“Yeniləşən Azərbaycana yeni məktəb” layihəsi çərçivəsində... Günəş bu dəfə günəşlililər üçün doğub

“Günəşli kənd ümumi orta məktəbi uyğunlaşdırılmış binada, yəni köhnə xəstəxana binasında yerləşirdi. Əslində biz uçuq-sökük binanın təmir olunmasını düşünürdük. Əvəzində yeni, müasir məktəb binası ilə təmin edildik. Çox böyük həvəslə və sevinclə onun istifadəyə veriləcəyi günü gözləyirik”.
Bu sözləri Günəşli kənd ümumi orta məktəbin direktoru Mövlud Cəlilov “Saatlınews“un əməkdaşı ilə söhbətində bildirib. O qeyd edib ki, Günəşli kənd ərazisi 2003-cü ilədək, yəni müstəqil kənd statusu alanadək qonşu Fətəlikənd kəndinin tərkibində olub: “Məktəbimiz 1994-cü ildə ibtidai məktəb kimi fəaliyyətə başlasa da, bir il sonra ümumi orta məktəbə çevrilib. Və 2002-2003-cü tədris ilinədək, normal olmayan bir “binada” – vaqonlarda yerləşib. 2003-cü ildən isə məktəbimiz indiki köhnə xəstəxana binasına köçürülüb. Məktəb üçün uyğunlaşdırılmış bu binanın təmir edilməsini istəyirdik. Bununla bağlı müraciət də etmişdik. Sağ olsun Heydər Əliyev Fondunu. İstəyimizi artıqlaması ilə yerinə yetirib - bizim üçün, günəşlililər üçün gördüyünüz bu gözəl, möhtəşəm binanı ərsəyə gətirib. Buna görə Azərbaycan Prezidenti İlham Əliyevə, Birinci vitse-prezident Mehriban xanım Əliyevaya böyük əksəriyyəti Ahıska türkü olan Günəşli kənd sakinləri adından dərin təşəkkürümü bildirirəm. Eyni zamanda bu məsələdə bizə dəstək olmuş, müraciətimizə həssaslıqla yanaşaraq onu müvafiq ünvanlara çatdırmış Saatlı Rayon İcra Hakimiyyətinin başçısı Elmir Bağırova, Mil-Muğan RTİ-nin, o cümlədən rayon Təhsil sektorunun rəhbərliyinə öz minnətdarlığımı çatdırmaq istəyirəm.”
Mövlud müəllim bildirdi ki, ötən ilin avqust ayından inşasına başlanılmış yeni məktəb binası üç mərtəbəli və 360 şagird yerlikdir. Məktəb binası fənn kabinetləri, laboratoriya otağı, idman zalı ilə təmin edilib, bütün mərtəbələrə kameralar quraşdırılıb, kombi sistemi ilə təchiz edilib, bir sözlə, müasir məktəb binası üçün lazım olan hər şeylə, avadanlıq və vəsaitlərlə təmin olunub: “Yeri gəlmişkən, qeyd edim ki, istilik sisteminin qaz xəttinə qoşulması üçün bütün məsələlər, demək olar ki, artıq öz həllini tapıb”. 
O, hal-hazırda Günəşli kənd ümumi orta məktəbində 240 nəfərə yaxın şagirdin təlim-tərbiyəsi ilə 24 nəfərlik pedaqoji heyətin məşğul olduğunu, yeni bina istifadəyə verildikdən sonra şagirdlərin sayının artacağı ehtimalının olduğunu diqqətə çatdırdı. 
Yeni məktəb binasının kəndin mərkəzi hissəsində yerləşdiyini deyən məktəb direktoru, bunun məsafə baxımından da şagirdlər üçün daha əlverişli olduğunu söylədi. Və fürsətdən istifadə edərək müvafiq qurumların nümayəndələrinə müraciət də ünvanladı. Məktəbin yaxınlığından keçən yüksək gərginlikli elektrik xəttinin yerinin dəyişdirilməsini xahiş etdi və bunun uşaqların təhlükəsizliyi baxımından mühüm əhəmiyyət kəsb etdiyini xüsusi vurğuladı. 
Qeyd edək ki, şagirdlərinin 95 faizi ahıskalı olan Günəşli kənd ümumi orta məktəbin yeni binasının növbəti tədris ilinin başlangıcından istifadəyə veriləcəyi gözlənilir.

Mahir Allahyarlı.