Vətən müharibəsi bizim şanlı tariximiz, şəhidlər və qazilər qürur mənbəyimizdir

Azərbaycan xalqının müasir tarixi 2020-ci ilin 27 sentyabrında başlanmış Vətən müharibəsi ilə yeni bir mərhələyə qədəm qoydu. 44 gün davam edən bu müharibə xalqımızın iradəsini, dövlətimizin gücünü və ordumuzun qəhrəmanlığını nümayiş etdirərək dünya hərb tarixinə yazıldı. Qarabağın azad olunması həm hərbi, həm siyasi, həm də mənəvi baxımdan tarixi ədalətin bərpası oldu.
Ermənistan illərlə davam edən işğalçılıq siyasətini danışıqlar prosesində imitasiya ilə ört-basdır etməyə çalışır, yeni torpaqlara iddia edir və təxribatlar törədirdi. Azərbaycan dəfələrlə sülh çağırışları etsə də, nəticəsiz qalan bu proses xalqımızı haqq mübarizəsinə qalxmağa məcbur etdi. Prezident İlham Əliyevin qətiyyətli mövqeyi – “Azərbaycan xalqı heç vaxt işğalla barışmayacaq!” – artıq döyüş meydanında reallığa çevrildi.
Bu müharibədə ən böyük güc xalq və ordunun birliyi oldu. 10 milyonluq Azərbaycan xalqı bir yumruq kimi birləşərək “Dəmir Yumruq” kimi düşmənin üzərinə çırpıldı. Ön cəbhədə döyüşən igidlərimiz arxasında bütöv bir millətin iradəsini hiss edir, Prezidentin qətiyyətli rəhbərliyi ilə xalqın sevgisini gücünə qatırdı. Bu birlik yalnız düşməni darmadağın etmədi, həm də işğalçılıq siyasətinə birdəfəlik son qoydu.
Azərbaycan əsgərinin qəhrəmanlığı Vətən müharibəsinin ən parlaq səhifələrini yazdı. Xüsusilə Şuşa uğrunda döyüşlər bu qəhrəmanlığın zirvəsi oldu. Əliyalın dağlara qalxaraq, düşmənin istehkamlarını yararaq şəhərə daxil olan igidlərimiz işğalçıları diz çökdürdü. Şuşanın azad edilməsi Böyük Qələbənin rəmzi, Qarabağın xilası oldu. 8 noyabr – Zəfər Günü xalqımızın yaddaşına əbədi yazıldı.
Bu zəfər minlərlə şəhidimizin qanı bahasına qazanıldı. Onların hər biri xalqımızın qürur simvoludur. Şəhidlərimizin igidliyi və qazilərimizin fədakarlığı bu Qələbəni mümkün etdi. Dövlətimiz bu qəhrəmanlığa ən yüksək qiymət verir, şəhid ailələri və qazilər daim diqqət və qayğı ilə əhatə olunur. Onların qoyduğu müqəddəs iz gələcək nəsillərə örnəkdir.
Azərbaycan Ordusunun tətbiq etdiyi müasir taktika, texnologiyadan səmərəli istifadə, strateji qərarların düzgün verilməsi bu müharibəni dünya hərbi akademiyalarında öyrəniləcək səviyyəyə qaldırdı. XXI əsrin yeni hərb modeli məhz Azərbaycandan nümunə götürülərək təqdim edildi və bu modelin əsasında xalq sevgisi, vətənpərvərlik və siyasi iradə dayanırdı.
Lakin müharibədən sonrakı dövrdə də təhlükəsizlik tam təmin olunmamışdı. Separatçı qrupların təxribatları, Ermənistanın revanşist planları Azərbaycanın suveren addımlarını zəruri etdi. 2023-cü ilin sentyabrında keçirilən lokal antiterror tədbirləri bir gündən az müddətdə separatçıların kökünü kəsdi və Azərbaycan öz dövlət suverenliyini tam bərpa etdi. Bu tarixi qələbənin ardınca Prezident İlham Əliyev 15 oktyabr 2023-cü ildə Xankəndi, Xocalı, Xocavənd və Ağdərədə üçrəngli bayrağımızı ucaltdı. Bu, sadəcə bir bayraq qaldırma mərasimi deyildi, həm də 30 illik həsrətə son qoyulmasının, dövlətimizin qətiyyətinin və xalqımızın tarixi zəfərinin təntənəsi idi.
Bu gün qalib Azərbaycan yeni bir mərhələyə qədəm qoyub. İşğaldan azad olunmuş torpaqlarda genişmiqyaslı bərpa və quruculuq işləri aparılır. Xarıbülbülün diyarı Şuşadan Füzuliyə, Zəngilana qədər hər yerdə həyat yenidən canlanır. Hava limanları, yollar, məktəblər, xəstəxanalar, kəndlər və şəhərlər salınır. Bu quruculuq siyasəti bir daha sübut edir ki, şəhidlərimizin qanı yerdə qalmadı – onların müqəddəs arzusu olan azad torpaqlarda indi həyat çiçəklənir.
Azərbaycan xalqı Vətən müharibəsini şanlı tariximiz kimi uca tutur. Şəhidlərimizin ruhu qarşısında baş əyir, qazilərimizin qəhrəmanlığı ilə fəxr edir. Bu Qələbə gələcək nəsillərə ən böyük mirasdır – qalib, qüdrətli və əbədi Azərbaycan!

Sahib Əmirxanov,
Salyan rayon Pambıqkənd kənd tam orta məktəbin müəllimi, YAP fəalı
Vətən müharibəsi iştirakçısı