Xocalı soyqırımı dünyanın gözü qarşısında baş vermiş qanlı cinayətdir

Prezident İlham Əliyev, Azərbaycan xalqı uzun illər Xocalıya ədalət istəyib və bu istiqamətdə beynəlxalq təşkilatlar qarşısında ciddi məsələlər qaldırılıb. Bununla bağlı 2008-ci ildən Heydər Əliyev Fondunun vitse-prezidenti Leyla Əliyevanın təşəbbüsü ilə "Xocalıya ədalət!" beynəlxalq maarifləndirmə kampaniyası həyata keçirilir. Azərbaycan dövləti, dövlət qurumları, eyni zamanda xaricdə yaşayan azərbaycanlılar, ictimai təşkilatlarımız və onların arasında Heydər Əliyev Fondu Xocalı soyqırımını dünyaya tanıtdırmaq üçün çox böyük səylər göstərib. Heydər Əliyev Fondunun xətti ilə geniş vüsət almış "Xocalıya ədalət!" kampaniyası dünyanın müxtəlif yerlərində aparılmışdır, bir çox tədbir, təqdimat həyata keçirilmişdir, kitablar, məqalələr dərc edilmişdir, sərgilər təşkil olunmuşdur. Yəni biz bu həqiqəti dünya ictimaiyyətinə çatdırmaq üçün çox səy göstərmişdik və haqlı olaraq dünyadan ədalət tələb edirdik. Çünki Xocalı soyqırımı dünyanın gözü qarşısında baş vermiş qanlı cinayətdir. 
"Xocalıya ədalət!" tələbimiz tam haqlı idi. Bu ədaləti döyüş meydanında təmin etməyimiz beynəlxalq hüquqa və tarixi ədalətə tam uyğundur. Biz tarixi ədaləti bərpa etmişik. 26 fevral Xocalı soyqırımı günündə Prezident İlham Əliyevin Xocalıdan dünyaya bəyan etdiyi kimi, Azərbaycan xalqı olaraq ürəyimizdə alışan intiqam alovunun üzərinə su çiləndiyi, narahat ruhlarımızın dinclik tapdığı müqəddəs anlar yaşayırıq. Onilliklərdir qəlbimizdə dağa, dilimizdə ağıya, gözümüzdə yaşa çevrilən Xocalının azadlığının, qaniçən erməni quldurları tərəfindən qətl edilən xocalılıların qisaslarının alınmasının təsvirəgəlməz duyğuları içərisindəyik.
Bu il fevralın 26-da ilk dəfə Xocalı soyqırımı gününü Xocalıda qeyd etməyimiz, doğma evlərindən didərgin düşən xocalılıların 32 ildən sonra öz yurdlarına nisgilqarışıq sevinc göz yaşları içərisində qayıdışlarına şahidliyimiz isə milli qürurumuz oldu. 2024-cü il fevralın 26-da Qalib Lider İlham Əliyev tərəfindən Xocalı qurbanlarının xatirəsinin əbədiləşdirilməsi üçün Xocalıda Memorial Kompleksin təməlinin qoyulması isə şəhidlərimizin ruhuna böyük ehtiramın daha bir təcəssümü oldu.   
Bu gün Müzəffər Ali Baş Komandanımız daxil olmaqla bütün Azərbaycan xalqı - böyükdən kiçiyə hər kəs Xocalının qisasının alınmasının qürurunu yaşayır. İlk dəfədir ki, soyqırımı qurbanlarının xatirəsi onların öz doğma yurdlarında anıldı. Prezidentimizin vurğuladığı kimi, "o qanlı tarixə qayıdanda, o dəhşətli video və fotosənədlərə baxanda bizi qəzəb boğur, 30 il yox, 300 il keçsə də, bu qəzəb bizi buraxmayacaq". Əlbəttə, Azərbaycan xalqı Xocalı soyqırımını heç zaman unutmayacaq. Ona görə yox ki, biz də gələcək nəsilləri haylarsayağı nifrət və qisasçılıq zəminində  yetişdirməliyik. Əlbəttə ki, yox. Biz böyük xalqıq, Xocalı soyqırımını törədənlərin dinc, əliyalın adamlara qarşı etdikləri vəhşiliyə, qəddarlığa,  milli ləyaqətsizliyə heç vaxt yol verə bilmərik. Amma bizə qarşı bir daha belə bir vəhşiliyin törədilməsinə də qətiyyən yol verməyəcəyik. Xocalı soyqırımı və Birinci Qarabağ savaşı zamanı baş verən digər qətliamlar da məhz buna görə heç zaman unudulmamalıdır. Fikrimcə, Prezidentin görüşdə xocalılılara və onların timsalında xalqımızın bütün nümayəndələrinə çatdırmaq istədiyi əsas ismarıc bu idi.
Bu gün Azərbaycan işğaldan azad etdiyi torpaqlarında nəhəng tikinti-quruculuq işləri aparır, didərgin salınan insanlarını yurdlarına qovuşdurur. Bu yaxınlarda Xocalı sakinləri də Xocalıya dönüb burada yeni həyata başlayacaqlar. İlahi ədalətin təzahürü olan bütün bu işləri gözləri ilə görmələri isə xalqımıza qarşı cinayət əməlləri törədən erməni faşistlərinə, uşaq qatillərinə, separatçılara dünyadakı ən dəhşətli cəzadır. Bir sözlə, Azərbaycan haqq-ədaləti öz gücünə təmin edib və ölkəmizin qazandığı parlaq zəfərlərin nuru onilliklərdir erməni separatizminin qaranlığa bürüdüyü bölgəni də işıqlığa çıxarıb. Prezident İlham Əliyevin yürütdüyü müdrik və qətiyyətli siyasət sayəsində, nəhayət, Cənubi Qafqazda sülhə və inkişafa da tarixi şərait yaranıb.  

Vüqar Ağayev
YAP Salyan rayon təşkilatının məsləhətçisi