Azərbaycan-Pakistan əməkdaşlığı regionda və beynəlxalq arenada yeni geosiyasi reallıqlar yaradır

Azərbaycan-Pakistan münasibətlərinin tarixi uzun bir dövrü əhatə edir. Xüsusilə Pakistan Azərbaycanın müstəqilliyini tanıyan ilk dövlətlərdən biri olmuş və bu günədək Azərbaycanın ərazi bütövlüyünü birmənalı şəkildə dəstəkləmişdir. 1993-cü ilin aprelində Pakistan BMT Təhlükəsizlik Şurasına sədrlik edərkən Ermənistanın işğalını qınayan 822-ci qətnamə məhz bu dövrdə qəbul edilmişdir. Son 35 ildə Azərbaycan-Pakistan münasibətləri yüksələn xətt üzrə inkişaf etmiş, Pakistan prezidentləri və baş nazirləri dəfələrlə Azərbaycana səfər etmiş, eyni zamanda Azərbaycan prezidentləri dəfələrlə Pakistanda olmuşdur. Hər iki dövlət bir-birini daim dəstəkləmiş və strateji əməkdaşlığı gücləndirmişdir. Xüsusilə son 5 ildə tərəflər arasındakı münasibətlər daha intensiv inkişaf edir. Bu əlaqələr dövlət və cəmiyyət həyatının müxtəlif sahələrini əhatə edir. 
Rəsmi Bakı və İslamabad arasında bir qərinədən artıqdır müxtəlif istiqamətlərdə davam edən yüksək templi əlaqələr hər iki ölkənin əməkdaşlıqda nə qədər maraqlı olduğunu göstərir. Ticarət, enerji və infrastruktur sahələrində həyata keçirilən birgə layihələr, ticarət mübadiləsi, elmi-tədqiqat sahəsində əməkdaşlıq və hərbi sahədə koordinasiya əlaqələrin genişlənməsinə müsbət təsir göstərir. Regional təhlükəsizlik və sabitlik məsələlərində də rəsmi Bakı və İslamabad birgə fəaliyyət göstərir. Terrorizm, ekstremizm və digər təhlükələrə qarşı mübarizədə əməkdaşlıq iki ölkənin bir-birinə olan etimadını daha da artırır. Bu kontekstdə, Pakistanın Azərbaycanın müstəqilliyini dəstəkləyən strateji mövqeyi dostluq münasibətlərinin daha da dərinləşməsinə səbəb olub.
Fevralın 23-də Pakistan İslam Respublikasının Baş naziri Məhəmməd Şahbaz Şərifin ölkəmizə dövlət səfəri münasibətlərdə yeni spektrlərin açılması üçün önəmli mesaj rolunu oynadı. Səfərdən bir gün sonra Prezident İlham Əliyev və Pakistan İslam Respublikasının Baş naziri Məhəmməd Şahbaz Şərif mətbuata birgə bəyanatla çıxış etdilər. Bu mühüm siyasi hadisə iki ölkə arasında strateji əməkdaşlığın inkişafında yeni mərhələnin əsasını qoydu. Dövlət başçısı İlham Əliyev Pakistanın Baş naziri Şahbaz Şərifi səmimi qardaşlıq hissi ilə salamlayaraq Azərbaycan və Pakistan arasında əlaqələrin son illərdə daha da dərinləşdiyini vurğuladı. Prezident çıxışında ölkələrimizin beynəlxalq platformalarda bir-birini daim dəstəklədiyini, ərazi bütövlüyü və suverenlik məsələlərində ortaq mövqeyini xüsusi qeyd etdi.
Bu səfər zamanı bir çox sənədlər imzalanmış, o cümlədən iki ölkənin iş adamlarının iştirakı ilə biznes forum təşkil olunmuşdur. Azərbaycanın Pakistan iqtisadiyyatına 2 milyard dollara qədər investisiya yatırması ilə bağlı razılaşmalar əldə edilmiş, həmçinin Pakistanın neft-kimya sənayesinin inkişafı üçün Azərbaycan Dövlət Neft Şirkəti ilə Pakistan şirkətləri arasında anlaşmalar imzalanmışdır. 
Həmçinin, Pakistan keçmiş Qarabağ münaqişəsi dövründə və 44 günlük Vətən müharibəsi zamanı da Azərbaycanın haqlı mövqeyini daim açıq şəkildə dəstəkləyib. Rəsmi İslamabad Ermənistanın işğalçılıq siyasətini pisləyərək Azərbaycanın ərazi bütövlüyünə dəstəyini hər zaman ifadə edib. Məhz bu prinsipial mövqeyə görə Pakistan Ermənistanla heç vaxt diplomatik münasibətlər qurmayıb. Bu qərar Azərbaycana verilən sarsılmaz dəstəyin bariz nümunəsidir.
Bütün bunlar onu deməyə əsas verir ki, Azərbaycan-Pakistan əməkdaşlığı regionda və beynəlxalq arenada yeni geosiyasi reallıqlar yaradır. İmzalanmış sazişlər və gələcəkdə həyata keçiriləcək investisiya layihələri strateji müttəfiqliyin daha da möhkəmlənməsinə zəmin yaradacaq. Ümumilikdə, Azərbaycan-Pakistan münasibətlərinin intensiv inkişafı hər iki tərəf üçün böyük strateji əhəmiyyət daşıyır.

Tariel Atamalıyev, 
Salyan Dövlət Aqrar İnkişaf Mərkəzinin direktoru, YAP fəalı