Ermənistan sülh istəyərsə, biz ona nail olacağıq

22 iyul tarixində Şuşada “Euronews” televiziya kanalına verdiyi müsahibəsi zamanı Prezident Cənab İlham Əliyev qeyd etdi ki, Ermənistan sülh istəyərsə, biz ona nail olacağıq. Çünki bizim Ermənistana qarşı hər hansı bir ərazi iddialarımız yoxdur. Biz onların da Azərbaycana qarşı ərazi iddialarının olmamasını istəyirik.  
Son zamanlar beynəlxalq aləmdə gedən ictimai-siyasi proseslər sübut edir ki, bu gün xalqların sülhə, əmin-amanlığa, tərəqqiyə, birgəyaşayışa daha böyük ehtiyacı var. İkinci dünya müharibəsindən, xüsusən, “soyuq müharibə”nin başa çatmasından sonra planetimiz sülhə heç zaman indiki kimi ehtiyac duymayıb. Elmi-texniki tərəqqi dünya dövlətlərinə yeni imkanlar yaratsa da, möhtəşəm perspektivlər vəd etsə də, yeni münaqişə və müharibələrə aparan yolları da dəhşətli dərəcədə qısaltmışdır.Üstəlik, mövcud münaqişələrin aradan qaldırılmasına növbəti yeni əngəllər yaradılır. 
Azərbaycan dövləti hər zaman sülhün, əməkdaşlığın, mehriban qonşuluğun tərəfdarı olub. Beynəlxalq hüququn normalarına və prinsiplərinə böyük hörmət və məsuliyyətlə yanaşan dövlətimiz sülhün təminatı, regionun inkişafına və  qarşılıqlı əlaqələrin möhkəmləndirilməsi istiqamətində  bütün səyləri ilə öz  dəstəyini  göstərir. Regionda sülhün bərqərar olunması istəyi Azərbaycanın rəsmi mövqeyini əks etdirir.  
Bu gün Azərbaycanın beynəlxalq aləmdə əlaqələri getdikcə genişlənir və regiondakı mövqeyi daha da möhkəmlənir. Ermənistan üzərində tarixi Qələbədən sonra respublikamız dünyada qalib ölkə kimi tanınır. Bu şanlı Zəfərdən sonra ölkəmizlə əməkdaşlıq etməkdə maraqlı olan dövlətlərin sayı gündən-günə artmaqdadır. Həm Prezident İlham Əliyevin xarici ölkələrə səfərləri, həm də ölkəmizə rəsmi səfərə gələn dövlət başçılarının görüşləri zamanı da bu məqamların şahidi oluruq. Rəsmi Bakı 30 il ərazilərimizi işğalda saxlamış, Qarabağ və Şərqi Zəngəzurun bütün iqtisadi imkanlarını talan etmiş, mədəni və tarixi abidələrimizi viran qoymuş Ermənistanla sülh dilində danışmalı deyildi. Ancaq biz həm xalqımızın mənəvi keyfiyyətlərini, həm ulu öndərin işləyib hazırladığı siyasi kursun əsas istiqamətlərini, həm də Prezident İlham Əliyevin bütün dünya tərəfindən yüksək qiymətləndirilən sülhpərvərlik siyasətini əsas götürərək, qonşu dövlətə sülh çağırışı etdik. Dövlət başçımız dəfələrlə dedi ki, biz müharibə səhifəsini bağlamağa hazırıq. Gəlin, sivil prinsiplər əsasında qonşuluq edək, əmin-amanlıq şəraitində yaşayaq. Çox təəssüf ki, qarşı tərəf bu humanist çağırışlara müsbət cavab verə bilmədi. 
Azərbaycan işğal olunmuş torpaqlarını azad etməklə bölgədə yeni mərhələnin, yeni geostrateji vəziyyətin yaranmasının da təməlini qoymuş oldu. Yaranan yeni reallıqlar hədəfləri müəyyənləşdirib. Cənab Prezident haqlı olaraq bildirib ki, Azərbaycan və Gürcüstan arasında ikitərəfli və artıq beynəlxalq səviyyədə çox sıx əməkdaşlıq var. Lakin, Ermənistan bu bölgədə təcrid olunmuş ada kimi yaşamaqda davam edə bilməz. Onlar münasibətləri normallaşdırmalıdırlar. Azərbaycana və Türkiyəyə ərazi iddialarına son qoymalıdırlar və Cənubi Qafqazda üçtərəfli səviyyədə hər hansı qarşılıqlı təmasdan çəkinməli deyillər.
Son zamanlar Azərbaycan ardıcıl olaraq sülhün və inkişafın təmini üçün konkret layihə və proqramlarla çıxış edir. Avropa İttifaqının regionda sülhün təmin olunması üçün atdığı addımlar Azərbaycanın bu istiqamətdə həyata keçirdiyi siyasətə beynəlxalq dəstəkdir.

Orxan Seyfullayev,
Salan rayon, Arbatan kənd inzibati ərazi dairəsi üzrə nümayndəsinin müavini