Yeni Azərbaycan Partiyasının 33 illik şərəfli inkişaf yolu

Yeni Azərbaycan Partiyası 1992-ci il noyabr ayının 21-də Naxçıvanda Ulu Öndər Heydər Əliyevin sədrliyi ilə və 550 nəfərdən ibarət təşəbbüs qrupunun iştirakı ilə keçirilən təsis konfransı ilə yaradılan, 1992-ci il dekabr ayının 18-də Ədliyyə Nazirliyi tərəfindən rəsmi qeydiyyata alınan siyasi partiyadır. 
Yeni Azərbaycan Partiyası Azərbaycan Respublikasının Konstitusiyası və qanunvericiliyi çərçivəsində, özünün Nizamnaməsi və Proqramı əsasında fəaliyyət göstərən, öz sıralarında Azərbaycanda hüquqi dövlət, sabit və sosialyönümlü iqtisadiyyat, vətəndaş cəmiyyəti qurmaq ideyalarını qəbul edən vətəndaşları birləşdirən sağ mərkəzyönümlü siyasi partiyadır.
Müxalifət partiyası kimi yaranan YAP 1993-cü ildə partiyanın sədri Heydər Əliyevin prezident seçilməsi, 1995-ci ildə keçirilən parlament seçkilərində qalib gəlməklə Azərbaycanda iqtidar partiyasına çevrildi. Yeni Azərbaycan Partiyasının sədri 1992–2003-cü illərdə Heydər Əliyev olub. 2005-ci ildən isə YAP-ın sədri İlham Əliyevdir.
Bu gün biz Yeni Azərbaycan Partiyasının 33 illiyini qeyd edirik. 1992-ci ildə Heydər Əliyevin siyasi iradəsi və milli məsuliyyət çağırışı əsasında yaradılan partiya, qısa müddətdə ölkənin xilası, dövlət quruculuğu və inkişaf strategiyasının nəzəri-praktik bazasına çevrildi. Bu illər ərzində partiya: siyasi idarəçilikdə ardıcıllıq və sabitlik təmin etmiş, iqtisadi islahatların həyata keçirilməsinə geniş ictimai dəstək formalaşdırmış, Qarabağ məsələsinin həlli üçün mütəşəkkil siyasi iradənin ortaya qoyulmasına mühüm töhfə vermişdir.
YAP-ın regional nüfuzu və siyasi çəkisi Cənubi Qafqazın siyasi coğrafiyasında ayrıca qeyd olunmalıdır. Azərbaycan Respublikasının regional liderlik mövqeyi, 2020-ci ildə əldə olunan tarixi Zəfər, regionda sabitliyin bərpası və yeni geosiyasi düzən YAP-ın siyasi xəttinin nəticələridir.
Prezident İlham Əliyevin vurğuladığı kimi, YAP təkcə daxili siyasətdə deyil, həm də regionun siyasi mühitində mühüm aktordur. Azərbaycanın güclənən iqtisadiyyatı, müstəqil xarici siyasəti, enerji və nəqliyyat layihələrinin reallaşması partiyanın ideoloji xəttinin nəticəsidir.
Bu gün YAP-ın qarşısında yeni vəzifələr dayanır: postmüharibə dövründə Qarabağ və Şərqi Zəngəzurda aparılan bərpa proseslərinə ictimai dəstək, ölkənin dayanıqlı iqtisadi inkişaf modelinin möhkəmləndirilməsi, cəmiyyətin bütün təbəqələrinin siyasi fəallığının artırılması, regionda sülh və əməkdaşlıq gündəliyinin təşviqi.
Partiya yeni mərhələdə həm milli birliyə, həm siyasi sabitliyə, həm də inkişaf strategiyasının davamlılığına xidmət edən əsas siyasi güc olaraq qalır.
Yeni Azərbaycan Partiyasının 33 illik yolu Azərbaycanın dövlətçilik tarixində misilsiz rol oynayıb. 

YAP Şirvan şəhər təşkilatının
 təşkilati məsələlər üzrə məsləhətçi İsrayılov Amil Faiq oğlu