Hərbi qüdrətin nümayişi

Vətən müharibəsində qazanılan zəfər ölkə rəhbəri cənab İlham Əliyevin siyasi müdrikliyinin və milli yüksəliş siyasətinin məntiqi nəticəsi idi. Müzəffər Ali Baş Komandan möhtəşəm Zəfərin, misilsiz Qələbənin memarı və müəllifi kimi adını əbədi olaraq Azərbaycanın indiki və gələcək nəsillərinin yaddaşına, Vətən tarixinə yazdırdı. Bütün dünya xalqımızın böyüklüyünün, öz milli haqqı uğrunda mübarizə aparmaq əzminin şahidi oldu və dövlət, xalq olaraq indi daha qürurluyuq.
2020-ci ilin 10 dekabr günü Azərbaycan tarixində, xalqımızın yaddaşında qızıl hərflərlə yazılan tarixi bir hadisə oldu. Çünki Azərbaycanın rəşadətli ordusunun qələbədən sonrakı ilk hərbi paradı keçirilirdi. Bu parad isə  dünyada bizi sevməyənlərə gözdağı olmuşdu. Həmin gün Paradı Müzəffər Ali Baş Komandan İlham Əliyev və fəxri qonaq qismində dəvət olunmuş Türkiyə Prezidenti Rəcəb Tayyib Ərdoğan qəbul etmişdi. 
Xalqımız müharibə dövründə ölkənin silah arsenalının necə zəngin və məqsədəmüvafiq olduğunun şahidi oldu. Çünki uzaqgörən siyasətçi olan Prezident cənab İlham Əliyev danışıqlar dövründə ölkənin hərbi gücünü artırmaq üçün güclü ordu yaradırdı. Təsadüfi deyil ki, dövlət büdcəsinin əsas hissəsi hərbiyə ayrılırdı. Bunun nəticəsidir ki, müharibə dövrü biz heç bir ölkədən asılı vəziyyətə düşmədik. Düzgün strategiya bizə qələbə yaşatdı. Əlbəttə bu silahların alınması o qədər asan iş deyildi. Bunun üçün də həmçinin diplomatik danışıqlar da aparılmalıdır ki, həmin lazımi silahları almaq mümkün olsun. Cənab Prezidentin atdığı addımlar bu sahədə də özünü doğrultdu, lazımi silahlar əldə edildi. Müharibəni qazanmağı labüd edən səbəblərdən biri də əlbəttə ki, iqtisadi inkişaf idi. Əgər iqtisadi inkişaf olmasaydı, əgər bizim iqtisadi müstəqilliyimiz olmasaydı, lazımi dərəcədə lazım olan müasir silahlar əldə edə bilməzdik. Bu illər ərzində həyata keçirilən transmilli, beynəlxalq layihələr Azərbaycanı güclü dövlətə çevirdi, Ermənistan isə dalana dönmüş bir dövlət oldu.
2021-ci il noyabrın 8-də birinci ildönümünü qeyd etdiyimiz Zəfər Günü isə Azərbaycanı bir daha dünyada tanıtdı. Zəfər günü göstərdi ki, xalqımız bu tarixi günü sanki çoxdan gözləyirmiş, Azərbaycan vətəndaşları illərdən bəri həsrətində olduqları müqəddəs bir arzuya qovuşublar. 
44 günlük Vətən Qarabağ müharibəsindəki Qələbə Azərbaycanın son 200 illik tarixinin döyüş meydanında yazılan şanlı səhifəsi olmaqla, dövlətimizi, xalqımızı böyütdü, dünyaya daha yaxından tanıtdı. Azərbaycan xalqının işğal olunmuş torpaqlarının azad edilməsi uğrunda müharibəsi 44 gün davam etdi. Ermənipərəst dövlətlərin və bəzi beynəlxalq təşkilatların Azərbaycana göstərdikləri çox ciddi təzyiqlərə və təhdidlərə baxmayaraq, Azərbaycan xalqı Ali Baş Komandan İlham Əliyevin və Müzəffər Ordumuzun qətiyyəti, cəsarəti və əzmkarlığı sayəsində ölkəmizin ərazi bütövlüyünü bərpa etdi. Azərbaycan xalqı bu müharibə günlərində Ali Baş Komandan İlham Əliyevin ətrafında dəmir yumruq kimi birləşərək, tariximizdə görünməmiş bir qələbə əldə etdi. Ona görə bu müharibə, sözün həqiqi mənasında, Vətən müharibəsinə çevrildi, xalqımızı daha sıx birləşdirdi, Vətənimizin milli və mənəvi dəyərlərini müdafiə etmək əzmimizi və iradəmizi nümayiş etdirdi. Aradan aylar, illər, onilliklər, qərinələr keçəcək, lakin bu Qələbə həmişə xalqımızın yoluna işıq salacaq, keçmişimizin qürur mənbəyi kimi gələcəyimizi qurmağa kömək edəcək.

Şövqi Həsənov,
YAP Şəmkir rayon Təşkilatı Aparatının əməkdaşı