Prezident İlham Əliyev tərəfindən verilmiş müsahibənin hər biri  Azərbaycanın diplomatik uğurudur

27 sentyabr 2020-ci ildə Azərbaycan xalqı, dövləti və ordusu elə bir tarix yazdı ki, bu, bütöv bir millətin ləyaqət rəmzinə, milli qeyrət nümunəsinə çevrildi. Prezident, Müzəffər Ali Baş Komandan İlham Əliyevin ətrafında sıx birləşən Azərbaycan xalqı 30 illik torpaq həsrətinə 44 günə son qoydu. Tariximizdə yeni səhifə yazıldı. Azərbaycan xalqı öz Prezidentinin ətrafında sıx birləşməklə bütün dünyaya sübut etdi ki, Qarabağ millətimizin milli ləyaqət rəmzidir. 30 ilin vətən həsrətinə son qoyan 44 günlük İkinci Qarabağ müharibəsi Azərbaycanın zəfəri ilə başa çatdı. Azərbaycan xalqı məğrur xalq, ordumuz isə dünyanın ən güclü, peşəkar ordusu kimi tarixə düşdü. Azərbaycanın döyüş meydanında və diplomatik müstəvidə qazandığı uğurlar tarixi zəfərimizi şərtləndirdi. 
Prezident İlham Əliyev 44 günlük Vətən müharibəsi dövründə hərbi sahədə olduğu kimi diplomatik və informasiya savaşı cəbhəsində də misilsiz rəşadət göstərmiş, Azərbaycana qarşı informasiya blokadasını yarmış, müharibənin gedişində və müharibədən sonra onlarla aparıcı xarici media subyektlərinə müsahibələr vermişdir. Prezident cənab İlham Əliyevin xarici mətbuata verdiyi 30-dan çox müsahibə, eyni zamanda xalqa edilən müraciətlər informasiya müharibəsində də ölkəmizin üstünlüyünü təmin etdi. Xalqımız Müzəffər Ali Baş Komandan cənab İlham Əliyevin hər bir müsahibə və müraciətlərini böyük maraqla izləyir, yüksək əhval-ruhiyyə ilə Ordumuza dəstək verirdi. Eyni zamanda Azərbaycanın haqq səsini dünyaya çatdırırdı. 
44 gün davam edən Vətən müharibəsində cənab Prezidentin qlobal media gündəmini silkələyən, çoxsaylı xarici informasiya agentliklərinə verdiyi müsahibələri onun intellektual və diplomatik qüdrətinin bariz nümunəsi olmaqla yanaşı, informasiya müharibəsi cəbhəsində dünya erməni və anti-Azərbaycan şəbəkəsinin bütün səylərinin üzərindən xətt çəkdi. Dövlətimizin başçısının parlaq şəxsi keyfiyyətləri ilə baş tutan ardıcıl müsahibələr “informasiya bombası” effekti yaratdı, düşməni bu sahədə tərksilah etdi. Müsahibələr informasiya cəbhəsində həm məğlubiyyətə uğrayan Ermənistanın, həm də onu himayə etməyə çalışanların saxta xəbərlərini anındaca dəf etdi. Döyüşlərin ilk günlərindən Prezident İlham Əliyevə xarici mənbələrdən edilən fövqəladə və aqressiv xarici mesaj və təzyiqlərin mənasızlığını bütün dünyaya bəyan etdi.
II Qarabağ müharibəsinin getdiyi 44 gün ərzində cənab İlham Əliyev Türkiyə, Rusiya ABŞ, Fransa, İtaliya, Almaniya, İngiltərə, İspaniya, Yaponiya və Qətərdən olan tanınmış, on milynyonlarla, yüz milyonlarla auditoriyası olan nəhəng media qurumlarının əməkdaşlarına 30-a yaxın müsahibə verərək xalqının haqq səsini dünyaya çatdırdı, dünya ictimai fikrində dövlətimizə qarşı mənfi reaksiyanın yaranmasına imkan vermədi. Ölkə başçısı müsahibələrində jurnalistlərin müxtəlif səpkili suallarına səlist, məntiqli cavablar verir, dünya ictimaiyyətinə Ermənistanın işğalçı üzünü tanıdır, Azərbaycanın haqq işi uğrunda mübarizə apardığını nəzərə çatdırırdı.
Tədqiqatçılar hesablamışlar ki, bu müharibə zamanı Azərbaycan Prezidenti 600-dan çox sualı cavablandırmışdır. Azərbaycan Prezidenti öz müsahibələrində konkret dəlillərə, beynəlxalq təşkilatların qərarlarına, beynəlxalq hüquq prinsiplərinə, tarixi faktlara istinad edirdi. İlham Əliyev xarici media qurumları nümayəndələrinə verdiyi müsahibələrdə həm Ermənistan-Azərbaycan Dağlıq Qarabağ münaqişəsi ilə bağlı həqiqətləri dünya ictimaiyyətinə çatdırır, ATƏT-in Minsk qrupunun, xüsusən də həmsədrlərin hərəkətsizliyini, təcavüzkarı işğal etdiyi əraziləri boşaltmaq üşün heç bir təsirli vasitəyə əl atmadığını, BMT Təhlükəsislik Şurasının işğal olunmuş Azərbaycan ərazilərinin qeyd-şərtsiz boşaldılmasını nəzərdə tutan 4 qətnaməsinin yerinə yetirilmədiyini diqqətə çatdırırdı. Prezident cənab İlham Əliyev Ermənistanın Baş naziri Nikol Paşinyanın danışıqları pozduğunu, üstəlik Azərbaycana qarşı açıq təxribatlar törətdiyini, müharibənin Ermənistan tərəfindən başladıldığını, Azərbaycanın adekvat cavablar verdiyini, Ermənistan ordusunun Azərbaycandakı mülki əhaliyə və mülki obyektlərə ballistik raketlərlə zərbələr endirdiyini bildirirdi.
Prezident cənab İlham Əliyev jurnalistlərin hansı ölkəni təmsil etməsindən asılı olmayaraq onlarla hörmətlə, səbir və təmkinlə davranır, əvvəlcə KİV-in yayılacağı ölkənin vətəndaşlarını maarifləndirəcək məlumatlar verir, sonra düşmən yalanlarını təkzib edir, Ermənistan rəhbərliyinin sülh danışıqlarını pozduğunu, Ermənistanın işğalçı ölkə olduğunu və faşizm ideyalarının şüurlara işlədiyi ölkə olduğunu konkret faktlarla göstərirdi. Azərbaycan Prezidenti ermənilərə xidmət edən media qurumlarında ermənilərin xəbis, faşist simalarını ifşa edib, onların yalan və böhtanlarını puça çıxarmaqla qərəzli mövqe tutan jurnalistləri təkzib olunmaz fakt və dəlillərlə susdururdu. 
Bir sözlə II Qarabağ müharibəsi dövründə Prezident İlham Əliyevin aparıcı media qurumlarına müsahibələri sayəsində qərb dövlətlərinin Azərbaycana təzyiqləri minimuma endirildi. İnformasiya müharibəsində də qalib gəlməklə Azərbaycanın qələbəsinin tam və qəti, hərtəfli olmasına nail oldu. Həm də müsahibələrin nəticəsi olaraq, İlham Əliyev Ermənistanı informasiya müharibəsində məğlub etməklə yanaşı, dünya erməniliyinə”, erməni soyqırımı” və “Böyük Ermənistan” xülyasının təbliğatçılarına qalib gəldi.

Səidə Əliyeva,
Salyan rayon Mərkəzləşdirilmiş Kitabxana Sisteminin direktoru, YAP fəalı