasında mədəni-humanitar əməkdaşlığın daha da dərinləşməsinə, ortaq dəyərlərin təşviqinə və gənc nəsildə dilə, tarixə və kimliyə bağlılığın gücləndirilməsinə mühüm töhfə verəcəkdir. Türk dillərinin beynəlxalq elmi, mədəni və diplomatik platformalarda daha geniş təmsil olunması üçün yeni imkanlar açır, sülhə, mədəni dialoqa və xalqlar arasında qarşılıqlı anlaşmaya xidmət edən mühüm beynəlxalq təşəbbüsdür. Bu, türk dil ailəsinin bəşəri mədəniyyətə verdiyi töhfələrin dünya miqyasında tanınmasının bariz göstəricisidir", - deyə Günay Ağamalı yekunlaşdırdı.
