Avropa İttifaqı məkrli mövqeyi ilə ikili standartlar siyasətinə sadiqliyni nümayiş etdirir

Alman İqtisadiyyatının Şərq Komitəsi sədrinin rəhbərlik etdiyi nümayəndə heyətinin ölkəmizə səfəri, Azərbaycan Prezidenti İlham Əliyevin nümayəndə heyəti ilə görüşü, aparılan müzakirələr, toxunulan mövzular son günlərin ən maraqlı yeniliklərindən oldu. İlk növbədə, Almaniyanın aparıcı şirkət rəhbərlərindən ibarət belə bir geniş tərkibli heyətin Azərbaycana səfəri diqqəti çəkir. Almaniyanın şirkət rəhbərlərinin bu səfəri də qlobal iqtisadi reallıqlar dövründə ölkəmizə getdikcə artan marağın, iqtisadi gündəliyin xeyli zəngin olmasının göstəricisidir.  
Ümumiyyətlə, son dövrlər Almaniyanın nümayiş etdirdiyi konstruktiv davranışlar, bu ölkənin ölkəmizə münasibətində, eləcə də Azərbaycanın regionda yaratdığı yeni tarixi reallıqlara baxışında obyektiv mövqe tutmasına dəlalət edir. Hiss olunur ki, bəzi Avropa ölkələrindən fərqli olaraq Almaniya bölgəmizdə daimi sülhün, ardıcıl inkişaf proseslərinin olmasında müəyyən qədər maraqlıdır və bunun üçün imkanlarını ortaya qoymağa başlayıb. Elə Azərbaycan və Ermənistan xarici işlər nazirlərinin görüşünün Berlində təşkil olunması da Almaniyanın sülh prosesinə konstruktiv yanaşmasına bir nümunədir. Almaniya qonşuluğunda yerləşən, "alovun üstünə benzin tökən" və Ermənistanı öldürücü silahlarla təchiz edən Fransadan fərqli olaraq, sülh prosesində neytrallıq nümayiş etdirir. Bütün bunlar onu göstərir ki, Fransa Azərbaycanın Cənubi Qafqazda yaratdığı yeni geosiyası reallıqla barışa bilmir. Parisin bölgəni silahlandırmaq istəməsi onun gələcək çirkin niyyətlərindən xəbər verir.
Görüşdə Azərbaycannın həmişə sülh prosesinə sadiq olduğunu bildirən dövlətimizin başçısı qeyd etdi ki, ölkəmizin suverenliyini və ərazi bütövlüyünü təmin etməsi ilə bağlı son vaxtlar bizi hər hansı günahlandırma cəhdləri tamamilə əsassız və qərəzlidir. Azərbaycan öz ərazi bütövlüyünü və suverenliyini təmin etməklə bağlı digər ölkələrin atdığı addımlardan fərqli addımlar atmır. Bunun təəssüf hissi doğurduğu qeyd olundu. Belə bir münasibət bu gün bir sıra beynəlxalq institutlar tərəfindən, o cümlədən Avropa İttifaqı üçün adi hala çevrilsə də, heç bir reallığı əks etdirmir və verilən qeyri-adekvat bəyanatlar beynəlxalq hüququn normalarına ziddir. Azərbaycan tərəfi bu bəyanatları ölkəmizə qarşı pərdələnmiş təhdid kimi qiymətləndirir. İkinci Qarabağ müharibəsi başa çatdıqdan sonra ölkəmiz sülh danışıqları təşəbbüsü ilə çıxış etdi. Sülh yolu ilə həllin beş əsas prinsipi işlənib hazırlandı, sülh müqaviləsinin mətninin layihəsi təqdim olundu. Bütün bunlar reallığı əks etdirən faktlardır.
Əfsuslar olsun ki, Avropa İttifaqının bugünkü məkrli mövqeyi başa düşülmür. Bu təşkilat yenə də ikili standartlar prinsipinə "sadiqdir". Avropa İttifaqı Azərbaycana qarşı saxta məlumatlar əsasında ittihamlar səsləndirir, Azərbaycanın guya Ermənistana hücuma hazırlaşması ilə bağlı feyk xəbərlər tirajlamaqdan belə çəkinmir. Görüşdə Prezident cənab İlham Əliyev bununla bağlı öz fikirlərini aydın və birmənalı şəkildə ifadə edərək bildirdi ki, Cozef Borrelin Azərbaycanın guya ki, Ermənistana hücum etməyə hazırlaşması barədə təqdim etməyə çalışdığı məlumat qətiyyən həqiqəti əks etdirmir. Əlbəttə ki, Azərbaycanın belə bir planı yoxdur və ölkəmizə qarşı aparılan bu qərəzli kampaniya ilk növbədə Fransanın Ermənistanı silahlandırmaqla regionda vəziyyəti gərginləşdirmək cəhdlərinə don geyindirmək məqsədi güdür. Digər tərəfdən də Avropa institutlarının Gürcüstan və Ermənistanı çox yaxın qəbul etmələri, Azərbaycanı təcrid etməyə çalışmaları son zamanlar Qərbdə getdikcə daha çox yayılan islamofobiyanın aşkar təzahürü kimi qiymətləndirilməlidir. Əlbəttə ki, bütün bunlar qarşılıqlı əməkdaşlığın genişlənməsinə qətiyyən xidmət edə bilməz. Buna görə də əməkdaşlıqda maraqlı olan dövlətlər Cənubi Qafqaz regionunda aparıcı ölkə olan Azərbaycan ilə münasibətlərini bərabərhüquqlu əsalar üzərində və obyektiv reallıqlardan irəli gələrək qurmalıdırlar.

Elnur Nəzirov,
Salyan rayon Yenikənd kənd tam orta məktəbin direktor əvəzi, YAP fəalı