“Ermənistan tarixi Azərbaycan torpaqlarında qurulmuş bir layihə dövlətidir”.

Bu sözləri Milli Məclisin deputatı, Ana Vətən Partiyasının sədr müavini Günay Ağamalı “Cebheinfo.az”-a açıqlamasında deyib.

O bildirib ki, XIX əsrdə Çar Rusiyasının Cənubi Qafqaz uğrunda Osmanlı və Qacar imperiyasına qalib gəlməsi sonrakı proseslərdə ermənilərin Azərbaycan ərazilərində məskunlaşdırılması ilə nəticələndi: 

“Bölgənin demoqrafik tərkibini dəyişmək üçün müxtəlif vaxtlarda minlərlə erməni ailəsi Qərbi Zəngəzur və Qarabağda məskunlaşdırılıdı. Bütün bunlar irəliləyən dönəmdə Rusiyanın iştirakı fonunda düşünülmüş Ermənistan dövlətinin yaranmasına zəmin yaratdı. 

Ermənilər azərbaycanlılara qarşı düşmən xislətini və işğalçılığı davam etdirərək Moskvanın da razılığı əsasında sistematik şəkildə soydaşlarımızı öz doğma yurdlarından deportasiya etdilər. Həmin prosesin pik nöqtəsi 1980-ci illərin sonunda Qarabağda yaşanan hadisələri bəhanə edərək xüsusi qəddarlıq və amansızlıqla həyata keçirildi.

Keçən müddət ərzində ermənilər Qərbi Azərbaycan torpaqlarından soydaşlarımızın izlərini silməyə çalışdılar və bizlərə məxsus mədəni irsi məhv etdilər. Onların içində yaşı yüz illəri əhatə edən tarixi abidələr də var”.

Millət vəkili vurğulayıb ki, Ermənistan tərəfindən Qərbi Azərbaycanlılara qarşı törədilmiş etnik təmizləmə siyasəti beynəlxalq hüququn prinsiplərinə ziddir:

“İkinci Qarabağ müharibəsindən sonra Cənubi Qafqazda dəyişən geosiyasi reallıqlar Qərbi Azərbaycana qayıdışı aktullaşdırdı. 

Cənab Prezident İlham Əliyevin sözügedən mövzu ilə bağlı prinsipial mövqeyi və məsələni beynəlxalq müstəviyə yüksəltməsi Ermənistanda ciddi narahatçılıqla izlənilir. Məhz bu səbəbdən İrəvan rəsmiləri tez-tez mifik Ermənistan iddiaları ilə Qərbi Azərbaycan reallıqlarını eyniləşdirmə çalışırlar”.

Günay Ağamalı vurğulayıb ki, “Miatsum” iddiasından fərqli olaraq Qərbi Azərbaycan həqiqətləri tarixi əsasları olan bir mövzudur:

“Soydaşlarımızın dinc yolla öz doğma yurdlarına qayıdışı beynəlxalq hüququn norma və prinsipləri çərçivəsindədir. Mülki əhalinin zorla köçürülməsini qadağan edən Ümumdünya İnsan Hüquqları Bəyannaməsi insan hüquq və azadlıqlarının müdafiəsinin təməl sənədidir.

Məhz BMT-nin qətnamələri ölkəmizin haqlı mövqeyinin təsdiqidir. Ölkə başçımız Cənab İlham Əliyevin səsləndirdiyi fikirlər və Qərbi Azərbaycan İcmasının fəal rolu Ermənistanı təlaşa salıb.

Rəsmi İrəvan proseslərə əngəl olmaq üçün hər zamankı kimi yenə də hərbiləşmə yolunu tutub. Sürətlə silahlanan ölkə Azərbaycanla növbəti müharibəyə hazırlaşır. Lakin Nikol Paşinyanın addımları heç bir nəticə verməyəcək.

Artıq regionda iki əsr tarixi olan planı məhv edən, bölgədə yeni konfiqurasiya formalaşdıran qüdrətli Azərbaycan faktoru mövcuddur. Rəsmi İrəvanın Azərbaycanın şərtlərilə razılaşmaqdan başqa şeçim şansı yoxdur”.