Ermənistanın Azərbaycana qarşı apardığı məqsədyönlü və planlı terror siyasətinin davamı.....

     Məlum olduğu kimi, Qarabağdakı Ermənistan silahlı qüvvələrinin birləşmələri son bir neçə ayda ordumuzun mövqelərini müxtəlif çaplı silahlardan sistemli şəkildə atəşə tutmaqla, ərazilərimizin minalanmasını davam etdirməklə məqsədli şəkildə bölgədə vəziyyəti gərginləşdirməkdə idi. Düşmən döyüş mövqelərini şəxsi heyət, zirehli texnika, artilleriya qurğuları və digər atəş vasitələri ilə gücləndirməyə cəhd edirdi. Sentyabrın 19-da Ermənistan silahlı qüvvələrinin Azərbaycanın Qarabağ bölgəsindəki birləşmələrinin kəşfiyyat-diversiya qrupları tərəfindən Əhmədbəyli-Füzuli-Şuşa avtomobil yolunda terror məqsədilə əvvəlcədən quraşdırılmış minanın partlaması nəticəsində Azərbaycan Avtomobil Yolları Dövlət Agentliyinə məxsus nəqliyyat vasitəsi sıradan çıxmış və mülki şəxslər həlak olub. Həmin gün Daxili İşlər Nazirliyinin Daxili Qoşunlarının hərbi qulluqçularını daşıyan nəqliyyat vasitəsinin də Ermənistan silahlı qüvvələrinin kəşfiyyat-diversiya qrupları tərəfindən quraşdırılmış minaya düşməsi nəticəsində hərbi qulluqçularımız həlak olmuş və yaralanmışdır. Azərbaycan tərəfinin beynəlxalq hüququn norma və prinsipləri əsasında atdığı ardıcıl addımlar Ermənistana sülhü və əməkdaşlığı seçmək imkanı yaratmışdı. Təəssüf ki, Ermənistan irqçi mono-etnik dövlətçilik və ərazi ekspansiyası ideologiyasından əl çəkməmiş və bir sıra bədnam havadarlarının fitnəsi ilə növbəti dəfə təxribat yolunu seçmişdir. Üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanıldı. Azərbaycannın antiterror əməliyyatından başqa alternativ yolu qalmadı. 44 günlük Vətən müharibəsi dövründə də BMT Təhlükəsizlik Şurasının qətnamələrini Azərbaycan ordusu yerinə yetirmişdi. Eləcə də 10 noyabr bəyannaməsinin şərtlərini də Azərbaycan ordusu yerinə yetirir. 44 günlük müharibədə olduğu kimi, mülki əhali, mülki infrastruktur obyektləri qətiyyən hədəf seçilmirdi. Biz müharibədə də, antiterror əməliyyatında da ləyaqət göstərən Orduya sahibik. Bölgədə ədalətli sülh və dayanıqlı sabitliyə nail olmağın tək yolu erməni silahlı qüvvələrinin Azərbaycanın Qarabağ bölgəsindən qeyd-şərtsiz, tamamilə çıxarılması, qondarma rejimin buraxılması, silah-sursatın təhvil verilməsidir. Antiterror əməliyyatlarında yalnız düşmənin hərbi obyektləri vuruldu və qarşı tərəfə silahı yerə qoyaraq Azərbaycanla danışıqlara getmək təklifi verildi. Azərbaycanın bu mövqeyi bir çox ölkələr tərəfindən dəstəkləndi. Bizə dost olan ölkələr Azərbaycanın suveren hüquqlarına hörmətlə yanaşdıqlarını bəyan etdilər, xüsusilə Azərbaycana dost və qardaş olan Türkiyə  Cümhuriyyətinin başçısı Rəcəb Tayyib Ərdoğanın BMT baş məclisinin sessiyasında Qarabağı Azərbaycan torpağı adlandırması, Azərbaycanın hüququnu müdafiə etməsi Azərbaycanın hüquqlarının beynəlxalq birlikdə yüksək səviyyədə müdafiə olunduğunu göstərir. Azərbaycanın antiterror əməliyyatı keçirməsi beynəlxalq hüquq normalarına tamamilə uyğundur və Azərbaycan bununla özünün bütün ərazisində suveren hüquqlarını tam həyata keçirir.
      Son zamanlarda ermənilər həm şərti dövlət sərhədində, həm də Rusiya sülhməramlı missiyasının müvəqqəti yerləşdirildiyi Azərbaycan ərazilərində tez-tez ordumuzun mövqelərinə atəş açırdılar. Əlbəttə ki, onlara layiqli cavab verilirdi. Amma bütün bunlar qeyri-qanuni erməni hərbi dəstələrinin Qarabağdan tamamilə çıxarılmasını zəruri edir. Bu, 2020-ci il 10 noyabr üçtərəfli Bəyanatının tələblərindən biridir. Ermənistanın hərbi birləşmələrinin müəyyən hissəsinin hələ də Qarabağda qalması bu sənədə ziddir. Əgər qanunsuz erməni hərbi dəstələri ərazilərimizdən çıxarılmasa, əksinə təxribatlarını davam etdirsələr, o zaman ordumuz tərəfindən Qarabağda növbəti antiterror əməliyyatı keçirilməsi qaçılmaz olacaq.

Mahir Xankişiyev,
Salyan rayonu Xıdırlı kənd inzibati ərazi dairəsi üzrə nümayəndə