“Türkiyə Böyük Millət Məclisinin (TBMM) keçmiş millət vəkili, erməni əsilli Garo Palyanın Azərbaycan və Ermənistan münasibətlərindən bəhs edən müsahibəsi Ermənistan və dünya erməniliyinin təcavüzkar, düşmən və işğalçı xislətinin təcəssümüdür”. 

Bu sözləri Milli Məclisin deputatı, Ana Vətən Partiyasının sədr müavini Günay Ağamalı “Cebheinfo.az”-a açıqlamasında deyib. Millət vəkili bildirib ki, erməni siyasətçi manipulyasiyalara və faktların təhrif edilməsi taktikasına əl ataraq rəsmi Bakının Qərbi Azərbaycanla bağlı hərbisizləşdirilmiş siyasi mövqeyini işğal cəhdi kimi qələmə verməyə çalışır: 

“Ölkə rəhbərimiz cənab Prezident İlham Əliyev başda olmaqla, hər bir Azərbaycan rəsmisi Qərbi Azərbaycana qayıdış prosesini beynəlxalq hüququn norma və prinsipləri çərçivəsində həll edilməsinə çalışır. Qərbi Azərbaycanın əzəli torpaqlarımız olması bizim tarixi mənbələrəmizlə yanaşı qonşu dövlətlərin də arxivlərində öz əksini tapır. 1828-ci ildə “Türkmənçay” müqaviləsinin imzalanması və Rusiya imperiyasının İran, Osmanlı imperiyalarına qarşı qazandığı qələbələrdən sonra təkcə 1828-1830-cu illər arasında İrəvan xanlığına 84 min erməninin Osmanlı ərazisindən, 40 ermənin isə İran ərazisindən köçürülməsi bölgənin etnik tərkibini dəyişdirmək məqsədi ilə həyata keçirilən məqsədyönlü siyasət idi. Qeyd etdiklərim sözügedən planın bir hissəsi idi”. 

Deputat vurğulayıb ki, artıq Cənubi Qafqazda fərqli geopolitik mənzərə və Azərbaycanın liderliyində yeni geosiyasi konfiqurasiya formalaşıb: 

“Biz Qərbi Azərbaycana qayıdışla əlaqədar müharibə variantını aktuallaşdırmırıq. Rəsmi Bakının tələbləri beynəlxalq hüququn norma və prinsipləri çərçivəsindədir. Mülki əhalinin zorla köçürülməsini qadağan edən Cenevrə Konvensiyası, hər bir insanın öz vətəninə qayıtmaq hüququnu təsdiq edən Ümumdünya İnsan Hüquqları Bəyannaməsi və bununla bağlı BMT-nin digər qətnamələri Garo Palyanın arqumentlərini əsassızlaşdırır. Ancaq Garo Palyan çıxışı zamanı Qarabağı işğal etdiklərini, ölkəsinin və xalqının işğalçı mahiyyətini bir daha sübut etdi. 

Onun revanşist meyllər əsasında səsləndirdiyi fikirlər regionda yeni gərginlik ocaqları yaratmağa hesablanıb. Artıq 5 ildir ki, Ermənistan rəhbərliyi 10 noyabr üçtərəfli Bəyanatını sabotaj edir, vaxt qazanmağa hesablanmış addımlarla mövcud status-kvonu möhkəmləndirməyə çalışır və saxta, absurd alternativlər irəli sürməklə üzərinə götürdüyü öhdəlikləri yerinə yetirməkdən yayınır”. 

Günay Ağamalı diqqətə çatdırıb ki, bütün bunlar regional istiqrara, mehriban qonşuluq əlaqələrinin qurulmasına zidd davranışlardır: “Biz erməni xalqının “ziyalılarından” hesab edilən Garo Palyanın çıxışından sonra bir daha onların dəyişmədiyinin şahidi olduq. Palyanın mövqeyi qəbul edilməzdir. Onun tarixi həqiqətləri təhrif edən sərsəm fikirləri normallaşma prosesindən sonra iki ölkə arasındakı münasibətlərin gələcək inkişaf perspektivlərinə zərbə vurur. Belə açıqlamalar regionda sülh və sabitliyə zərər vurmaqdan başqa bir şey deyil”.