Prezident İlham Əliyevin Azərbaycanın ərazi bütövlüyünün və suverenliyinin möhkəmləndirilməsi istiqamətində yürütdüyü ardıcıl və inamlı  siyasət öz müsbət nəticələrini verir

Son vaxtlar biz görürük ki, erməni siyasətçilərinin, dövlət rəsmilərinin və din xadimlərinin əsas məqsədi öz xalqının yolunu zülmətə doğru yönəltməkdir. Təəssüf ki, xarici havadarları da bu işdə onlara dəstəkçi rolunda çıxış edirlər.Azərbaycanın Qarabağ bölgəsində yaşayan 20-25 min erməni əsilli əhalinin humanitar fəlakət qarşısında qalması barədə 2021-ci ildən bəri uydurulan və ləyaqət hissini itirmiş bəzi xarici "jurnalistlər" tərəfindən geninə-boluna tirajlanan davamlı erməni nağıllarının yaradılması prosesi son vaxtlar daha da intensivləşmişdir. Bu nağılların uydurulmasında və yayılmasında bəzi dövlətlərin rəsmiləri, həmçinin "ictimai və siyasi xadimlər" də xüsusi canfəşanlıq göstərirlər.
Rəsmi Bakının təklif etdiyi Ağdamdan Xankəndiyə yol ən yüksək beynəlxalq standartlara cavab verən yoldur. Qısa və rahat yolla avtomobillərin sürətli hərəkəti təmin olunub. Bu yol üzərində müasir infrastruktur vasitələri mövcuddur. Yəni ermənilərin bununla bağlı hər hansı bir bəhanəsi ola bilməz.Ermənilərin heç bir normal arqumenti yoxdur. Qarabağda yaşayan ermənilərəərzaq tədarükünün Ağdam yolu ilə həyata keçirilməsi logistik baxımdan daha sərfəlidir. Həmçinin, Ağdam yolu daha qısadır və daşınma daha ucuz başa gəlir. Bu marşrut işə düşərsə, bir çox məsələlərə aydınlıq gələ bilər. İlk növbədə, həmin yolla həm Qarabağın erməni sakinlərinin, həm də Rusiya sülhməramlılarının təminat və təchizatı həyata keçiriləcək. Bəlli olacaq ki, Xankəndində nə qədər erməni yaşayır. Erməni və rus tərəfi iddia edir ki, Qarabağda sülhməramlıların nəzarəti altında 120 min erməni yaşayır. Əslində isə reallıqda bu say qat-qat aşağıdır. 
Ağdam-Əsgəran-Xankəndi yolu məsafə baxımından ən qısa yoldur. İstər sülhməramlıların, istərsə də Beynəlxalq Qırmızı Xaç Komitəsinin bu yoldan istifadə etməsi daha məqsədəuyğundur, nəinki Ermənistandan gəlib Laçını keçməklə Qarabağa getmək. Ancaq açıq şəkildə onlar bu xoşməramlı təklifdən imtina edirlər. Ermənistan Azərbaycanın Laçın dəhlizini guya blokadaya alması və Dağlıq Qarabağ ermənilərini aclıqla soyqırımına məruz qoymasını BMT Təhlükəsizlik Şurasının 16 avqust 2023-cü il tarixli növbədənkənar iclasında rəsmiləşdirərək Azərbaycana qarşı sanksiyalar tətbiq edilməsinə, Laçın dəhlizinin beynəlxalq gücdən istifadə edərək açılmasına çalışsa da, ciddi məğlubiyyətə uğradı. Faktiki olaraq heç bir dövlət Ermənistanın tezislərini dəstəkləmədi, Azərbaycanı qeyd edilən iddialarla bağlı ittiham etmədi.Bu Azərbaycanın xarici siyasətinin, beynəlxalq təşkilatlarda məqsədyönlü siyasətinin bariz uğur nümunəsidir.
Ermənistan tərəfindən humanitar bəhanələrlə edilən manipulyasiyalar təxribat xarakterli hərbi fəaliyyətlə eyni zamanda baş verir. Ötən həftələr ərzində beynəlxalq hüququn, o cümlədən Azərbaycan, Rusiya Federasiyası və Ermənistan liderlərinin 10 noyabr tarixli üçtərəfli Bəyanatının 4-cü bəndi çərçivəsində Ermənistan öhdəliyinin kobud pozuntusu olaraq, Azərbaycan ərazisində qeyri-qanuni qalan erməni silahlı qüvvələri hərbi-mühəndislik və digər qanunsuz işlərini daha da artırıb.Ermənistanın istər indiki, istərsə də bundan əvvəlki rəsmilərinin siyasəti yalnız bir məqsədə xidmət edib və hələ də bu məqsədə xidmət edir: nəyin bahasına olursa-olsun vaxt udmaq və Qarabağdan vaz keçməmək. Əslində, ermənilərin suveren ərazimizdə-Laçında qurduğumuz nəzarət-buraxılış məntəqəsinin götürülməsinə hesablanmış BMT-dəki müzakirə təşəbbüsü də onların bu cür haqsız niyyətinin tərkib hissəsidir. Ermənistanın xarici işlər naziri hətta BMT kimi mötəbər bir təşkilatın tribunasından Laçın yolunun özləri üçün “həyat yolu” olduğunu bəyan edirsə, bu, açıq-aşkar o deməkdir ki, Ermənistanın sülhlə bağlı bütün bəyanatları saxtadır və o, ölkəmizə qarşı ərazi iddialarından əl çəkməyib. 
Ermənistanın BMT Təhlükəsizlik Şurasından növbəti dəfə öz şantaj kampaniyası üçün meydança kimi, rupor kimi istifadə etmək cəhdləri uğursuzluğa düçar oldu. İclas həm də erməni diplomatiyası ilə Azərbaycan diplomatiyasının keyfiyyət güzgüsünə çevrildi.Bu iclasda Azərbaycan əleyhinə qətnamə çıxarılmasına çalışan Ermənistan diplomatiyası gerçəkdən də çox ciddi məğlubiyyətə uğradı. Azərbaycanın BMT-dəki daimi nümayəndəsi Yaşar Əliyevin sözügedən iclasda etdiyi çıxış da kifayət qədər effektiv, sərrast vəəsaslandırılmış çıxış idi. Bir sözlə, BMT Təhlükəsizlik Şurasının ötən gün baş tutan təcili iclasının nəticələri bir daha göstərdi ki, Prezident İlham Əliyevin Azərbaycanın ərazi bütövlüyünün və suverenliyinin möhkəmləndirilməsi istiqamətində yürütdüyü ardıcıl və inamlı siyasət öz müsbət nəticələrini verir. Azərbaycanın suverenliyinə vəərazi bütövlüyünə xələl gətirmək üçün Ermənistan və onun havadarları tərəfindən həyata keçirilən bütün təxribatlar, məkrli siyasi oyunlar iflasa uğrayır.

Həsən Abdullayev, 
Salyan rayon Qarabağlı kənd inzibati ərazi dairəsi üzrə nümayəndə, YAP fəalı