Azərbaycan-Vyetnam münasibətləri dostluq və qarşılıqlı hörmət əsasında inkişaf etməkdədir

Mayın 7-də Vyetnam Kommunist Partiyasının Mərkəzi Komitəsinin Baş katibi To Lamın ölkəmizə səfəri dövlətlərarası münasibətlərin daha da möhkəmlənməsinə mühüm töhfə kimi böyük əhəmiyyətə malikdir. Səfər çərçivəsində tərəflər qarşılıqlı fəaliyyətin dərinləşdirilməsi məqsədilə müxtəlif sahələrdə yeni inkişaf istiqamətlərini müzakirə ediblər. Dövlətimizin başçısı diqqətə çatdırıb ki, Vyetnam lideri cənab Lamın səfəri daha fəal əməkdaşlığa mühüm təkan olacaq, Azərbaycanla Vyetnam arasında münasibətlərin dostluq və qarşılıqlı hörmət ruhunda inkişafı üçün yeni üfüqlər açacaq.
Azərbaycan və Vyetnam 60 ildən artıq dövrə söykənən tarixi dostluq, tərəfdaşlıq münasibətlərinə malikdir. İki ölkə əsas sektorlarda praqmatik yanaşma və ümumi maraqlara əsaslanan davamlı və qarşılıqlı faydalı əlaqələr qurur. Azərbaycan və Vyetnam münasibətləri BMT və Qoşulmama Hərəkatı çərçivəsində qarşılıqlı etimada və dəstəyə əsaslanan konstruktiv əməkdaşlıq kimi xarakterizə olunur. Beynəlxalq hüququn norma və prinsiplərinə və eləcə də BMT TŞ-nın müvafiq qətnamələrinə uyğun olaraq ölkəmizin ərazi bütövlüyü, suverenliyi və beynəlxalq səviyyədə tanınmış sərhədlərinin toxunulmazlığına verdiyi dəstəyi ilə ədalətli mövqe sərgiləyən Vyetnamla Azərbaycan arasında dostluq münasibətləri mövcuddur. Bu münasibətlər dövlətlərimizin mənafeyinə uyğun ikitərəfli və çoxtərəfli müstəvidə tərəfdaşlığın daha da genişləndirilməsinə zəmin yaradır. Bu günə qədər dövlətlərimiz arasında imzalanmış 20-dən çox müxtəlif məzmunlu Saziş və Anlaşmalar Azərbaycanla Vyetnam arasında siyasi, iqtisadi, elmi, ədəbi-mədəni əlaqələrin möhkəmlənməsinə, mədəni diplomatiyanın güclənməsinə əhəmiyyətli töhfələr verməkdədir. İkitərəfli münasibətlərin inkişafından bəhs edərkən ilk növbədə qeyd etmək lazımdır ki, qarşılıqlı səfərlər fəaliyyət istiqamətlərinin müəyyənləşdirilməsinə mühüm təsir göstərib. 1959-cu ildə Vyetnam Demokratik Respublikasının Prezidenti Ho Şi Minin Azərbaycan SSR-ə səfəri ikitərəfli əməkdaşlığın təməlini qoyub.
Ümummilli Lider Heydər Əliyevin 1983-cü ildə Vyetnama etdiyi səfər isə bu əlaqələrin daha da möhkəmlənməsinə zəmin yaradıb. 2014-cü ildə Azərbaycan Prezidenti cənab İlham Əliyevin Vyetnama dövlət səfəri və 2015-ci ildə Vyetnam Prezidenti Çıonq Tan Şanqın ölkəmizə etdiyi rəsmi səfər qarşılıqlı təşəbbüslərin reallaşmasına töhfə verib. Bu səfərlər çərçivəsində iqtisadiyyat, enerji, ticarət, turizm və digər sahələrdə bir çox strateji sazişlər imzalanıb. Həmçinin Birinci Azərbaycan-Vyetnam biznes forumu da iqtisadi əlaqələrin inkişafında mühüm rol oynayıb. 2024-cü ildə iki ölkə arasında əmtəə dövriyyəsi 223,93 milyon ABŞ dollarına çatıb. Bu göstərici gələcəkdə daha geniş iqtisadi əməkdaşlıq üçün zəmin yaradır. Xüsusilə neft sektorunda 2019-cu ildə SOCAR ilə Vyetnamın “Binh Son Refinery and Petrochemical Company” şirkəti arasında imzalanmış müqavilə tərəfdaşlığın genişlənməsinə töhfə verib. Ölkəmizin neft mütəxəssisləri uzun illər Vyetnamın enerji sənayesinin inkişafında mühüm rol oynayıblar. Turizm sahəsində birgə təşəbbüslərin reallaşdırılması da əsas istiqamətlərdən biridir. Bakı ilə Vyetnam şəhərləri arasında birbaşa hava xəttinin açılması, mədəni proqramların icrası, səhiyyə və ətraf mühitlə bağlı layihələrin təşviqi bu istiqamətdə imkanları daha da artıracaq. Həmçinin Azərbaycan vyetnamlı tələbələri təqaüd proqramları çərçivəsində təhsil imkanları ilə dəstəkləməyə hazırdır. Prezident İlham Əliyev bildirib ki, bu, akademik mübadilə, elmi tədqiqatlar və Azərbaycanla Vyetnam arasında şəxsi təmasların möhkəmləndirilməsi üzrə imkanları yaxşılaşdıracaq. Dövlətimizin başçısı qeyd edib ki, mübadilə proqramlarının reallaşdırılması, həmçinin elmi-texniki sahədə əməkdaşlıq ikitərəfli münasibətlərin inkişafı üçün daha bir perspektivli istiqamətə çevrilə bilər. Bu dost ölkələrin strateji işbirliyi tarixən möhkəm bir təməl üzərində qurulmuşdur və gələcək inkişaf üçün geniş imkanlar mövcuddur. İqtisadi, mədəni, humanitar və siyasi sahələrdə əməkdaşlıq iki ölkənin xalqları arasında daha sıx münasibətlərin qurulmasına və qarşılıqlı faydalı tərəfdaşlığın inkişafına təkan verəcək. Bu proses, həmçinin gələcəkdə regionda və beynəlxalq arenada daha təsirli birgə fəaliyyət imkanlarının yaranmasına şərait yaradacaq.

Səmra Əhmədova,
Salyan rayon Heydər Əliyev Mərkəzinin əməkdaşı, YAP fəalı