Biz qayıtmalıydıq... və qayıtdıq: Milli ideyanın zəfəri”

2025-ci il mayın 28-də - Azərbaycan Xalq Cümhuriyyətinin elan olunmasının 107-ci ildönümündə Prezident İlham Əliyevin səsləndirdiyi fikirlər yalnız bir nitq çərçivəsində qalmadı. Bu sözlər bütöv bir epoxanı, tarixi bir mərhələni, Azərbaycan xalqının iradəsini və dövlətin strateji uzaqgörənliyini özündə ehtiva edən bir çağırış, bir hesabat və eyni zamanda gələcəyə yönəlik hədəf kimi səsləndi.
Prezident İlham Əliyevin çıxışında ön plana çıxardığı əsas məqamlardan biri gənc nəslin düzgün ruhda yetişdirilməsi oldu. Bu, sadəcə tərbiyə prosesi deyildi - bu, milli təhlükəsizlik, dövlət suverenliyi və strateji davamlılıq baxımından həyata keçirilən məqsədyönlü siyasətin ayrılmaz tərkib hissəsidir.
Son illərdə Azərbaycanda həyata keçirilən dövlət proqramları - istər təhsil sistemində vətənpərvərlik mövzularının gücləndirilməsi, istər orduda gənclərin mənəvi hazırlığının artırılması, istərsə də mədəniyyət və informasiya sahəsində milli kimliyin təbliği - hamısı bu nəticəni şərtləndirdi. Bu gün Azərbaycanın gəncləri təkcə silah tutmağı deyil, həm də Vətəni sevməyi, onun tarixini bilməyi, milli maraqları müdafiə etməyi bacaran nəsildir.
Bu ruhda yetişdirilən nəsil 44 günlük Vətən müharibəsində ön cəbhədə, arxa cəbhədə, informasiya müharibəsində və diplomatik müstəvidə fəallıq göstərdi. Prezidentin qeyd etdiyi kimi, məhz belə bir gənc nəsil Qələbənin reallaşmasında həlledici rol oynadı. Bu Qələbə yalnız ərazi baxımından deyil, ideoloji və mənəvi baxımdan da strateji dönüş nöqtəsi oldu.
Prezident İlham Əliyevin çıxışında səsləndirdiyi “Biz qayıtmalıydıq və qayıtmışıq” sözlərinin arxasında təkcə fiziki qayıdış deyil, mənəvi, siyasi və tarixi reabilitasiya dayanır. Bu sözlər işğal dövrünün ağrılarını, didərginlik illərinin həsrətini, haqq və ədalət uğrunda aparılan mübarizənin nəticəsini bir cümlədə əks etdirir.
Azərbaycan xalqı bu qayıdışı heç vaxt unutmadı, heç vaxt ondan vaz keçmədi. Hər bir ailədə, hər bir nəsildə bu ideya — torpağa bağlılıq, Vətənin hər qarışının müqəddəsliyi və geri dönüş arzusu yaşadı. Dövlət isə bu arzunu məqsədə, sonra isə gerçəkliyə çevirdi. 2020-ci ildə baş vermiş 44 günlük müharibə və onun davamı olaraq 2023-cü ildə keçirilən lokal antiterror tədbirləri nəticəsində Azərbaycan öz suverenliyini bərpa etdi. Bu proses təsadüfi deyil, illərlə planlaşdırılan və mərhələli şəkildə həyata keçirilən milli strategiyanın nəticəsi idi.
Bu gün Azərbaycan xalqı artıq qayıtdığı torpaqlarda yeni həyat qurur. Qayıdış həm də yeni başlanğıcdır — inkişafın, sabitliyin, sülhün və tərəqqinin yeni mərhələsi.
Prezidentin çıxışı həm də dövlətçilik ideyasının davamlılığı baxımından mühüm bir mesaj idi. 1918-ci ildə yaradılmış Azərbaycan Xalq Cümhuriyyətinin idealları — azadlıq, milli suverenlik, xalq hakimiyyəti - bu gün müasir Azərbaycan Respublikasında tam reallaşmaqdadır. 28 Mayda səslənən bu fikirlər xalqın öz müqəddəratını təyin etmək hüququnun, tarix qarşısında məsuliyyətin və gələcək nəsillərə olan borcun simvoluna çevrildi.
Bu gün Azərbaycan yalnız öz ərazisini deyil, həm də öz kimliyini, tarixini, milli şərəfini qoruyub saxlayır və gələcəyə daşıyır. Prezidentin sözlərində bu ideya aydın sezilir: dövlətçiliyimiz yalnız hüquqi sənədlərlə deyil, xalqın yaddaşında və gündəlik həyatında yaşamalıdır. Bu isə xalq-iqtidar birliyi, milli həmrəylik və aydın strateji vizyon olmadan mümkün deyil.
Prezident İlham Əliyevin mayın 28-də səsləndirdiyi fikirlər, əslində, Azərbaycanın bu gün içindən keçdiyi dövrün mahiyyətini dəqiqliklə ifadə edir: bu dövr qələbədən bərqərar olmağa, dağıntılardan quruculuğa, həsrətdən qürura keçid dövrüdür. Burada əsas ideya ondan ibarətdir ki, Azərbaycan öz gücünü yalnız hərbi sahədə deyil, milli birlik, mədəni irs, vətənpərvərlik və dövlətə bağlılıqla sübut etdi. Bu dəyərlər üzərində qurulan gələcək isə daha güclü, daha sabit və daha müstəqil olacaq.

Heydər Quliyev,
Salyan RİH başçısı aparatının Vətən müharibəsi iştirakçıları 
və şəhid ailələri ilə işin təşkili şöbəsinin böyük məsləhətçisi, 
Vətən müharibəsi iştirakçısı, YAP fəalı