Mənfur düşmən düzgün hesablamalar aparmamışdır

27 Sentyabr 2020-ci il taraixində başlanan 44 günlük Vətən müharibəsində Azərbaycan Respublikasının Prezidenti, Ali baş Komandan İlham Əliyevin düzgün siyasəti, Müzəffər Ordumuzun əzmkarlığı nəticəsində torpaqlarmız işğaldan azad edildi. Bu heç vaxt yaddan çıxmayacaq tarixi zəfər Azərbaycan xalqının otuz illik işğal altında qalan əzəli torpaqlarının azadlığa qovuşmasıdır. Bu tarixi zəfər qüdrətli Azərbaycan ordusunun dünya hərb tarixinə qızıl hərflərlə həkk edilən döyüş səlnaməsidir. Vətən müharibəsinin ən çətin mərhələsi Şuşa şəhərinin azad olunması sayılırdı. Çox çətin coğrafi mövqedə yerləşən, alınmaz qala sayılan Şuşa şəhəri yüngül silahlarla, bir çox hallarda əlbəyaxa döyüşlərlə, böyük güc, peşəkarlıq və fədakarlıq nəticəsində işğaldan azad olundu. Azərbaycanın güclü və peşəkar əsgəri artilleriyasız düşmənin 30 illik möhkəmlənmiş səngərlərini 44 gün ərzində yerlə yeksan etdi. Bu döyüş Qarabağın tacı olan Şuşanın azadlığı üçün aparılan tarixi döyüş sayılırdı. Otuz iki ildən sonra şuşalılar öz doğma torpaqlarına geri qayıtdılar. 10 may tarixində Azərbaycan Respublikasının Prezidenti cənab İlham Əliyev birinci xanım Mehriban Əliyeva ilə birlikdə Qarabağın incisi Şuşaya səfər etdi. Bu səfər və ziyarət üçün 10 may tarixinin seçilməsi də xüsusilə əlamətdar gün sayılır. Hər birimiz  xatırlamalıyıq ki, 8 Noyabr – Şuşa şəhərinin işğaldan azad olunduğu gün Prezidentimiz Ulu Öndərin məzarını ziyarət edərək, xalqa qələbə müjdəsi verərkən ata vəsiyyətini yerinə yetirdiyini qeyd etdi. Ulu Öndərin bir gün bu şəhərin azad olunacağı ümidini özü qədər inandığı Müzəffər Ali Baş Komandan reallaşdırdı.
Dövlət başçısı bu səfərində  hər zaman olduğu kimi ilk öncə qəhrəman Vətən övladlarının əziz xatirəsini hörmət və ehtiramla yad edib bir daha igidlərimizin göstərdiyi şücaətdən, keçdikləri döyüş yolundan bəhs etdi. Hərbçilərimizin İkinci Qarabağ müharibəsində, keçən ilin 19 sentyabr tarixində həyata keçirilən lokal xarakterli antiterror tədbirlərində göstərdikləri yüksək qəhrəmanlığı xatırlatdı.
           İşğaldan azad olunmuş bütün ərazilərdə olduğu kimi Şuşa şəhərində də geniş miqyaslı abadlıq quruculuq işləri davam edir. Şəhərdə aparılan abadlıq işləri zamanı ən vacib məsələ şəhərin tarixinin qorunmasıdır ki, erməni işğalında qaldığı otuz il ərzində vandallar bütün tarixi məhv etmiş, dağıtmış, hətta görkəmli mədəniyyət nümayəndələrimizin abidələri belə mənəvi terrora məruz qalmışdır. Bu gün dövlət başçısının müvafiq tapşırıqlarına əsasən işğaldan azad olunmuş bütün ərazilərdə olduğu kimi Şuşa şəhərində də genişmiqyaslı qurculuq işləri aparılır. Tarixi abidələrin bərpasında və qurulmasında Heydər Əliyev Fondu yaxından iştirak edir. Fond tərəfindən icra olunan və tarixi abidələrin bərpa olunması istiqamətində həyata keçirilən layihələr şəhərin tarixiliyinə xüsusi töhfə verir. Tarixiliyin bərpası istiqamətində aparılan işlər çərcivəsində Azərbaycanın mədəniyyət paytaxtında qısa müddətdə görkəmli Azərbaycan şairi Vaqifin məqbərəsi yenidən qurulmuş, Yuxarı Gövhər Ağa məscidi, Saatlı məscidi bərpa olunmuşdur. Mehmandarov məscidi və Mehmandarovun evinin bərpa olunması, habelə hazırda tikintisi davam edən layihələrin icra olunması xüsusi əhəmiyyət kəsb edir. İşğaldan azad olunan rayon və şəhərlər günü gündən gözəlləşir, cənnət məkana çevrilir. 

Soltanova Zahidə
Saatlı Dövlət Rəsm Qalereyasının əməkdaşı