Yeni hədəflər ölkəmizin davamlı inkişaf strategiyasının mahiyyətindən qaynaqlanır

Aprelin 9-da ADA Universitetində Prezident İlham Əliyevin iştirakı ilə “Yeni dünya nizamına doğru” mövzusunda beynəlxalq forum keçirilib. Forumda qlobal çağırışlar geniş şəkildə müzakirə edilib, perspektivlər açıqlanıb.

Belə tədbirlər Azərbaycanla bağlı həqiqətlərin təbliğində əhəmiyyətli rol oynayır. Müxtəlif ölkələrdə keçirilməsindən asılı olmayaraq hər bir beynəlxalq platformada diqqət Azərbaycanın mövqeyinə yönəlir. Bu isə ölkəmizin uğurlu inkişaf modeli və dövlət başçısının qlobal nüfuzunun bariz göstəricisidir. Prezident İlham Əliyevin beynəlxalq birliyin qarşılaşdığı problemlərin həllinə verdiyi töhfələr, xüsusilə birlik və həmrəylik çağırışları beynəlxalq ictimaiyyət tərəfindən yüksək dəyərləndirilir. Əməkdaşlıq məkanı kimi tanınan Azərbaycan bu gün həmrəyliyə verdiyi töhfələrin miqyası ilə seçilir.

Cənab İlham Əliyev hər çıxışında tarixi Zəfərimizin yaratdığı reallıqlara və regionda dayanıqlı sülhə nail olunmasına xüsusi önəm verir. Forum zamanı da qeyd olundu ki, Azərbaycan və Ermənistan arasında sülh sazişi imzalanarsa, əməkdaşlıq üçün heç bir maneə qalmayacaq: “Bəli, hesab edirəm ki, nail olunması mümkün olan orta perspektivli hədəflər haqqında da danışa bilərik. Təəssüf ki, Ermənistanın illərlə davam edən işğal siyasəti Cənubi Qafqazın inteqrasiya olunmuş region kimi inkişafına imkan vermədi. Halbuki bu, mümkün idi. Lakin Azərbaycan xalqına qarşı təcavüz buna əngəl oldu. Bu gün Azərbaycanla Gürcüstan arasındakı münasibətlərə nəzər yetirdikdə enerji təhlükəsizliyi, daşımalar, siyasi dialoq, investisiyalar və iqtisadi üstünlüklər sahəsində əməkdaşlıq modelini görmək mümkündür. Ermənistan isə bu imkanlardan məhrum qaldı”.

Dövlət başçısı onu da əlavə etdi ki, Azərbaycandan gələn bütün əsas tranzit marşrutları – istər neft, qaz, istərsə də yük daşımaları Gürcüstandan keçir. Ermənistan isə özünü bu proseslərdən təcrid etdi və “böyük Ermənistan” xülyası naminə real iqtisadi və siyasi imkanlarını itirdi: “Hesab edirəm ki, vaxt itirməməliyik. Sülh sazişi məsələsində təşəbbüs artıq Ermənistandadır. Ərazi bütövlüyümüz və qarşı tərəfdən gözlədiklərimiz dəfələrlə açıq şəkildə ifadə olunub. Saziş imzalandıqdan sonra isə Cənubi Qafqazın inteqrasiya olunmuş regiona çevrilməsi üçün real şərait yaranacaq. Bəli, dərhal dostluq münasibətlərindən danışmaq tezdir, lakin etimadın artırılmasına yönəlik addımlara hazırıq”.

Beləliklə, Azərbaycan regionda sülh və əməkdaşlıq gündəliyinin müəllifi kimi öz real təşəbbüsləri ilə fərqlənir. Ədalətin və beynəlxalq hüququn yanında olan ölkəmizin xarici siyasət uğurları ardıcıl və davamlı şəkildə inkişaf edir.

Elmar Əhmədov

YAP Salyan rayon təşkilatının sədri