Deputat: “Xocalı soyqırımı insanlıq əleyhinə ən böyük cinayətlərdəndir”

“Etnik təmizləmələr, terrorizm aktları və soyqırımlar Ermənistanın dövlət siyasətinin tərkib hissəsidir”. 

Bu sözləri Milli Məclisin deputatı, Ana Vətən Partiyasının sədr müavini Günay Ağamalı “Cebheinfo.az”-a açıqlamasında deyib. O bildirib ki, qondarma “Miatsum” ideyalarının əsirinə çevrilmiş ermənilər iki əsrdir davamlı olaraq xalqımıza qarşı qətliamlar və ağlasığmaz vəhşiliklər törədiblər: 

“Xocalı soyqırımı həmin faciələrdən biri və ən dəhşətlisidir. 1992-ci il 26 fevral tarixində Ermənistan silahlı birləşmələri və onlara dəstək verən Rusiyanın 366-cı motoatıcı alayı tərəfindən məqsədyönlü şəkildə dinc əhaliyə qarşı soyqırım həyata keçirildi. Həmin gecə Xocalı erməni barbarlığına məruz qaldı. Azğınlaşmış düşmən bütün beynəlxalq hüquq normalarını, müharibə zamanı mülki şəxslərin müdafiəsi ilə bağlı Dördüncü Cenevrə Konvensiyasını kobud şəkildə pozaraq bəşəriyyətə əsl simasını nümayiş etdirdi”. 

Millət vəkili vurğulayıb ki, Xocalı soyqırımı yalnız Azərbaycan xalqına qarşı deyil, insanlıq əlehinə ən böyük cinayətlərdən biridir: 

“Soyqırımı nəticəsində 613 dinc sakin, o cümlədən 106 qadın, 70 qoca və 63 uşaq məhz etnik mənsubiyyətinə görə xüsusi qəddarlıqla qətlə yetirildi, meyitlər üzərində müxtəlif təhqiredici hərəkətlərə yol verildi. Bununla yanaşı, 25 uşaq hər iki valideynini, 130 uşaq isə valideynlərindən birini itirdi, 487 nəfər ağır yara aldı, 1275 nəfər isə girov götürüldü”.

Deputat diqqətə çatdırıb ki, Xocalı soyqırımına ilk siyasi və hüquqi qiymət Ulu Öndər Heydər Əliyev tərəfindən verilib: 

“Onun təşəbbüsü əsasında 26 fevral Xocalı Soyqırımı Günü elan olundu və onun qətiyyətli, prinsipal mövqeyi sayəsində dünya ictimaiyyəti bu faciəni tanımağa başladı. Eyni rasional yanaşma, eyni qətiyyətli siyasət cənab Prezident İlham Əliyev tərəfindən də uğurla davam etdirilir. “Xocalıya ədalət” kompaniyası çərçivəsində bir çox dövlət üzləşdiyimiz faciəyə siyasi qiymət verir və Xocalı soyqırımı qəti şəkildə pislənilir. 

Rəsmi İrəvan beynəlxalq hüququn tələbləri çərçivəsində Xocalı faciəsi ilə əlaqədər bütün lazımi öhtəlikləri üzərinə götürməlidir. Qarşılaşdığımız bütün çətinliklərə, işğallara rəğmən dövlətimiz ayaqda qalmağı bacardı və qüdrətli Azərbaycan olmaq yolunda inamla irəlilədi. 

Xalq, ordu və Ali Baş Komandan vəhdəti torpaqlarımızda hökm sürən erməni vandalizmini, separatizmini dəf etməyi bacardı, suverenliyimiz təmin olundu. Vətənimizin dilbər guşələrindən biri olan Xocalıda artıq ən müasir standartlara cavab verən yeni infrastruktur layihələri reallaşdırılır, Böyük Qayıdış proqramı çərçivəsində məcburi köçkünlər öz doğma torpaqlarına qayıdır, həyat canlanır və düşmənə göz dağı olan yeni bir şəhər formalaşır”.