Azərbaycan-Gürcüstan tərəfdaşlığı Cənubi Qafqazda davamlı sülh, iqtisadi inkişaf və təhlükəsizlik üçün mühüm təməldir

Azərbaycan və Gürcüstan arasında münasibətlər uzun illərə söykənən dostluq, mehriban qonşuluq və strateji tərəfdaşlıq prinsipləri üzərində qurulmuşdur. Hər iki ölkə regional sabitlik və inkişaf naminə siyasi, iqtisadi və mədəni sahələrdə sıx əməkdaşlıq edir. Bu əlaqələrin daha da möhkəmləndirilməsi məqsədilə 2025-ci ilin aprel ayında Gürcüstan Prezidenti Mixeil Kavelaşvili Azərbaycana rəsmi səfər etmişdir.
Prezident Mixeil Kavelaşvilinin Azərbaycana səfəri iki ölkə arasında strateji əməkdaşlığın daha da dərinləşməsi baxımından mühüm əhəmiyyət daşıyır. Səfər çərçivəsində Prezident İlham Əliyevlə keçirilən görüşlərdə siyasi dialoqun davam etdirilməsi, iqtisadi layihələrin genişləndirilməsi və enerji sahəsində əməkdaşlığın yeni mərhələyə keçməsi müzakirə olunmuşdur.
Tərəflər arasında imzalanan sənədlər enerji təhlükəsizliyi, yaşıl enerji layihələri, ticarət əlaqələrinin genişləndirilməsi və sərhəd təhlükəsizliyi sahəsində əməkdaşlığı əhatə edir. Həmçinin, təhsil, mədəniyyət və gənclər siyasəti sahələrində birgə proqramların həyata keçirilməsi barədə razılıq əldə olunmuşdur.
Aprelin 16-da Azərbaycan Prezidenti İlham Əliyevlə Gürcüstanın Prezidenti Mixeil Kavelaşvilinin təkbətək görüşündən sonra hər iki ölkə başçısı mətbuata bəyanatlarla çıxış ediblər. Prezident İlham Əliyev çıxışı zamanı söyləyib ki, siyasi əlaqələr inkişaf edir, yüksək səviyyəli təmaslar müntəzəm xarakter daşıyır, fəal siyasi dialoq aparılır. İki dost, qardaş ölkə, sözün əsl mənasında, bir-birinə çox bağlıdır və beynəlxalq təşkilatlarda da daim bir-birini dəstəkləyir. Bununla yanaşı, ölkələrimizi birləşdirən bir çox sərmayə layihələrinin böyük coğrafiya üçün önəmli olduğu, Azərbaycan və Gürcüstanın birgə həyata keçirdiyi neft-qaz layihələri, neft-qaz kəmərləri, nəqliyyat-kommunikasiya layihələrinin böyük əhəmiyyət daşıdığı diqqətə çatdırılıb. Mətbuata bəyanatında enerji təhlükəsizliyi məsələsi barədə də danışan ölkə başçısı qeyd edib ki, Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil. Bildirilib ki, hazırda Gürcüstan daxil olmaqla, Azərbaycan 12 ölkəyə təbii qaz ixrac edir və bu, Gürcüstan vasitəsilə həyata keçirilir. Nəqliyyat-kommunikasiya sahəsində əldə edilmiş nailiyyətlər, yeni inşa olunmuş dəmir yolları, limanlar həm Azərbaycanda, həm Gürcüstanda böyük sinergiya yaradıb və Orta Dəhlizin ayrılmaz hissəsinə çevrilib.
Gürcüstan Prezidenti Mixeil Kavelaşvili isə ölkəsinin həmişə Azərbaycanın suverenliyini və ərazi bütövlüyünü dəstəklədiyini və dəstəkləməkdə davam edəcəyini bildirib. Mixeil Kavelaşvili, həmçinin Azərbaycan Prezidenti İlham Əliyevi Gürcüstana səfərə dəvət edib. Bildirilib ki, çoxsaylı səylərə baxmayaraq, hər iki dövlət təhlükələri qətiyyətlə aradan qaldırır, regionun təhlükəsizliyini və sabitliyini təmin edir. Azərbaycan ilə Gürcüstan arasında ümumi maraqların müdafiəsi sahəsində əməkdaşlığın intensivləşməsindən məmnunluq ifadə olunub.
Azərbaycan-Gürcüstan tərəfdaşlığı yalnız ikitərəfli münasibətlərə töhfə vermir, həm də Cənubi Qafqazın sabitliyi və inteqrasiyası üçün əsas baza rolunu oynayır. Regionda sülh gündəliyinin təşviqi, postmünaqişə dövrünün bərpası, nəqliyyat dəhlizlərinin açılması və enerji təhlükəsizliyinin təmin edilməsi baxımından rəsmi Bakı və Tbilisinin ortaq maraqları üst-üstə düşür. Bu kontekstdə Gürcüstanın rəsmi Bakı nümunəsində balanslaşdırılmış siyasəti Azərbaycanın enerji və iqtisadi gücü regional sabitliyin formalaşmasında mühüm rol oynayır. Gürcüstan Prezidenti Mixeil Kavelaşvilinin Azərbaycana ilk səfəri iki ölkə arasındakı dərin strateji münasibətlərin və qarşılıqlı etimadın bariz nümunəsidir. Prezident İlham Əliyevin müxtəlif beynəlxalq platformalarda Gürcüstanla bağlı fikirləri bu əməkdaşlığın yalnız regional deyil, eyni zamanda, qlobal çərçivədə əhəmiyyət daşıdığını göstərir. Azərbaycan-Gürcüstan tərəfdaşlığı isə Cənubi Qafqazda davamlı sülh, iqtisadi inkişaf və təhlükəsizlik üçün mühüm təməldir.

Avdi Həsənov,
Salyan Dövlət Aqrar İnkişaf Mərkəzində sektor müdiri, YAP fəalı