Prezident İlham Əliyevin rəhbərliyi ilə Azərbaycan dövləti özünün ən qüdrətli dövrünü yaşayır

Tarixə adını qalib sərkərdə kimi həkk edən ölkə başçısının üzərinə düşən vəzifələri uğurla icra etməsi bütün dünyada heyrət yaradıb. Çünki yaşadığımız dövrdə ölkənin ərazi bütövlüyünü və suverenliyini tam şəkildə bərpa etmək hər siyasətçiyə nəsib olmur. İlham Əliyev uzaqgörənliyi, müstəqil siyasəti ilə ölkəmizi dünya arenasına alnıaçıq, üzüağ çıxarıb. Ölkə başçısının yürütdüyü uğurlu siyasət nəticəsində bu gün müstəqil Azərbaycan güclü iqtisadi ölkəyə çevrilib. Dövlətimizin başçısı Azərbaycanı bugünkü səviyyəyə çatdırmaq üçün gərgin əmək sərf edib. Bütün bunlar bir daha Prezident İlham Əliyevin uzaqgörən, prinsipial, qətiyyətli siyasətçi, vətənpərvər, xalqı üçün yaşayan şəxsiyyət olduğunu təsdiqləyir. Bu gün dövlətimizin başçısının çoxsaylı təşəbbüsləri nəticəsində Azərbaycan qalib ölkədir. Bizim zəfərimiz region üçün də mühüm əhəmiyyət kəsb edir. 
Prezident İlham Əliyevin rəhbərliyi ilə Azərbaycanın ərazi bütövlüyünün təmin edilməsi isə Ulu Öndərin müqəddəs arzusunun həyata keçirilməsidir. Prezident İlham Əliyevin qətiyyətli, uzaqgörən, məqsədyönlü siyasəti, ordumuzdakı ruh yüksəkliyi, torpaqlarımızın bir qarışını belə düşmənə verməyəcək əzmdə olması, igid oğullarımızın daim irəli getməsi Vətən müharibəsində düşmən üzərində qəti qələbəmizi şərtləndirən amillər oldu. 2020-ci il noyabrın 8-də Qarabağın baş tacı Şuşa şəhərinin azad edilməsi və orada Azərbaycan bayrağının dalğalandırılması ilə sentyabrın 27-də çıxdığımız Zəfər yürüşü qələbə ilə başa çatdırıldı. Dünya hərb tarixində bənzərinə rast gəlinməyən şücaətlə Şuşanı azad edən qəhrəman döyüşçülərimiz düşmənin belini qıraraq onu təslim olmağa məcbur etdilər. 
Müharibədə məğlub olmuş Ermənistan 10 noyabr tarixində kapitulyasiya aktına imza atmaqla özünün təslimolma sənədini imzaladı. Məhz həmin sənəddə Ağdam, Laçın və Kəlbəcər rayonlarından işğalçı qoşunların dərhal və qeyd-şərtsiz çıxarılması şərt olaraq qoyuldu. Nəticədə bir güllə belə atılmadan bu rayonlarımız işğaldan azad olundu.
2020-ci ilin 10 noyabr tarixində imzalanmış üçtərəfli Bəyanatın bütün şərtlərinə əməl etməyən Ermənistan Azərbaycan torpaqlarında yaratmış olduğu qondarma rejimi ləğv etməyərək, "boz zona"nın qalması üçün bütün imkanlarını səfərbər etdi. Ermənistanın növbəti dəfə razılaşdırılmış şərtlərə riayət etməməsi isə 19-20 sentyabr tarixlərində həyata keçirilən lokal xarakterli antiterror tədbirləri ilə yekunlaşdı və qondarma rejim birdəfəlik ləğv olundu. Dünya hərb tarixində xüsusi yer tutan bu müharibə Prezident İlham Əliyevin daha bir bacarığını - sərkərdəlik məharətini üzə çıxardı. 
Prezident İlham Əliyev işğal altında olan torpaqlarımızı geri qaytarmaqla Azərbaycanı qalib ölkəyə çevirmiş, xalqımızın milli mənliyini, mənəvi ruhunu yüksəltmişdir. Dövlət başçısının qeyd etdiyi kimi, "Azərbaycan xalqının çoxəsrlik tarixində buna bənzər parlaq zəfər olmamışdır". Müstəqillik tariximizin ən böyük nailiyyəti olan bu böyük zəfəri xalqımıza yaşadan Prezident İlham Əliyev adını doğma torpaqlarımızın xilaskarı kimi tariximizə əbədi həkk etdirmişdir.
Bu gün qürur hissi ilə deyirik ki, Qarabağın hər nöqtəsində Azərbaycanın üçrəngli şanlı bayrağı dalğalanır. Prezident İlham Əliyevin rəhbərliyi ilə ölkəmizin iqtisadiyyatı günü-gündən inkişaf edir. Hazırda Qarabağda bərpa-quruculuq işləri və sosial proqramlar həyata keçirilir. Reallaşdırılan layihələr, görülən işlər isə əhatəli və genişmiqyaslıdır. Maddi və mədəni dəyərlərimizin, tarixi abidələrimizin bərpası isə bu işlərin mühüm tərkib hissəsidir. Respublikamızın hər bölgəsi inkişaf etdirilir. Ölkə başçımızın işğaldan azad olunmuş ərazilərimizə davamlı səfərləri bu yerlərdən erməni vandalizminin izlərinin silinməsi, tarixi yurd yerlərimizin dirçəldilməsi ilə müşayiət olunur. Bütün bunlar bir daha təsdiq edir ki, işğaldan azad olunmuş əraziləri qısa müddət ərzində sülh, əməkdaşlıq və təhlükəsizlik bölgəsinə çevirmək, rayonları, kəndləri, qəsəbələri, bütün yaşayış yerlərini tezliklə bərpa etmək, bir sözlə, Qarabağı yenidən qurmaq güclü dövlətin, güclü liderin sayəsində mümkündür. Hamımız ürəkdən əminik ki, möhtərəm Prezidentimiz cənab İlham Əliyevin rəhbərliyi ilə hələ çox-çox uğurların sevincini yaşayacaq, yeni-yeni möhtəşəm qələbələrin şahidi olacağıq.

Nübar Bayramova, 
Salyan Rayon Heydər Əliyev Mərkəzinin direktoru, YAP fəalı