Azərbaycan hər addımında sülh tərəfdarı olduğunu nümayiş etdirir

İnkaredilməz faktdır ki, Azərbaycan bütün dövrlərdə dünyanın ikili standartlara əsaslanan siyasəti ilə üz-üzə olub. Lakin dövlətimizin real faktlara, tarixi həqiqətlərə əsaslanan müstəqil siyasəti hər bir qərəzli yanaşmanın cavablandırılmasında öz sözünü deyir. Hazırkı dövrdə Ermənistanın «humanitar vəziyyət», «blokada» kimi şoularına dəstək verildiyi, bəzi dünya güclərinin işğalçı dövləti müdafiədən irəli gələn narazılıqlarının daha qabarıq şəkildə yer aldığı hazırkı dövrdə dövlət başçısı İlham Əliyevin 49 ölkədən 150 jurnalisti bir araya gətirən Şuşa Qlobal Bakı Forumundakı çıxışının  ardınca, “Euronews” televiziyasına müsahibəsi mühüm məqamları ilə ölkə və dünya mətbuatında geniş müzakirə olunmaqdadır. Azərbaycana qarşı geniş təbliğatın aparıldığı bir vaxtda dövlət başçısı həmişəki kimi birbaşa kommunikasiyaya gedərək bütün məsələlər üzrə ölkəmizin haqlı, ədalətli mövqeyini diplomatik ustalıqla ortaya qoyur. Dövlət başçısı İlham Əliyev sözügedən müsahibəsində Azərbaycanın regionda, həmçinin dünya siyasətində rolunu açıqlayaraq, hazırkı dövrün əsas çağırışlarının nədən ibarət olduğunu bir daha diqqətə çatdırdı.
Tarixi Zəfərimizin reallıqlarını yaşayırıq. Azərbaycanın çoxəsrlik tarixinin yazılan Zəfər səhifəsi daim vərəqlənir, 30 illik işğal dövründə yaşananlar əsaslı şəkildə diqqətə çatdırılır. Dövlət başçısı İlham Əliyev iyulun 22-də Şuşada “Euronews” televiziyasına müsahibəsində də diqqəti tarixi Zəfərimizdən sonrakı dövrün reallıqlarına, eyni zamanda, beynəlxalq aləmdən gözləntilərə yönəltdi: «Düşünürdüm ki, İkinci Qarabağ müharibəsindən sonra vəziyyət fərqli olacaq. Biz sülh üçün hazır idik və əslində bir az gözlədik ki, beynəlxalq iştirakçılar bizə müəyyən yeni təkliflər versinlər. Anladıq ki, bu, bir növ boşluqdur. Heç kəs nə etməyi bilmirdi» söyləyən cənab İlham Əliyev qeyd etdi ki, 2020-ci il noyabrın 10-da Bəyanatı imzalayan zaman vəziyyət, əslində, dayanıqlı sülhü təmin etmirdi. O, sülh razılaşması deyildi, Bəyanat idi. Əslində, Ermənistanın kapitulyasiya aktı idi.
Dövlət başçısı İlham Əliyev bu fikirləri ilə bir daha Azərbaycan dövlətinin, xalqının 30 illik işğal dövründə yaşadıqlarına baxmayaraq humanistlik göstərib Ermənistana sülh müqaviləsi təklif etdiyini bildirir. Azərbaycan hər zaman sülhün tərəfdarı olub. 30 illik işğal dövründə qarşı tərəf danışıqlara imitasiya naminə qatılıb vaxt qazanmağa çalışsa da Azərbaycan tərəfi sülh danışıqlarının nəticə verəcəyinə ümid edirdi. Çünki ədalətin və beynəlxalq hüququn tərəfində olan ölkəmiz dünyanın haqqı müdafiə edəcəyini düşünürdü. Lakin əksər dünya gücləri ədalət və beynəlxalq hüquq məfhumlarını maraqlarının arxasında gizlədərək ikili standartlara əsaslanan siyasətləri ilə beynəlxalq aləmdə bir etimadsızlıq mühitini yaratdılar. Hansı ki, bu gün bəzi dünya gücləri həmin dövrün reallıqlarını unutmuş kimi, Azərbaycanın təklif etdiyi sülh müqaviləsinin imzalanmasına səy göstərir, ən əsası Qarabağın Azərbaycan ərazisi olduğunu bildirirlər. 30 illik işğal dövründə bu reallığı təsdiqləsəydilər sözsüz ki, 44 günlük İkinci Qarabağ müharibəsi yaşanmazdı.

Rəşad Tağızadə, 
Salyan şəhər 9 saylı tam orta məktəbin müəllimi, 
Vətən müharibəsi iştirakçısı, YAP fəalı