Otuz illik bir müddətdə özlərini beynəlxalq birlik adlandıran Fransa, ABŞ və Rusiya həmsədrləri ədalətin bərpa olunması üçün heç bir addım atmadılar

     Fransa hökumətinin Cənubi Qafqazda mövcud olan reallığı düzgün qiymətləndirməməsi son illər verdiyi bir sıra qərarlardan, atdığı addımlardan bəllidir. Rəsmi Paris hələ də bu regionda təsir gücü əldə edəcəyi barədə boş xəyallar qurur. Emmanuel Makronun rəhbərliyi ilə Fransa hökuməti məkrli planını həyata keçirmək üçün özünə çox bənzəyən Nikol Paşinyanın rəhbərlik etdiyi Ermənistan hökumətindən istifadə edir. Hər iki işğalçı ölkə mənfur planlarını həyata keçirmək üçün hər cür yalana, böhtana əl atır. Ancaq indiyədək bu istiqamətdə gördükləri işlərlə, verdikləri qərarlarla nə qədər qərəzkar, ədalətsiz olduqlarını nümayiş etdirməkdən, özləri-özlərini ifşa etməkdən başqa heç nəyə nail olmayıblar. Güclülərə sığınmaq, havadarlar axtarmaq Ermənistanın köhnə şakəridir. Bu işğalçı ölkə yalnız hansısa böyük ölkənin kölgəsində olanda özünü güclü görür. Bu gerçəklik çox da uzaq olmayan tariximizdən də məlumdur. XX əsrin sonlarında Sovet Sosialist Respublikaları İttifaqı (SSRİ) adlı imperiya dağılanda müstəqilliyinə nail olan respublikalar böyük sınaqla üzləşdilər. Azadlığına qovuşan Azərbaycanın da iqtisadiyyatında ağır böhran yarandı. Ancaq həmin illərdə bundan da böyük bir bəla ilə üzləşdi. O zaman xaricdən hər cür yardım alan Ermənistan ərazilərimizin iyirmi faizini işğal, bir milyondan çox soydaşımızı evindən, yurdundan didərgin edə bildi. Otuz ilə yaxın davam edən işğal müddətində də Fransa kimi ermənipərəst dövlətlər Ermənistanla Azərbaycan arasında sülh danışıqlarına vasitəçilik etmək adı ilə, əslində, işğalçıya dəstək verdilər.
     Azərbaycan Respublikasının Prezidenti cənab İlham Əliyev fevralın 28-də Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətini qəbul edərkən bu tarixi həqiqətləri xatırlatdı. Sovet dövründə 70 il ölkəmizin dövlətçilikdən məhrum olduğunu diqqətə çatdıran Prezident İlham Əliyev qeyd etdi ki, 1991-ci ildə Azərbaycan öz müstəqilliyini yenicə bərpa etdiyi vaxtda Ermənistanın ölkəmizə qarşı təcavüzü ilə üzləşib və müstəqilliyin bərpasından 4 ay sonra ermənilər Xocalı soyqırımını törədiblər: "Yüzlərlə şəhər və kəndlərimizi işğal etdilər, oraları dağıtdılar. 30 illik bir müddətdə özlərini beynəlxalq birlik adlandıran Fransa, ABŞ və Rusiya - həmsədrlər ədalətin bərpa olunması üçün heç bir addım atmadılar. Və biz öz torpaqlarımızı azad etməyə başlayanda bu üç ölkə bizə təzyiqlər göstərməyə başladı. Hər biri bizi öz yolumuzdan döndərmək üçün müxtəlif alətlərdən istifadə etdi. Onlar istəmirdilər ki, biz öz torpaqlarımızı azad edək. Ötən ilin sentyabrında biz separatizmə son qoyduğumuz zaman onlar yenə də səhv etdi. Onların bəziləri indi də səhv edirlər. Mən ABŞ və Fransanı nəzərdə tuturam. Düşünürəm ki, Rusiya indi nəyin baş verdiyini yaxşı anlayır və yeni reallıqları qəbul edir. ABŞ və Fransa da eyni cür hərəkət etməlidirlər. Əks təqdirdə, vəziyyət onların planlaşdırdığı kimi olmayacaq. Bu ölkələr Cənubi Qafqazda buranın aparıcı ölkəsi, iqtisadiyyatı, ordusu, geniş beynəlxalq əlaqələri olan Azərbaycan ilə işləməlidirlər".
     Bugünkü reallığı görən, lakin bununla barışmaq istəməyən Emmanuel Makronun rəhbərlik etdiyi Fransa hökuməti Azərbaycana təsir etmək üçün müxtəlif qərarlar qəbul edir. Eyni zamanda beynəlxalq təşkilatlarda ölkəmizin əleyhinə qətnamələrin qəbul olunmasına çalışır. Fransa bütün bunlarla yanaşı, Azərbaycana qarşı Ermənistanı silahlandırdığını, bu işğalçı ölkəyə dəstək verdiyini açıq şəkildə bildirir. Ancaq bu cəhdləri Fransanı nəinki Cənubi Qafqaza yaxınlaşdırmır, əksinə, onu regiondan daha da uzaqlaşdırır. Rəsmi Paris bu gün Ermənistanı silahlandırmaqla, regionda sülhün əldə edilməsinə mane olmaqla, Azərbaycanla təhdid, şantaj dili ilə danışmaqla nəyəsə nail ola biləcəyinə ümid edir. Lakin unudurlar ki, Azərbaycanla kimsə təhdid, şantaj dili ilə danışa bilməz. Azərbaycan qarşılaşdığı bütün haqsızlıqlara rəğmən öz ədalətli, sülhsevər mövqeyindədir. Ermənistan hökuməti isə başa düşmək istəmir ki, Cənubi Qafqaz yenidən münaqişə alovuna çevrilərsə, Fransa kimi ölkələr bundan qətiyyən əziyyət çəkməyəcəklər. Çünki bu ölkələr hər bir mənada Cənubi Qafqazdan uzaqdırlar. 

Seyran Səfərov,
Salyan rayonu Qızılağac kənd tam orta məktəbin direktor əvəzi