Bütün Azərbaycan xalqı yaxşı bilir ki, işğal dövründə Pakistan hər zaman yanımızda olan bir sıra ölkələrdən biri olmuşdur.

Azərbaycan və Pakistan arasında möhkəm dostluq, qardaşlıq təməlləri üzərində qurulmuş strateji tərəfdaşlıq münasibətləri mövcuddur. Pakistan Azərbaycanın müstəqilliyini ilk tanıyan  dövlətlərdən biri olub. İki ölkə arasında diplomatik əlaqələr 1992-ci ildə  qurulub. Həmin dövrdən sonra iki ölkə arasında əlaqələr daim inkişaf etdirilib və bu günkü strateji müttəfiqlik səviyyəsinə yüksəlib. 1993-cü ildə Pakistanın Bakıda, 1997-ci ilində isə Azərbaycanın İslamabadda səfirlikləri təsis edilib. Münasibətlərin inkişafında qarşılıqlı səfərlər və imzalanan sənədlər əhəmiyyətli rol oynayır.Prezident İlham Əliyevin cari ilin 11 iyul tarixində İslamabada dövlət səfəri və səfər zamanı yüksək ehtiramın nümayiş etdirilməsi ölkələrimiz arasında mövcud olan möhkəm dostluqdan xəbər verir.  Səfəri zamanı  mətbuata verdiyi bəyanatında Prezident İlham Əliyev ölkələrimiz arasında yüksək səviyyəli əlaqələrin dostluq və qardaşlıq münasibətlərinə əsaslandığını xüsusilə vurğuladı. Azərbaycan-Pakistan qardaşlığı xalqlarımızın əsrlərlə bundan əvvələ təsadüf edən, bir-birinə olan dərin hisslərinə əsaslanır. Ölkə başçısı bəyanatında qeyd etdi ki, Azərbaycana gələn pakistanlıların sayı son illər ərzində daha da artıb.Pakistan ilə Azərbaycan hər işdə, istənilən beynəlxalq təsisat daxilində, hər beynəlxalq məsələdə bir-birini dəstəkləyir. Cəmmu və Kəşmir məsələsində Azərbaycanın birmənalı dəstəyi ölkəmizin qardaşlığa, eləcə də beynəlxalq hüquqa olan sadiqliyidir. Prezident İlham Əliyev bəyanatında da vurğuladı ki, kəşmirlilərin hüquqları onilliklər boyu diqqətdən kənarda qalmış, pozulmuşdur. BMT Təhlükəsizlik Şurasının qətnamələri məsələnin necə həll olunmasını aydın şəkildə təsvir edir. Lakin, əfsuslar olsun ki, BMT Təhlükəsizlik Şurasının qətnamələrinin icra mexanizmləri yoxdur.İşğal dövründə Pakistan hər zaman Azərbaycanın yanında olan bir sıra ölkələrdən biri olmuşdur. İkinci Qarabağ müharibəsi – Vətən müharibəsi zamanı siyasi dəstək və Azərbaycanın haqlı mövqeyini dəstəkləyən Pakistanın yüksəkrütbəli rəsmilərinin birmənalı bəyanatları ölkəmizə əlavə güc-qüvvət verdi. Pakistan məhz işğala görə Ermənistanla diplomatik münasibətləri qurmayan ölkədir. 2020-ci ilin noyabrında xalqımız öz Qələbəsini qeyd etdiyi zaman insanların əllərində Azərbaycan, Pakistan və Türkiyənin bayraqları var idi. Bu, dostluğun, qardaşlığın təqdimatı idi. Azərbaycanın beynəlxalq münasibətlər sistemində artan rolu və nüfuzu xarici siyasətinin əsas prinsiplərinin dəyişməzliyinin göstəricisidir. Belə ki, Azərbaycan bütün dövlətlərlə bərabər hüquqlu, qarşılıqlı maraq və hörmət prinsipləri əsasında əlaqələr qurur və yeni prioritetlər üzrə inkişafında maraqlı olduğunu atdığı addımları ilə təsdiqləyir. İslamabada dövlət səfəri zamanı mətbuata bəyanatında Prezident İlham Əliyev perspektiv əməkdaşlıq əlaqələrindən də bəhs etdi və bütün planların uğurla icra ediləcəyinə əminliyini bildirdi. Prezident İlham Əliyevin İslamabada dövlət səfəri zamanı Azərbaycan ilə Pakistan arasında 15 adda sənədin imzalanması ölkələrimizin siyasi münasibətlərinin yüksək səviyyədə olmasının təzahürüdür. Bu sənədlərin imzalanması həmçinin ölkələrimiz arasında əlaqələrin gələcək inkişafı üçün siyasi-hüquqi bazasını təşkil edir.

Zamir Güvəndiyev
YAP Şəmkir rayon təşkilatının sədr müavini