Azərbaycanda daşa dəyən “fransız oxu”

“Fransa vətəndaşının əsassız olaraq tutulduğu barədə Fransanın Avropa və Xarici İşlər Nazirliyinin iddialarının heç bir əsası yoxdur. Bu əsassız bəyanat reallığın təhrif olunması, Azərbaycanın daxili işlərinə və qanuni təhqiqat prosesinə növbəti müdaxilə cəhdidir”.

Bu fikirlər Azərbaycan Xarici İşlər Nazirliyinin mətbuat katibi Ayxan Hacızadə Fransanın Avropa və Xarici İşlər Nazirliyinin Fransa vətəndaşının tutulması ilə əlaqədar Azərbaycan əleyhinə açıqlaması ilə bağlı yerli mətbuatın sualına cavab verərkən bildirib.

Bildirək ki, Fransa Respublikasının vətəndaşı Martin Rian 4 dekabr tarixində Azərbaycan Respublikasının Cinayət Məcəlləsinin 276-cı maddəsində (cəsusluq) nəzərdə tutulmuş əməlin törədilməsində şübhəli bilinərək tutulub.

Məhkəmənin qərarı ilə Martin Riana 4 ay müddətinə həbs qətimkan tədbiri seçilib. 

Azərbaycan tərəfi sözügedən Fransa vətəndaşı barəsində tədbirlər görərkən milli qanunvericiliyə və beynəlxalq öhdəliklərə tam olaraq əməl edib.

Məsələ ilə bağlı Milli Məclisin deputatı, Ana Vətən Partiyasının sədri Fəzail Ağamalı “Cebhe.info”-ya şərhində qeyd edib ki, Fransa Azərbaycan əleyhinə riyakar və çirkin siyasətindən əl çəkməlidir:

“Fransa və onun timsalında olanlar Azərbaycanın dünya miqyasında özünü təsdiq edən ölkə olduğunu başa düşmək istəmirlər. Azərbaycan həqiqətən öz məsuliyyətini dərk edən, öz hüquqlarını qoruya bilən və özünü layiqətli aparan ölkədir. İstər İkinci Qarabağ müharibəsində, istərsə də 2023-ci ilin sentyabrında birgünlük antiterror əməliyyatlarında Azərbaycan öz gücünü və qüdrətini nümayiş etdirdi.

Fransa həmin ölkədir ki, ona məxsus olan 20-dən çox yük maşınlarını heç bir icazə almadan Laçın yolu ilə Azərbaycanın ərazisinə keçirməyə cəhd göstərdi. Amma Azərbaycan buna imkan vermədi. Eyni zamanda Fransa iki dəfə heç bir hüquqi əsas olmadan BMT-nin Təhlükəsizlik Şurasında Azərbaycana qarşı sanksiyaların tətbiq edilməsi üçün məsələ qaldırdı. Lakin Azərbaycanın siyasi və diplomatik manverləri Fransanın bütün cəhdlərini fiaskoya uğratdı.

Bundan başqa, Azərbaycan Fransanın əsrlər boyu həyata keçirtdiyi iyrənc müstəmləçilik siyasətini ifşa edir və bu istiqamətdə addımlar atmaqdadır. O ki qaldı Dövlət Təhlükəsizlik Xidmətinin son əməliyyatına, Azərbaycanın rəhbərliyi nəinki ölkə daxilində, həmçinin Moldova, Ukrayna və Mərkəzi Asiya ölkələrində Fransa agenturasının şəbəkəsini mükəmməl şəkildə ifşa edib.

Fransanın kəşfiyyat orqanları təkcə Azərbaycanda deyil, habelə adını sadaladığım ölkələrdə müxtəlif vasitələr ilə informasiya alıb həmin ölkələri təhdid edirdi. Azərbaycan Fransanın bu çirkin əməllərini ortalığa çıxartdı. 

Azərbaycanın hüquq-mühafizə orqanları həmin Fransa vətəndaşını hüquqi dəlillər əsasında həbs edib. Həmin şəxs Azərbaycanın qanunları çərçivəsində mühakimə olunacaq.

Yaxın gələcəkdə də Azərbaycan Fransanın bütün çirkin əməllərinə qarşı qətiyyətlə mübarizə aparacaq”.