İnamlı Qələbə və ədalətli müharibə

Tarixboyu Azərbaycan xalqı həmişə əmin - amanlığın tərəfdarı olub. İşğalçı Ermənistanın sülh danışıqları prosesini pozması, təmas xəttində tez-tez təxribatlara əl ataraq mülki əhaliyə atəş açması Azərbaycana hərbdən başqa yol qoymadı.Prezident İlham Əliyevin ordu quruculuğuna göstərdiyi diqqət və qayğı, ordunun döyüş hazırlığı, maddi-texniki bazasının daim yenilənməsi və ən əsası, hər bir əsgərin döyüş əzminin yüksək olması hər zaman prioritetidi. Əgər belə olmasaydı, ilbəil orduya ayrılan vəsaitin həcmi artırılmazdı, maddi-texnikibazası gücləndirilməzdi, yeni-yeni silah-sursat və hərbi texnika alınmazdı. Məhz bütün bu proseslər sayəsində, həmçinin ölkədə hərbi sənayenin inkişafı ilə Azərbaycan Ordusu regionun ən güclü hərbi qüvvəsinə çevrildi.Ali Baş Komandan tərəfindən Silahlı Qüvvələrdə bütün istiqamətlərdə aparılan islahatlar öz bəhrəsini verdi. Ordumuz qarşıya qoyulan məqsədə doğru inamla irəlilədi. Bu uğurlu addımlar isə bizi Qarabağa apardı!
44 gün davam edən Vətən müharibəsi əslində müasir dövr üçün qısa müddət deyil. Danılmaz həqiqətdir ki, müharibədə qələbə döyüş meydanında tökülən qanlar hesabına qazanılır.Ali Baş Komandan İlham Əliyevin səsləndirdiyi “Qarabağ Azərbaycandır və nida işarə” ifadəsi ordumuzu hər gün zəfərdən-zəfərə aparan şüara çevrilmişdi.Belə çətin günlərdə hər birimiz həmin ifadənin yaratdığı əhval-ruhiyyənin cazibəsinə düşüb qələbəmizin hər gün, hər an bizə yaxınlaşdığına əmin olduq.Müzəffər Azərbaycan Ordusunun cəsur əsgər və zabitləri canı-qanı bahasına Ermənistanın 30 il ərzində milyonlarla vəsait sərf edib qurduğu nəhəng istehkamları yarıb keçdi. Düşmənin silahlı qüvvələri darmadağın edildi.Ali Baş Komandan İlham Əliyevin böyük sevinc hissi ilə xalqımıza verdiyi qələbə müjdələri, dünyanın nüfuzlu nəşrlərinə verdiyi məntiqli, dolğun müsahibələri də Azərbaycanın haqq savaşında qalib gəlməsi üçün böyük stimul oldu.Azad olmuş bütün şəhər və kəndlərdə üçrəngli bayrağımız əbədi olaraq dalğalandırıldı.
Azərbaycanın torpaqlarının azad olunması uğrunda apardığı müharibə ədalətli və müqəddəs Vətən müharibəsi idi.Belə ki, oktyabrın 3-ü tarixi Suqovuşan ərazisi və yüksəkliyi,4 oktyabrda Cəbrayıl şəhəri, 19 oktyabrda Hadrut qəsəbəsi, 17 oktyabrda Füzuli şəhəri,20 oktyabrda Zəngilan şəhəri, 24 oktyabrda Qubadlı şəhəri, Xocavənd rayonunun çoxsaylı kəndləri, Xocalının bəzi kəndləri işğaldan azad olundu və nəhayət ordumuz Laçına daxil oldu.Bu dövr ərzində 300-ə yaxın kənd, 5 şəhər, 4 qəsəbə, çoxsaylı strateji yüksəkliklər azad olundu. Müharibənin bu mərhələsi tariximizə qızıl həriflərlə yazıldı.Azərbaycan Dağlıq Qarabağın incisi olan Şuşa şəhərini, onun ardınca bir gündə 70-dən artıq kəndi, 8 strateji yüksəkliyi azad etməklə, Ermənistanı diz çökdürdü və kapitulyasiyaya məcbur etdi.Zəfəri təmin edən uğurlu hərbi əməliyyatlardır.Baş Komandan İlham Əliyev xalqımıza qələbə sorağını verdikcə liderimizlə, güclü ordumuzla,qəhrəman, igid əsgərlərimiz,həmçinin xalqımızla qürur duyurduq. 
Bu, haqq və tarixi ədalət uğrunda aparılan Vətən müharibəsidir. Cənab İlham Əliyevin söylədiyi kimi, “Azərbaycanın parlaq Qələbəsi təkcə ölkənin ərazi bütövlüyünün bərpası anlamına gəlmir. Bu, şərlə xeyir qüvvələrinin mübarizəsidir”.  Hər bir Azərbaycan vətəndaşının ordumuzla fəxr etməyə haqqı var. Çünki 44 günlük Vətən müharibəsindəki şanlı qələbə bütün dünyaya ordumuzun qüdrətini bir daha nümayiş etdirdi.Məhz "Dəmir yumruq" siyasətinin nəticəsidir ki, bugün biz rahatlıqla deyə bilirik ki, "Qarabağ Azərbaycandır". Bu amal, bu istək xalqımızı birləşdirdi. Xalqımız və hər bir dünya azərbaycanlısı zəmanəmizin ən uğurlu liderlərindən biri olan, beynəlxalq arenada mühüm rol oynayan Prezidenti ilə qürur duyur. Məhz bu şəxsiyyətin illər əvvəl başladığı uğurlu yol siyasəti Azərbaycanı zirvələrə qaldırdı,bütövləşdirdi,qürurlandırdı. Azərbaycan xalqı bundan sonra da öz liderinə böyük etimad göstərərək təmkin nümayiş etdirəcək, hərbi qələbəni siyasi qələbə kimi möhkəmlədirəcək, yumruq kimi Azərbaycan Prezidentinin ətrafında birləşəcək.Bu qələbə Ali Baş Komandanımızın, bizim birliyimizin qələbəsidir, haqq işimizin, Müzəffər ordumuzun gücünün, rəşadətli əsgərlərimizin, Azərbaycan xalqının iradəsinin qələbəsidir!

Şövqi Həsənov,
YAP Şəmkir rayon Təşkilatı Aparatının əməkadşı