Tarixi Zəfər xalq-iqtidar birliyinin, Azərbaycan millətinin həmrəyliyinin təntənəsi idi

Qədim tarixə, zəngin ənənələrə malik olan Azərbaycan xalqı zaman-zaman bir çox çətinliklərlə, bəzən də xarici işğallar və faciələrlə üzləşmişdir. Lakin bütün bunlar xalqımızın iradəsini sındıra bilməmiş, əksinə bizi daha da mətin və həmrəy etmişdir. Vətən tariximizdə xx əsrin sonu, xxı əsrin əvvəlləri də bu baxımdan istisna təşkil etmədi. Erməni təcavüzü nəticəsində torpaqlarının 20%-ni itirən, bir milyona yaxın qaçqın və məcburi köçkünü olan Azərbaycan xalqı Müzəffər Ali Baş Komandan Cənab prezident İlham Əliyevin ətrafında qətiyyətlə və sıx birləşərək “Dəmir Yumruğa” çevrildi. Bu “Dəmir Yumruq” 44 günlük Vətən müharibəsində mənfur düşmənin başını əzərək, onu Azərbaycan torpaqlarından çəkilməyə və təslim olmağa məcbur etdi. Bu tarixi Zəfər xalq-iqtidar birliyinin, Azərbaycan millətinin həmrəyliyinin təntənəsi idi.
44 günlük Vətən müharibəsindəki tarixi Zəfərimiz millətimizin birliyini, hər zaman Müzəffər Ali Baş Komandan İlham Əliyevin ətrafında sıx səfərbər olduğunu bir daha bütün dünyaya nümayiş etdirdi. Hərbi əməliyyatların davam etdiyi həmin günlərdə hər bir vətəndaşımız qələbəmizə kiçik də olsa bir töhvə vermək üçün əlindən gələni etdi. Nəhayət bu müqəddəs savaşda qazandığımız parlaq Zəfər bütün dünyada yaşayan soydaşlarımız tərəfindən böyük coşğu ilə qarşılandı. Bu coşğu və sevinc hisləri dünya azərbaycanlılarının həmrəyliyinin təcəssümü idi. Bir daha vurğulamaq yerinə düşür ki, İkinci Qarabağ müharibəsi zamanı cəmiyyətdəki mövqeyindən, siyasi əqidəsindən, statusundan, tutduğu vəzifədən asılı olmayaraq hər bir Azərbaycan vətəndaşı yüksək səviyyədə milli həmrəylik nümayiş etdirdi.
Müzəffər Ali Baş Komandan İlham Əliyev həmişə çıxışında bu məqamı xüsusi vurğulayırdı ki, tarixi Zəfərimizi şərtləndirən amillərdən biri də gənclərin vətənpərvərlik ruhunda tərbiyə olunmasıdır. Heç vaxt Qarabağı görməyən gənclərimiz bu müqəddəs torpağımız uğrunda ölümə getməyə hazır idilər və Vətən müharibəsində bu addımı atdılar. Cəmiyyətdə milli birlik, həmrəylik ideyaları üstünlük təşkil etdi. Azərbaycanda yaşayan bütün xalqlar dövlətimizin, Prezident İlham Əliyevin ətrafında bir yumruq kimi sıx birləşdi. Bu gün Azərbaycan böyük ailədir. Azərbaycanda yaşayan bütün xalqlar bu ailənin üzvləridir. 44 günlük Vətən müharibəsi zamanı bütün dünya Azərbaycan xalqının birliyini gördü. Bir daha sübut olundu ki, həmrəylik Azərbaycan xalqının böyük sərvəti və dəyəridir. Ölkəmizdə yaşayan bütün millətlərin, dini konfessiyaların nümayəndələri böyük cəsarət göstərdilər, düşmənlə vuruşaraq Azərbaycanın ərazi bütövlüyünü bərpa etdilər. Ümumilikdə bütün bu amillərin vəhdəti tarixi Zəfərimizə, Azərbaycanın hərbi-siyasi Qələbəsinin, Ermənistanın kapitulyasiyasının təsdiqi olan 10 noyabr 2020-ci il tarixli üçtərəfli Bəyanatın imzalanmasına yol açdı.
Azərbaycan xalqının milli-mənəvi bütövlüyü, əzəməti Ali Baş Komandan kimi İlham Əliyevin qətiyyətində, qorxmazlığında təcəssüm tapdı. Öz çıxışlarında milli həmrəyliyi Azərbaycan xalqının təbii güc mənbəyi kimi qiymətləndirən cənab Prezident bizə əslində uğurun formulunu da təqdim edir: Güclü lider, güclü xalq və güclü birlik! Bu qələbə düsturudur və hər birimiz milli həmrəyliyin təntənəsinə töhfəmizi verməliyik.

Ülviyyə Ağalarova, 
Salyan rayon Heydər Əliyev Mərkəzinin əməkdaşı, YAP fəalı