Azərbaycan-Tacikistan əlaqələri qardaş dövlətlərin və xalqların maraqları çərçivəsində dinamik inkişaf edir

Dünyanın siyasi arenasında yerini və çəkisini möhkəmləndirən Azərbaycan əksər dövlətlərlə münasibətlərini inkişaf etdirməkdədir. Tam müstəqil xarici siyasət həyata keçirən Prezident İlham Əliyevin uğurlu diplomatiyası ilə Azərbaycan əksər dövlətlərin Cənubi Qafqaz regionundakı ən etibarlı tərəfdaşı hesab olunur. Azərbaycanın bir çox dövlətlərlə strateji tərəfdaşlq, səmimi dostluq-qardaşlıq münasibətləri mövcuddur. Azərbaycanın xarici siyasətində Mərkəzi Asiya ölkələri ilə münasibətlər isə xüsusi yer tutur. Belə ölkələrdən biri də Tacikistandır. 
Tacikistan elə Mərkəzi Asiya dövlətlərindən biridir ki, ölkəmizlə ikitərəfli əlaqələri yüksək səviyyədədir. Tarixi əsrlərə dayanan xalqlarımız arasındakı ortaq dostluq münasibətləri dövlətlərimiz arasındakı bugünkü əlaqələrin bazasını təşkil edir. Hər iki ölkənin Liderlərinin səmimi münasibətləri hesabına dövlətlər arasındakı əməkdaşlıq daha da artaraq bugünkü səviyyəyə yüksəlib. 
Bu baxımdan qeyd etmək olar ki, Tacikistan Prezidenti Emoməli Rəhmonun mayın 22-də Azərbaycana dövlət səfəri iki dost ölkə arasındakı hərtərəfli münasibətlərin daha da inkişafına mühüm töhfə verəcək. Əlbəttə ki, dövlət səfərinin xüsusi statusu var və bu, Prezident İlham Əliyevin söylədiyi kimi, münasibətlərin bugünkü yüksək səviyyəsinin təzahürüdür. Bu səfər çərçivəsində dövlət başçılarının keçirdikləri görüşlərdə müzakirə edilən məsələlər, qəbul edilən qərarlar, verilən tapşırıqlar onu deməyə əsas verir ki, artıq ölkələrarası münasibətlərdə yeni yüksəliş dövrü başlayır. 
İki ölkə arasında münasibətlər parlamentlər səviyyəsində də uğurla davam etdirilir. Azərbaycan Respublikası Milli Məclisində Azərbaycan-Tacikistan parlamentlərarası əlaqələr üzrə işçi qrupu fəaliyyət göstərir. Tacikistan Respublikasının Ali Məclisinin hər iki palatasında Azərbaycan Milli Məclisi ilə parlamentlərarası dostluq və əməkdaşlıq qrupu mövcuddur.
Ölkələrimizi tarixi dostluq əlaqələri, siyasi, humanitar və digər sahələrdə münasibətlər də birləşdirir. Azərbaycan və tacik xalqları arasında tarixi, mədəni və dini bağlılıqlar iki ölkə arasındakı əlaqələrin əsasını təşkil edir. Həmçinin, iki ölkə arasında elm və təhsil sahəsində münasibətlər də mühüm əhəmiyyətə malikdir. 2014-cü ildə Prezident İlham Əliyevə Tacikistan Milli Universitetinin fəxri doktoru diplomu təqdim olunub. 2018-ci il avqustun 11-də Azərbaycanda rəsmi səfərdə olan Tacikistan Respublikasının Prezidenti Emoməli Rəhmona ADA Universitetinin fəxri doktoru diplomu təqdim edilib. 
Azərbaycanın nəqliyyat-logistika imkanlarının genişlənməsi, Zəngəzur dəhlizinin reallaşdırılması məsələsi ölkəmizi Şərqlə Qərb arasında mühüm nəqliyyat qovşağına çevirib. Təsadüfi deyil ki, bu gün Mərkəzi Asiya ölkələrindən, bir qədər də uzağa getsək, Çindən Avropaya gedən ən qısa və təhlükəsiz tranzit daşımalar məhz ölkəmizin ərazisindən həyata keçirilir ki, bu da Azərbaycana marağı getdikcə artırır. Prezidentlərin görüşündə də Orta dəhliz və onun bir hissəsi olan Trans-Xəzər Nəqliyyat Dəhlizini Tacikistandan yükgöndərənlər üçün daha cəlbedici etmək məqsədilə logistika əlaqələrinə dair məsələlər ətraflı nəzərdən keçirildi. İlham Əliyev diqqətə çatdırdı ki, Azərbaycan öz ərazisində bütün iri nəqliyyat və logistika layihələrini praktiki olaraq başa çatdırıb və bu gün müxtəlif istiqamətlərdə - şərqdən qərbə və əks-istiqamətdə, şimaldan cənuba və əks istiqamətdə böyük həcmdə yükləri qəbul etməyə hazırdır.
Səfər çərçivəsində ən mühüm hadisə isə iki dost ölkə arasında "Azərbaycan Respublikası ilə Tacikistan Respublikası arasında strateji tərəfdaşlıq haqqında Bəyannamə"nin imzalanması oldu. Prezidentlər bu sənədi tarixi hadisə adlandıraraq əhəmiyyətini çox yüksək dəyərləndirdilər.
Bir sözlə, bu səfər zamanı imzalanan müqavilələr ölkələrimiz arasında münasibətlərin qarşıdakı dövr üçün əsas istiqamətlərini səciyyələndirir. Əlbəttə ki, münasibətlərin strateji tərəfdaşlıq səviyyəsinə yüksəlməsində İlham Əliyevin və Emoməli Rəhmonun şəxsi dostluq münasibətləri mühüm rol oynayır. Əminliklə deyə bilərik ki, Prezident Emoməli Rəhmonun budəfəki dövlət səfəri ölkələrimiz arasında münasibətlərin inkişafında mühüm rol oynayacaq. İki ölkənin rəhbərlərinin iştirakı ilə keçirilən görüşlərdə sənaye kooperasiyasının, humanitar sahədə əməkdaşlıq üzrə iqtisadi xarakterli bir çox layihənin reallaşdırılmasına dair hökumət üzvlərinə konkret tapşırıqlar verilib. İlin sonunda Tacikistan Prezidenti yenidən ölkəmizə səfər edəcək. Çünki Prezident İlham Əliyev dost və həmkarını noyabrda Azərbaycanda keçiriləcək COP29 sammitinə dəvət edib. Bütün bunlar onu deməyə əsas verir ki, Azərbaycan-Tacikistan əlaqələri qardaş dövlətlərin və xalqların maraqları çərçivəsində dinamik inkişaf edir. Tacikistan Prezidentinin bu səfərindən sonra isə bütün sahələrdə əməkdaşlığımız nəzərəçarpacaq dərəcədə artacaq.

Könül Babayeva, 
Salyan rayonu Seyidsadıqlı kəndi, YAP fəalı